សារព័ត៌មាន នគរវត្ត តែងតែនាំមុខគេជានិច្ច
ខេត្តពោធិ៍សាត់ ៖ សមត្ថកិច្ចនគរបាលឃាត់ជនសង្ស័យចោរលួចម៉ូតូ១នាក់ រួមទាំងដកហូតម៉ូតូ១គ្រឿងដែលជាវត្ថុតាង បន្ទាប់ធ្វើសកម្មភាពបានប៉ុន្មានម៉ោងក្រោយ ។
ករណីបង្រ្កាបមុខសញ្ញាលួចម៉ូតូខាងលើ នៅវេលាម៉ោង៧ និង៣០នាទី ព្រឹកថ្ងៃព្រហស្បតិ៍ ១៥កើត ខែមាឃ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី២៨ ខែមករា ឆ្នាំ២០២១ ស្ថិតនៅភូមិកំពែង ឃុំព្រងិល ស្រុកភ្នំក្រវាញ ខេត្តពោធិ៍សាត់ ។
លោក ឧត្ដមសេនីយ៍ត្រី ម៉ូ លីដា ស្នងការរងទទួលផែនការងារព្រហ្មទណ្ឌ នៃស្នងការដ្ឋាននគរបាលខេត្តពោធិ៍សាត់បានឲ្យដឹងថា ជនសង្ស័យជាមុខសញ្ញាឈ្មោះ ផល វៃ ភេទប្រុស អាយុ ២៥ឆ្នាំ ជនជាតិខ្មែរ បច្ចុប្បន្ន រស់នៅភូមិ.ឃុំកើតហេតុ ។
លោក ឧត្ដមសេនីយ៍ត្រីស្នងការរងបន្តថា ម៉ូតូដែលជនសង្ស័យ(ផល វៃ)ធ្វើសកម្មភាពត្រូវដកហូតម៉ាក ហុងដា វ៉េវអាល់ហ្វា ពណ៏ខ្មៅ ពាក់ស្លាកលេខ ពោធិសាត់ 1B 0764 ជាកម្មសិទ្ធរបស់ឈ្មោះ សុិន ហ៊ា ភេទប្រុស អាយុ ៨៥ឆ្នាំ ជនជាតិខ្មែរ មានទីលំបច្ចុប្បន្ន ភូមិអូរព្រាល ឃុំសំរោង ស្រុកភ្នំក្រវាញ ខេត្តពោធិ៍សាត់ ។
លោក បន្តទៀតថា ម្ចាស់ម៉ូតូ(សុិន ហ៊ា)បានដាក់នៅចំហៀងក្រោមផ្ទះ ដោយមានចៅដេកនៅក្បែរម៉ូតូ ចំណែករូបគាត់ទៅដេកនៅផ្ទះកូននៅជិតគ្នានោះដែរ លុះនៅវេលាម៉ោងប្រមាណជាង៤ទាបភ្លឺ ទើបដឹងបាត់ម៉ូតូក៏នាំឆោឡោ និងរាយការណ៍មកសមត្ថកិច្ច ស្រាវជ្រាវភ្លាមៗកំណត់ និងឃាត់ខ្លួនបានតែម្ដង បច្ចុប្បន្ន ជនសង្ស័យជាមុខសញ្ញា(ផល វៃ)បំពេញសំណុំឯកសារបញ្ជូន ដើម្បីចាត់ការបន្ត ៕ ដោយ៖ បុឹម ពិន
