បង្រ្កាបករណីបង្ខាំងមនុស្សជំរិតទារប្រាក់និងរំលោភសេពសន្ថវៈនៅចំណុចតាមផ្លូវលំ ស្របផ្លូវរថភ្លើង ភូមិស្រែក្នុង សង្កាត់កន្ទោក ខណ្ឌកំបូល (កាលពីថ្ងៃទី១៦ ខែធ្នូ ឆ្នាំ២០២០)

ចែករំលែក៖

ភ្នំពេញ៖ ក្រោយពីបានទទួលពាក្យបណ្ដឹងពីម្ដាយរបស់នារីរងគ្រោះថាមានគេតេជំរិតទារប្រាក់ចំនួន១០លានរៀលជាថ្នូរនឹងការដោះលែងកូនស្រីរួចមក លោកវរសេនីយ៍ឯក ហង្ស មុនី អធិការនគរបាលខណ្ឌកំបូល បានឲ្យលោកវរសេនីយ៍ទោ ឈឹម សាវុទ្ធ អធិការរងទទួលផ្នែកព្រហ្មទណ្ឌដឹកនាំកម្លាំងចុះធ្វើការស្រាវជ្រាវរហូតដល់ម៉ោង ១១:៣០នាទី ថ្ងៃទី១៧ ខែធ្នូ ឆ្នាំ២០២០ ទើបកម្លាំងនគរបាលខណ្ឌកំបូល សហការជាមួយការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលរាជធានីភ្នំពេញ នាយកដ្ឋាននគរបាលព្រហ្មទណ្ឌក្រសួងមហាផ្ទៃ កម្លាំងនគរបាលខណ្ឌដង្កោ បានធ្វើការឃាត់ខ្លួនជនសង្ស័យដែលចាប់បង្ខាំងមនុស្សជំរិតទារប្រាក់ និងរំលោភសេពសន្ថវៈ នៅចំណុចតាមផ្លូវបេតុង ក្នុងភូមិថ្មី សង្កាត់ដង្កោ ខណ្ឌដង្កោ និងបានរំដោះនារីដែលជាជនរងគ្រោះចេញពីការបង្ខាំងបានដោយសុវត្ថិភាព។

ជនសង្ស័យដែលកម្លាំងសមត្ថកិច្ចឃាត់ខ្លួនឈ្មោះ សៅ ប្រុស ហៅ បញ្ញា ភេទប្រុស អាយុ៣៧ឆ្នាំ មុខរបរមិនពិតប្រាកដ ស្នាក់នៅបន្ទប់ជួល ផ្លូវលំ ភូមិស្រែក្នុង សង្កាត់កន្ទោក ខណ្ឌកំបូល រាជធានីភ្នំពេញ (ឃាត់ខ្លួន គ្មានសារធាតុញៀន)។

ចណែកជនរងគ្រោះឈ្មោះ អ. ស ភេទស្រី អាយុ១៦ឆ្នាំ មុខរបរសិស្ស ស្នាក់នៅស្រុករលាប្អៀរ ខេត្តកំពង់ឆ្នាំង។

សម្ភារបន្សល់ទុកមាន៖

-ខោខូវប៊យជើងវែងចំនួន១

-អាវយឺត ពណ៌ក្រហមចំនួន១

-ម៉ូតូចំនួន១គ្រឿង ម៉ាកហុងដាសេ១២៥ ពណ៌ខ្មៅ ស៊េរីឆ្នាំ២០១៤ ពាក់ស្លាកលេខ ភ្នំពេញ 1CB-9032

-ទូរស័ព្ទដៃ១គ្រឿង ម៉ាកអិនចុចពិល ពណ៌ខៀវ។

បច្ចុប្បន្នជនសង្ស័យខាងលើនៅថ្ងៃទី២០ ខែធ្នូ ឆ្នាំ២០២០ ត្រូវបានកម្លាំងជំនាញនៃអធិការដ្ឋាននគរបាលខណ្ឌកំបូល កសាងសំណុំរឿង បញ្ជូនទៅកាន់សាលាដំបូងរាជធានីភ្នំពេញដើម្បីចាត់ការតាមនីតិវិធីច្បាប់៕