សារព័ត៌មាន នគរវត្ត តែងតែនាំមុខគេជានិច្ច
ការបោះឆ្នោតអាមេរិកអាចនិយាយបានថា ជាការបោះឆ្នោតមានលទ្ធផលយឺតបំផុតមិនធ្លាប់មានពីមុនមក។ ការបោះឆ្នោតអាមេរិក លើកមុនៗ ក្រោយបិទបញ្ចប់ការិយាល័យប៉ុន្មានម៉ោងនឹងដឹងលទ្ធផលឈ្នះចាញ់ហើយ ឬយឺតបំផុតមួយថ្ងៃ ។ តែការបោះឆ្នោតឆ្នាំ២០២០នេះ តាំងពិថ្ងៃទី៣ខែវិច្ឆិកា រហូតដល់យប់ថ្ងៃទី៧ឈានចូលទី៨ខែវិច្ឆិកាទើបដឹងលទ្ធផល។
មុនពេលកាំជ្រួចភ្ញីភ្លើងបានបាញ់ឡើងទៅលើអាកាសអបអរ លោកបៃឌិន និងលោកស្រីហារីសបានបង្ហាញវត្តមានដោយពាក់ម៉ាស់ការពារកូវីដ-១៩ឡើងលើឆាកអបអរសាទរ ។ នៅទីក្រុង Wilmington រដ្ឋ Delaware លោកបៃឌិនប្រកាសទៅកាន់ក្រុមអ្នកគាំទ្រលោកត្រាំថា «ខ្ញុំយល់ពីការខកចិត្តពេលចាញ់។ ខ្លួនខ្ញុំក៏ធ្លាប់ចាញ់ជាច្រើនលើកមកហើយដែរ តែពេលនេះសូមផ្តល់ឱកាសដល់គ្នាម្នាក់ម្តង បោះបង់ចោលវិវាទ រួមគ្នាជាថ្មី យើងមិនមែនជាសត្រូវនឹងគ្នាឡើយ យើងជាពលរដ្ឋអាមេរិក»។
ចំណែកលោកស្រី Kamala Harrisបានប្រកាសថា«លទ្ធិប្រជាធិបតេយ្យមិនមែនពេលណាក៏បានធានានោះឡើយ ប្រជាធិបតេយ្យខ្លាំងលុះត្រាតែយើងតស៊ូការពារវា។ សូមការពារលទ្ធិប្រជាធិបតេយ្យឲ្យបានល្អបំផុត»។
កាំជ្រួចភ្ញីភ្លើងយ៉ាងស្រស់ស្អាតអបអរជ័យជម្នះរបស់លោក បៃឌិន និងលោកស្រី ហារីស ហើយនេះជាពេលវេលាស្រស់ស្អាតបំផុតក្នុងឆាកជីវិតនយោបាយរបស់លោកបៃឌិន រយៈពេល៥០ឆ្នាំកន្លងមក៕ដោយ៖ធី រីណា
