យុវជនសង្ស័យ២នាក់បានឆ្លើយសារភាពមូលហេតុឆក់ទូរស័ព្ទដៃពីជនរងគ្រោះអង្គុយលេងទូរស័ព្ទលើម៉ូតូទំនងពេក មិនឆក់ស្ដាយ

ភ្នំពេញ៖ នគរបាលឃាត់យុវជនសង្ស័យ២នាក់ជិះម៉ូតូធ្វើសកម្មភាពលួច(ឆក់ទូរស័ព្ទ)ដោយសារមូលហេតុមកពីជនរងគ្រោះអង្គុយចុចទូរស័ព្ទគ្មានខ្លាចចោរសោះ។

ហេតុការណ៍កើតឡើងបង្កការភ្ញាក់ផ្អើល កាលវេលាម៉ោង៧និង៣០នាទីយប់ថ្ងៃទី១០ ខែ ធ្នូ ឆ្នាំ ២០២០នៅចំណុចមុខផាតធឺមិន H.M.H ផ្លូវលេខ១៣៥ កែងផ្លូវលេខ៤៧៨ ក្រុម១ ភូមិ១ សង្កាត់ទួលទំពូងទី១ ខណ្ឌចំការមន រាជធានីភ្នំពេញ។

ជនរងគ្រោះ ឈ្មោះ ម៉ៃ ស្រីនិច ភេទស្រី អាយុ៣១ឆ្នាំ ជនជាតិ ខ្មែរ មុខរបរគ្រូបង្ហាត់ហាត់ប្រាណ មានទីលំនៅផ្ទះលេខ១៥៦ ផ្លូវរថភ្លើង សង្កាត់ទឹកល្អក់ទី១ ខណ្ឌទួលគោក រាជធានីភ្នំពេញ ។  

 ជនសង្ស័យទី១ ឈ្មោះ ធី សំណាង ភេទប្រុស អាយុ ១៦ឆ្នាំ ជនជាតិ ខ្មែរ មុខរបរ គ្មាន មានទីលំនៅផ្ទះជួលគ្មានលេខ ផ្លូវបេតុង សង្កាត់និរោធ ខណ្ឌច្បារអំពៅ រាជធានីភ្នំពេញ(អ្នកឆក់) ។

 ជនសង្ស័យទី២ ឈ្មោះ សៀង ពន្លឺ ភេទប្រុស អាយុ១៤ឆ្នាំ ជនជាតិខ្មែរ មុខរបរគ្មាន មានទីលំផ្ទះជួលគ្មានលេខ ផ្លូវកម្ពុជាក្រោម សង្កាត់ផ្សារថ្មី១ ខណ្ឌដូនពេញ រាជធានីភ្នំពេញ (ម្ចាស់ម៉ូតូ អ្នកបើក)។ ជនសង្ស័យទាំ២នាក់ខាងលើមិនមានប្រើប្រាស់គ្រឿងញៀននោះទេ ។

 បើតាមលោក ឈុន ស្រ៊ុន នាយប៉ុស្តិ៍នគរបាលរដ្នបាលទួលទំពូងទី១ បានប្រាប់អោយដឹងថា មុនធ្វើសកម្មភាពឆក់ទូរស័ព្ទដៃពីស្រ្តីជនរងគ្រោះនោះ ជនសង្ស័យទាំង២នាក់ខាងលើបានជិះម៉ូតូម៉ាកហុងដាសេ១២៥ ពណ៌ខ្មៅ ស្លាកលេខភ្នំពេញ 1FH-5171  ដោយជនសង្ស័យឈ្មោះសៀង ពន្លឺ ជាអ្នកឌុបជនសង្ស័យឈ្មោះ ធី សំណាង  ខណៈមកដល់ចំណុចកើតហេតុខាងលើ បានឃើញជនរងគ្រោះ ឈ្មោះ ម៉ៃ ស្រីនិច កំពុងអង្គុយលើម៉ូតូម៉ាកZooMerX ចុចទូរស័ព្ទដៃម៉ាកអាយហ្វូនសុិចផ្លើស ពណ៌ខ្មៅឱកាសល្អជនសង្ស័យទាំង២នាក់ ក៏ជិះម៉ូតូរបស់ខ្លួនមកអែបខាងឆ្វេងជនរងគ្រោះ រួចជនសង្ស័យឈ្មោះ ធី សំណាង ក៏ធ្វើសកម្មភាពឆក់បានទូរស័ព្ទដៃ ពីជនរងគ្រោះ ហើយ ព្យាយាមបើកម៉ូតូរត់គេចខ្លួនក៏ត្រូវបានជនរងគ្រោះរត់ដេញតាមស្រែកចោរៗ ជនសង្ស័យភ័យក៏ជ្រុលទៅបុកម៉ូតូអ្នកដំណើរដួលរួចរត់ចោលម៉ូតូបំរ៉ុងគេចខ្លួន ពេលនោះដែរក៏ត្រូវកម្លាំងល្បាតប៉ុស្តិ៍នគរបាលរដ្ឋបាលទួលទំពូងទី១ ក្បែរនោះឃើញហេតុការណ៍បានស្ទាក់ឃាត់ខ្លួនបាននៅក្បែរកន្លែងកើតហេតុនោះរួចនាំយកមកប៉ុស្តិ៍ដើម្បីសួរនាំតែម្ដងទៅ ។ 

ជនសង្ស័យឆ្លើយសារភាពមូលហេតុឆក់ដោយស្រ្តីរងគ្រោះអង្គុយចុចទូរស័ព្ទដៃដូចមិនខ្លាចចោរឆក់សោះ នគរបាលស្ដាប់លឺហួសចិត្ត។ វត្ថុតាងទូរស័ព្ទដៃម៉ាកអាយហ្វូនសុិចផ្លើស ពណ៌ខ្មៅចាប់យកពីជនសង្ស័យ ឈ្មោះធី សំណាង បានប្រគល់ជូនជនរងគ្រោះវិញ ។

 ចំណែកម៉ូតូម៉ាកហុងដាសេ១២៥ ពាក់ ស្លាកលេខភ្នំពេញ 1FH-5171 និង ទូរស័ព្ទម៉ាក VIVO ពណ៌ក្រហម០១គ្រឿង របស់ជនសង្ស័យ ព្រមទាំងជនសង្ស័ទាំង២នាក់ខាងលើបានធ្វើការឃាត់ខ្លួននិងកសាងសំណុំរឿងបញ្ជូលទៅអធិការដ្ឋានខណ្ឌចំការមនចាត់ការបន្តតាមនីតិវិធីច្បាប់ ៕ដោយ៖ជី ណា