សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បើយោងទៅតាម នាយកដ្ឋានព័ត៌មានវិទ្យា នៃក្រសួងមហាផ្ទៃបានបញ្ជាក់ឲ្យដឹងថា,សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានផ្តល់អនុសាសន៍ចំនួន៧ចំណុចដល់ក្រសួង ស្ថាប័នជាតិ និងវិស័យឯកជន អង្គការសង្គមស៊ីវិល ដៃគូអភិវឌ្ឍន៍ ព្រមទាំងអ្នកពាក់ព័ន្ធទាំងអស់ ដើម្បីអនុវត្តទប់ស្កាត់អំពើហិង្សាលើស្ដ្រី ក្នុងផែនការសកម្មភាពជាតិ ស្ដីពីការទប់ស្កាត់អំពើហិង្សាលើស្ដ្រី ឆ្នាំ២០១៩-២០២៣។ ការផ្តល់អនុសាសន៍របស់សម្ដេចក្រឡាហោម ស ខេង ធ្វើឡើងក្នុងកម្មវិធីប្រកាសផ្សព្វផ្សាយដាក់ឲ្យប្រើប្រាស់ជាផ្លូវការ ផែនការសកម្មភាពជាតិ ស្ដីពីការទប់ស្កាត់អំពើហិង្សាលើស្ដ្រី ២០១៩-២០២៣ នាព្រឹកថ្ងៃ ទី១៩ ខែមករា ឆ្នាំ២០២១ នៅសណ្ឋាគារ សូហ្វីតែល ភ្នំពេញ ភូគីត្រា។
អនុសាសន៍ទាំង៧រួមមាន៖
១- ក្រសួងស្ថាប័នពាក់ព័ន្ធ ត្រូវបញ្ចូលសកម្មភាពដែលពាក់ព័ន្ធនឹងការងារបង្ការទប់ស្កាត់ និងឆ្លើយតប នឹងអំពើហិង្សាលើស្រ្តីទៅក្នុងផែនការសកម្មភាពរបស់ក្រសួង ស្ថាប័នសាមី ដើម្បីលើកគម្រោងចំណាយ និងការពារថវិកាជាមួយក្រសួងសេដ្ឋកិច្ច និងហិរញ្ញវត្ថុ។
២- ក្រុមប្រឹក្សាជាតិកម្ពុជាដើម្បីស្រ្តី អង្គភាពពាក់ព័ន្ធនៃក្រសួងមហាផ្ទៃ ត្រូវសហការជាមួយក្រសួងកិច្ចការនារី ដើម្បីជំរុញការបង្កើតក្រុមការងារឆ្លើយតបជាពហុវិស័យចំពោះអំពើហិង្សាទាក់ទងនឹងយេនឌ័រ នៅគ្រប់រាជធានីខេត្តសំដៅពង្រឹងការផ្តល់សេវាឆ្លើយតបនឹងអំពើហិង្សាលើស្រ្តី និងក្មេងស្រីប្រកបដោយគុណភាព មានប្រសិទ្ធភាព និងទាន់ពេលវេលា តាមរយៈការធ្វើកិច្ចសហការគ្នានៃអ្នកផ្តល់សេវា និងអ្នកពាក់ព័ន្ធទាំងអស់។ ទន្ទឹមនេះ រដ្ឋបាលស្រុកត្រូវពិនិត្យលទ្ធភាពក្នុងការរៀបចំក្រុមការងារនេះនៅកម្រិតថ្នាក់ស្រុក ដើម្បីបង្ខិតសេវាឱ្យកាន់តែកៀកដល់សហគមន៍។
៣- ត្រូវបន្តពង្រឹងកិច្ចសហការនិងការទទួលខុសត្រូវខ្ពស់របស់អ្នកផ្តល់សេវា ក៏ដូចជាកិច្ចសហការល្អ និងជិតស្និទ្ធរវាងនគរបាលជាតិ កងរាជអាវុធហត្ថ កងកម្លាំងប្រដាប់អាវុធ និងអាជ្ញាធរមានសមត្ថកិច្ចគ្រប់លំដាប់ថ្នាក់ជាមួយមន្ត្រីនគរបាលយុត្តិធម៌ និងភ្នាក់ងារនគរបាលយុត្តិធម៌របស់ក្រសួងកិច្ចការនារីប្រតិបត្តិករពាក់ព័ន្ធទាំងអស់ដែលធ្វើកិច្ចអន្តរាគមន៍ ការផ្តល់កិច្ចការពារនិងការឆ្លើយតបជាពហុវិស័យចំពោះអំពើហិង្សាទាក់ទងនឹងយេនឌ័រ។
៤- អ្នកធ្វើអន្តរាគមន៍ជួយជនរងគ្រោះ អ្នកផ្តល់សេវាជូនជនរងគ្រោះ ត្រូវយកចិត្តទុកដាក់ខ្ពស់ចំពោះសុវត្ថិភាពរបស់ជនរងគ្រោះ កូនរបស់ជនរងគ្រោះ ទ្រព្យសម្បត្តិរបស់ជនរងគ្រោះ និងជនដែលអាចទទួលរងអំពើហិង្សា ដោយស្នើសុំសេចក្តីសម្រេចរដ្ឋបាលរបស់ក្រុមប្រឹក្សាឃុំ-សង្កាត់ ក្នុងករណីបទល្មើសហិង្សាក្នុងគ្រួសារដែលបានកើតឡើង កំពុងកើតឡើង និងអាចនឹងកើតឡើង ដើម្បីធានាឱ្យបាននូវការផ្តល់កិច្ចការពារទាន់ពេលវេលានិងសមស្រប ដោយអនុលោមតាមច្បាប់ស្តីពីការទប់ស្កាត់អំពើហិង្សាក្នុងគ្រួសារ និងកិច្ចការពារជនរងគ្រោះ និងបទប្បញ្ញត្តិច្បាប់ពាក់ព័ន្ធនៅជាធរមាន។
៥- ត្រូវបន្តផ្សព្វផ្សាយលើកកម្ពស់ការយល់ដឹងដល់មន្រ្តីអនុវត្តច្បាប់ អាជ្ញាធរមូលដ្ឋាន ប្រតិបត្តិករពាក់ព័ន្ធនៅថ្នាក់ក្រោមជាតិ និងប្រជាពលរដ្ឋឱ្យបានកាន់តែទូលំទូលាយ ជាពិសេសនៅតំបន់ដាច់ស្រយាលទាក់ទងនឹងច្បាប់ស្តីពីការទប់ស្កាត់អំពើហិង្សាក្នុងគ្រួសារនិងកិច្ចការពារជនរងគ្រោះនិងច្បាប់ពាក់ព័ន្ធ ឬសគល់និងផលប៉ះពាល់នៃអំពើហិង្សាលើស្រ្តី និងបញ្ហាយេនឌ័រផ្សេងទៀត។
៦- ត្រូវបង្កើនការស្វែងរកការគាំទ្រមតិ និងខិតខំប្រឹងប្រែងលើកកម្ពស់ការយល់ដឹងដើម្បីឱ្យមានការផ្លាស់ប្តូរឥរិយាបថសង្គមដែលរើសអើងលើស្រ្តី ក្មេងស្រីនិងជនងាយរងគ្រោះ និងលើកកម្ពស់វប្បធម៌អហិង្សា។
៧- ក្រសួងស្ថាប័នពាក់ព័ន្ធត្រូវខិតខំបង្កើនចំនួនកងកម្លាំងនគរបាល មន្ត្រីបម្រើការងារនៅរដ្ឋបាល ក្រុង ស្រុក ខណ្ឌ ស្មៀនឃុំ សង្កាត់ និងមេធាវីជាស្រ្តី ដើម្បីលើកកម្ពស់ការផ្តល់កិច្ចការពារផ្លូវច្បាប់ដល់ស្រ្តីរងគ្រោះ ដើម្បីឆ្លើយតបនឹងតម្រូវការយេនឌ័រ ទៅតាមលទ្ធភាពដែលអាចធ្វើទៅបាន៕
ដោយ៖ សិលា
