សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ មនុស្សប្រុសស្រី៤នាក់បានរងរបួសធ្ងន់និងស្រាលដោយសារករណីគ្រោះថ្នាក់ចរាចរណ៍រវាងម៉ូតូនឹងម៉ូតូដែលបើកមិនប្រកាន់ស្ដាំបុកបញ្ច្រាសគ្នាយ៉ាងពេញទំហឹងលាន់សូរដូចរន្ទះបង្កការភ្ញាក់ផ្អើលដល់អ្នកភូមិនិងអ្នកធ្វើដំណើរទាំងយប់។
ហេតុការណ៍នេះបានកើតឡើងកាលពីវេលាម៉ោង៨យប់ថ្ងៃទី៨ខែកុម្ភៈឆ្នាំ២០២១ ស្ថិតនៅត្រង់ចំណុចភូមិតាខុប ឃុំកំពង់ត្រាច ស្រុករមាសហែក។
បើតាមសមត្ថកិច្ចស្រុករមាសហែកបានឱ្យដឹងថា បុរសដែលបើកម៉ូតូបង្កហេតុមានឈ្មោះគង់ ចេក អាយុ៣៣ឆ្នាំ មុខរបរកសិករ រស់នៅភូមិថ្លុកព្រីង ឃុំដូងស្រុករមាសហែក បើកម៉ូតូម៉ាកហុងដាសេ១២៥ ស៊េរីឆ្នាំ២០១៥ ពណ៌ខ្មៅ ពាក់ស្លាកលេខស្វាយរៀង១G-២៨៩៧រងខូចខាតយ៉ាងដំណំ។
ចំណែកភាគីរងគ្រោះមានឈ្មោះ អ៊ុក សារ៉ូត ភេទស្រី អាយុ៣៧ឆ្នាំ មុខរបរកសិករ និងអ្នករួមដំណើរជាកូនប្រុសមានឈ្មោះសូ សំអាន អាយុ១១ឆ្នាំ និងឈ្មោះសូ សំអាត អាយុ១៦ឆ្នាំ រស់នៅភូមិជាធាច ឃុំដូង ស្រុករមាសហែកខេត្តស្វាយរៀង។
បើតាមអ្នកភូមិបានឱ្យដឹងថា មុនកើតហេតុមានបុរសម្នាក់បានជិះម៉ូតូមួយគ្រឿងម៉ាកហុងដាសេ១២៥ ស៊េរីឆ្នាំ២០១៥ ពណ៌ខ្មៅ ពាក់ស្លាកលេខស្វាយរៀង១G-២៨៩៧ក្នុងទិសដៅពីកើតមកលិចដោយមិនប្រកាន់ស្ដាំបានជ្រុលទៅបុកម៉ូតូមួយគ្រឿងទៀតម៉ាកហុងដា វ៉េវ សេ១១០ ពណ៌ក្រហម ពាក់ស្លាកលេខស្វាយរៀង១B-០៧៩៥ជិះគ្នា៣នាក់ក្នុងទិសដៅបញ្ច្រាសគ្នាយ៉ាងពេញទំហឹងលាន់សូរដូចរន្ទះបង្កការភ្ញាក់ផ្អើលដល់អ្នកភូមិនិងអ្នកធ្វើដំណើរទាំងយប់។
អ្នករងរបួសធ្ងន់ត្រូវបានក្រុមគ្រួសារដឹកមកកាន់មន្ទីរពេទ្យបង្អែកខេត្តស្វាយរៀង។
ចំណែកវត្ថុតាងម៉ូតូទាំង២គ្រឿងសមត្ថកិច្ចធ្វើកំណត់ហេតុនិងវាស់វែងអូសយកទៅរក្សាទុកនៅប៉ុស្ត៏រដ្ឋបាលឃុំកំពង់ត្រាវដើម្បីដោះស្រាយនៅពេលក្រោយតាមច្បាប់៕
ដោយ៖ យឹម សុថាន
