សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់រួមដំណើរប្រុសស្រី៦នាក់បានបើករថយន្តស៊េរីទំនើបមួយគ្រឿងបោះពួយយ៉ាងលឿនបានរេចង្កូតទៅបុករបាំងថ្មពុះចែកទ្រូងផ្លូវពេញទំហឹងបណ្ដាលឲ្យរថយន្តក្រឡាប់ផ្ងារជើងអូសជាច្រើនម៉ែត្រឆាបឆេះយ៉ាងសន្ធោសន្ធៅសំណាងល្អមិនមានអ្នករងរបួស ដោយបង្កការភ្ញាក់ផ្អេីលកាលវេលាម៉ោង១និង២០នាទីយប់រំលងអធ្រាត្រឈានចូលថ្ងៃអាទិត្យទី១៤ ខែកុម្ភៈ ឆ្នាំ២០២១ ស្ថិតនៅតាមបណ្ដោយផ្លូវR5 កែងនិងផ្លូវR6 ក្នុងសង្កាត់ស្រះចក ខណ្ឌដូនពេញ រាជធានីភ្នំពេញ ។
យោងតាមប្រភពពីសន្តិសុខម្នាក់បានបង្ហេីបថា មុនពេលកើតហេតុគាត់ឃើញរថយន្តស៊េរីទំនើបម៉ាកសឺដេស មិនចាំស្លាកលេខ បើកដោយបុរសម្នាក់រួមដំណើរដោយមនុស្សប្រុសស្រីប្រមាណ៥នាក់ធ្វើដំណើរក្នុងល្បឿនលឿនដូចហោះ ខណៈមកដល់ចំណុចកើតហេតុខាងលើ ដោយស្ថានភាពផ្លូវកោង ក៏ធ្វេីឲ្យរថយន្តជ្រុលបុករបាំងថ្មពុះចែកសួនទ្រងផ្លូវពេញទំហឹងបណ្ដាលឲ្យរថយន្តក្រឡាប់អូសជាច្រើនម៉ែត្រឆាបឆេះតែម្ដង ភ្លាមៗនោះដែរម្ចាស់រថយន្តរួមនិងអ្នកដំណើរបាននាំគ្នាចេញពីរថយន្តនិងមិនមានអ្នករបួសនោះទេ ។
ក្រោយមក រថយន្តខាងលេីកាន់តែឆាបឆេះយ៉ាងសន្ធោសន្ធៅ ធ្វេីឲ្យសមត្ថកិច្ចមូលដ្ឋានចុះមកដល់ចំណុចកើតហេតុនិងបានទាក់ទងរថយន្តពន្លត់អគ្គីភ័យមកអន្តរាគមន៏បាញ់រលត់ទៅវិញដោយប្រើប្រាស់រថយន្តពន្លត់អគ្គីភ័យអស់មួយគ្រឿង តែរថយន្តខាងលេីត្រូវបានអគ្គីភ័យលេបត្របាក់ទាំងស្រុងដោយសល់តែគ្រោងឆ្អឹង។
បន្ទាប់មកសមត្ថកិច្ចជំនាញចរាចរណ៍រាជធានីភ្នំពេញចុះមកស្ទូចយករថយន្តខាងលេីទៅរក្សាទុក រង់ចាំដោះស្រាយតាមនីតិវិធី ៕
ដោយ៖ភារ៉ា ដង្កោ
