សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ អភិបាលខណ្ឌដូនពេញ លោក សុខ ពេញវុធ បានចាត់ឲ្យកម្លាំងប្រជាការពារខណ្ឌដូនពេញ ចុះត្រួតពិនិត្យ និងបន្តឃាត់ខ្លួន ជនដែលបន្ទោបង់នៅតាមដើមឈើ តាមសួនច្បារ ជញ្ជាំងផ្ទះប្រជាពលរដ្ឋ ជញ្ជាំងការដ្ឋាន និងតាមទីសាធារណៈនានា ក្នុងមូលដ្ឋានខណ្ឌ។ ជាក់ស្តែងជាលិទ្ធផល បានឃាត់ខ្លួនមនុស្សចំនួន១១នាក់បន្ថែមទៀត ដែលធ្វើឲ្យបាត់បង់សណ្តាប់ធ្នាប់ របៀបរៀបរយ និងបង្កឲ្យមានក្លិនឆ្អេះឆ្អាប ដល់អ្នកធ្វើដំណើរនិងប៉ះពាល់សុខភាពប្រជាពលរដ្ឋទូទៅ។
ក្រោយពិនិត្យឃើញជាក់ស្តែង កម្លាំងខណ្ឌក៏បានអញ្ជើញពួកគាត់ មកធ្វើការអប់រំណែនាំ នៅសាលាខណ្ឌដូនពេញ និងបានឲ្យពួកគាត់ធ្វើការបាញ់លាងសំអាតកន្លែង ដែលពួកគាត់បន្ទោបង់រួច ទើបអនុញ្ញាតអោយពួកគាត់ត្រឡប់ទៅវិញ។
សូមជម្រាបដែរថា រដ្ឋបាលខណ្ឌ សូមសំណូមពរដល់ បងប្អូនប្រជាពលរដ្ឋទាំងអស់ សូមកុំយកគំរូតាមពួកគាត់ និងសូមរកកន្លែង បន្ទោបង់ឲ្យបានត្រឹមត្រូវ នៅបន្ទប់ទឹកសាធារណៈ ឬឯកជន ដែលនៅជិតលោកអ្នកចៀសវាងធ្វើតាមពួកគាត់ បង្កភាពអនាធិបតេយ្យ បាត់សណ្តាប់ធ្នាប់អនាម័យ និងប៉ះពាល់ដល់សុខភាពសាធារណៈជនផងដែរ។
គួរបញ្ជាក់ថា រដ្ឋបាលខណ្ឌដូនពេញ បានអនុវត្តវិធានការខាងលេីនេះ ចាប់តាំងពីថ្ងៃអនុវត្តការងាររហូតមកដល់ពេលនេះ អាជ្ញាធរបានឃាត់ខ្លួនមនុស្សចំនួន៤២នាក់ហើយ យកទៅអប់រំ៕
ដោយ៖ស តារា
