អ្នកណាខ្លះពេលពាក់ម៉ាសច្រើនម៉ោង ធ្វើឲ្យកើតអការៈអាលែកហ្ស៊ីស្បែក តើគួរប្រើតិចនិកយ៉ាងម៉េចទើបថែទាំស្បែកមុខ

ចែករំលែក៖

អត្ថបទសុខភាព៖ បច្ចុប្បន្ននេះ គឺជារដូវកាលនៃជំងឺរាតត្បាតកូវីដ១៩ ដូច្នេះប្រជាពលរដ្ឋបាននាំគ្នាចូលរួមអនុវត្តវិធានការណែនាំរបស់ក្រសួងសុខាភិបាល ដើម្បីទប់ស្កាត់ជំងឺឆ្លងមួយនេះ ដោយធ្វើការពាក់ម៉ាស លាងដៃជាមួយសាប៊ូ ឬអាល់កុលការពារគឺជារឿងដែលចៀសមិនរួចឡើយ។ ប៉ុន្តែទោះជាយ៉ាងណា បញ្ហាសុខភាព និងសម្រស់ត្រូវតែដើរទន្ទឹមគ្នា។ ហេតុដូច្នេះហើយ ស្រីៗយើងគួរតែផ្លាស់ប្តូរទម្លាប់ថែទាំស្បែកមុខមួយចំនួន ដើម្បីឲ្យសមស្របទៅនឹងសភាពការណ៍បច្ចុប្បន្ន។

ពិតជាមិនមែនជារឿងងាយស្រួលនោះទេ ចំពោះការពាក់ម៉ាសប្រចាំថ្ងៃ សម្រាប់ស្បែកមុខដ៏ស្រស់ផូរផង់របស់មនុស្សយើងឡើយ។ជាពិសេសនៅពេលដែលយើងពាក់ម៉ាសច្រើនម៉ោង ស្បែករបស់យើងនឹងងាយប្រតិកម្មរោល ព្រមទាំងឡើងមុនថែមទៀតផង។

ដូច្នេះ ដើម្បីការពារស្បែកមុខពីបញ្ហាផ្សេងៗ ក៏ដូចជាថែទាំផ្ទៃមុខឲ្យនៅតែមានសភាពស្រស់ថ្លា ទន់ម៉ត់រលោង ស្រីៗយើងគួរចាប់ផ្ដើមអនុវត្តតិចនិកងាយៗខាងក្រោម៖

១. ទុកឲ្យស្បែកដកដង្ហើមខ្លះ

នៅពេលដែលយើងការពារខ្លួនដោយប្រើម៉ាស និងរបាំងមុខ ស្បែកយើងពិតជាពិបាកដកដង្ហើមណាស់។ ដូច្នេះហើយ យើងត្រូវទុកឲ្យស្បែកនៅទំនេរខ្លះ ដោយព្យាយាមកាត់បន្ថយការប្រើប្រាស់គ្រឿងសម្អាតផ្សេងៗ ដើម្បីចៀសវាងការស្ទះរន្ធរោម ដែលជាហេតុធ្វើឲ្យកើតមុននៅលើផ្ទៃមុខ។

២. ប្រើហ្វូមលាងមុខដែលគ្មានជាតិកាត់

ជាមួយគ្នានេះដែរ ការពាក់ម៉ាសច្រើនម៉ោង អាចធ្វើឲ្យស្បែកមុខរបស់យើងរោល ឬក្រហាយ និងធ្វើឲ្យមានការរមាស់ ឬមានស្នាមក្រហមជាដើម។ ហេតុនេះ ការលាងសម្អាតមុខជាមួយនឹងហ្វូមដែលគ្មានសារធាតុកាត់ គឺជារឿងសំខាន់បំផុត ពីព្រោះវាមិនត្រឹមតែជួយលាងសម្អាតស្បែកបានល្អប៉ុណ្ណោះទេ វាក៏ជួយរក្សាកម្រិតជាតិទឹកក្នុងស្បែក ដែលមិនធ្វើឲ្យស្បែកស្ងួតផងដែរ។

៣. លាបឡេការពារកម្ដៅថ្ងៃ

ស្រីៗយើងមិនគួរមើលរំលងការលាបឡេការពារកម្ដៅថ្ងៃឡើយ បើទោះបីជាត្រូវនៅតែផ្ទះក៏ដោយ។ ចូរជ្រើសរើសប្រភេទឡេដែលអាចការពារយើងពីកាំរស្មី UVA UVB កាំរស្មីអ៊ីនហ្វ្រារ៉េដ ក៏ដូចជាធន់នឹងទឹក ព្រមទាំងញើសបានល្អ។ ប្រសិនបើយើងធ្វេសប្រហែស កាំរស្មីទាំងនោះនឹងចូលទៅបំផ្លាញដល់ស្រទាប់ស្បែកយ៉ាងជ្រៅ ដែលបណ្ដាលឲ្យស្បែកមុខរបស់យើងឆាប់ចាស់ជាងវ័យ និងកើតមានស្នាមជ្រីវជ្រួញថែមទៀតផង។

៤. ដោះម៉ាសចេញឲ្យបាន១៥នាទី នៅរៀងរាល់៤ម៉ោងម្តង

បើទោះជាយើងរវល់ខ្លាំងនឹងការងារដែលតម្រូវឲ្យពាក់ម៉ាសជាប់ជាប្រចាំយ៉ាងណាក៏ដោយ យើងត្រូវឆ្លៀតពេល យ៉ាងតិចណាស់ឲ្យបាន១៥នាទី ដើម្បីសម្រាកទាំងរាងកាយ ក៏ដូចជាស្បែកមុខរបស់យើង។ ការទុកឲ្យស្បែកស្រូបយកខ្យល់បរិសុទ្ធពីខាងក្រៅ គឺជាការជួយសង្គ្រោះដល់ស្បែករបស់យើងឲ្យចៀសឆ្ងាយពីបញ្ហាស្បែកនានា។ ចូរដោះម៉ាសនៅកន្លែងដែលមានសុវត្ថិភាព និងលាងដៃឲ្យបានស្អាតជាមុនសិនមុននឹងដោះម៉ាស។

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុតសូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕ដោយ៖សហការី