សារព័ត៌មាន នគរវត្ត តែងតែនាំមុខគេជានិច្ច
មន្ត្រីឥណ្ឌូនេស៊ី នៅថ្ងៃទី ២៥ខែមករា បានឲ្យដឹងថា ខ្លួនបានចាប់នាវាដឹកប្រេងMT Horse បំពាក់ទង់ជាតិអុីរ៉ង់ និងនាវាMT Freya បំពាក់ទង់ជាតិប៉ាណាម៉ា សង្ស័យដឹកជញ្ជូនប្រេងខុសច្បាប់នៅលើដែនសមុទ្ររបស់ឥណ្ឌូនេស៊ី។
អ្នកនាំពាក្យកម្លាំងការពារដែនសមុទ្រឥណ្ឌូនេស៊ីបានឲ្យដឹងថា នាវាដឹកប្រេងទាំងពីរគ្រឿងត្រូវបានរក្សាទុកនៅតំបន់សមុទ្រPontianak ស្ថិតនៅកោះBorneo ខេត្ត Kalimantan ។ នៅពេលនេះកម្លាំងទាហានឥណ្ឌូនេស៊ីបានបញ្ជូននាវាដឹកប្រេងទាំងពីរគ្រឿងទៅកាន់កោះ Batam ខេត្តRiau Island ដើម្បីបើកការស្រាវជ្រាវ។
កម្លាំងការពារដែនសមុទ្រឥណ្ឌូនេស៊ីបានឲ្យដឹងថា នាវាដឹកប្រេងខាងលើត្រូវបានប្រទះឃើញនៅតំបន់សមុទ្រ ក្នុងខេត្ត Kalimantan ដោយមិនបានបំពាក់ទង់ជាតិនោះឡើយ បិទប្រព័ន្ធសម្គាល់ ស្វ័យប្រវត្តិ និងមិនឆ្លើយតបការសួរនាំ។
កម្លាំងទាហានឥណ្ឌូនេស៊ីបានឲ្យដឹងថា នាវា MT Horseកំពុងតែផ្ទេរប្រេងទៅកាន់នាវា MT Freya ។ ចំណែកនាវិក៦១នាក់នៅលើនាវាទាំងពីរគ្រឿងត្រូវបានឃាត់ខ្លួន។
នៅថ្ងៃទី២៥ខែមករា អ្នកនាំពាក្យក្រសួងការបរទេសអុីរ៉ង់ លោកSaeed Khatibzadeh បានស្នើដល់ឥណ្ឌូនេស៊ីផ្តល់ព័ត៌មានឲ្យបានច្បាស់ស្តីពីការឃាត់នាវាMT Horse ៕
ដោយ៖ធី រីណា
