សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ លោក គឹម សន្តិភាព រដ្ឋលេខាធិការ ក្រសួងយុត្តិធម៌ សម្រេចបានដាក់ខ្លួនដាច់ដោយឡែក បន្ទាប់បានចូលរួមក្នុងកិច្ចប្រជុំមួយនាថ្ងៃទី២៤ ខែវិច្ឆិកា ឆ្នាំ២០២០ នៅទីស្តីការក្រសួងមហាផ្ទៃ ដែលក្នុងនោះក៏មានវត្តមាន លោក ឆែម សាវុធ អគ្គនាយកនៃអគ្គនាយកដ្ឋានពន្ធនាគារដែលមានវិជ្ជមានCovid-19។
លោក គឹម សន្តិភាព រដ្ឋលេខាធិការ ក្រសួងយុត្តិធម៌ បានបង្ហោះលើ Facebook ផ្លូវការរបស់លោក នៅព្រឹកថ្ងៃទី២៩ ខែវិច្ឆិកា ឆ្នាំ២០២០ថា៖ ខ្ញុំសូមគោរពជម្រាបជូនបងប្អូន មិត្តភ័ក្រ មេត្តាជ្រាបថា៖ ដោយខ្ញុំបាទបានចូលរួមក្នុងកិច្ចប្រជុំមួយនាថ្ងៃទី២៤ ខែវិច្ឆិកា ឆ្នាំ២០២០ នៅទីស្តីការក្រសួងមហាផ្ទៃ ដែលក្នុងនោះក៏មានវត្តមានឯ.ឧ ឆែម សាវុធ អគ្គនាយកនៃអគ្គនាយកដ្ឋានពន្ធនាគារដែលមានវិជ្ជមានCovid-19។
លោកបន្តថា៖ ហេតុដូច្នេះ ដើម្បីអនុវត្តតាមការណែនាំពីក្រសួងសុខាភិបាលអោយបានត្រឹមត្រូវ ខ្ញុំបានដាក់ខ្លួនដាច់ដោយឡែកតាំងពីទទួលបានដំណឹងភ្លាមអំពីការពាក់ព័ន្ធនេះ ហើយព្រឹកនេះខ្ញុំក៏នឹងទៅទទួលយកការពិនិត្យលើកទីមួយតាមការរៀបចំរបស់ក្រសួងសុខាភិបាល បន្ទាប់មកខ្ញុំបាទនឹងបន្តអនុវត្តវិធានចត្តាឡីស័កអោយបានត្រឹមត្រូវ និងគ្រប់រយៈពេល១៤តាមការកំណត់។
ខ្ញុំសូមអធ្យាស្រ័យពីសំណាក់បងប្អូន មិត្តភ័ក្រទាំងអស់ដែលបានជួបជាមួយខ្ញុំចាប់ពីថ្ងៃទី ២៤ ខែវិច្ឆិកា មក ស្នើសូមមេត្តារក្សាខ្លួននៅក្នុងផ្ទះ និងការពារអ្នកនៅក្នុងផ្ទះផ្សេងទៀត ដើម្បីជាវិធានការប្រុងប្រយ័ត្ន និងបង្ការការឆ្លងជាយថាហេតុណាមួយក្នុងក្រុមគ្រួសារ និងញាតិមិត្តជិតឆ្ងាយរបស់យើង ទោះបីជាមានការពាក់ម៉ាស់ និងហានិភ័យតិចតួចក៏ដោយ ។
ខ្ញុំបាទនឹងជូនដំណឹងអំពីលទ្ធផលនៃការពិនិត្យរបស់ខ្ញុំជាបន្តបន្ទាប់ជូនបងប្អូន មិត្តភ័ក្រទាំងអស់។
សូមមេត្តាអធ្យាស្រ័យចំពោះផលរំខានមួយនេះ។ ដោយក្តីគោរពដ៏ស្មោះអំពីខ្ញុំបាទ🙏🙏🙏៕
ដោយ៖ សុខ ខេមរា
