សារព័ត៌មាន នគរវត្ត តែងតែនាំមុខគេជានិច្ច
ខេត្តព្រៃវែង៖ បេីតាមការការបញ្ជាក់ពីលោក ស សុខា រដ្ឋលេខាធិការក្រសួងអប់រំយុវជន និងកីឡា នៅលេីបណ្ដាញសង្គមហ្វេសប៊ុកផ្ទាល់ខ្លួន បានឲ្យដឹងថា សមាជិកក្រុមការងារ ស.ស.យ.ក. លោកស្រី ខៀវ ធាវី ក្រុមការងារចុះជួយស្រុកស្វាយអន្ទរ តំណាងលោក ទូច វណ្ណៈ ប្រធានក្រុមការងារ ស.ស.យ.ក. ចុះជួយស្រុកស្វាយអន្ទរ និងក្រុមការងារ ព្រមទាំង ស.ស.យ.ក. ស្រុក នៅព្រឹកថ្ងៃទី២៦ ខែកុម្ភៈ ឆ្នាំ២០២១នេះ បាននាំយកថវិកាប្រចាំខែរបស់លោក និងក្រុមគ្រួសារចំនួន ១០០ដុល្លារ និងអង្ករ ២៥គីឡូក្រាម ប្រគល់ជូនក្មួយកំព្រាឪពុកម្តាយពីរនាក់បងប្អូន នៅក្នុងភូមិឫស្សីធ្លក ឃុំអង្គរទ្រេត ស្រុកស្វាយអន្ទរ សម្រាប់ផ្គត់ផ្គង់ជីវភាពប្រចាំថ្ងៃ ។
ក្នុងសំណេររបស់លោក ស សុខា បានបញ្ជាក់ថា ដោយក្តីអាណិតជាពន់ពេកចំពោះក្មួយកំព្រាឪពុកម្តាយទាំងពីរនាក់បងប្អូន ខ្ញុំ និងក្រុមគ្រួសារ សម្រេចជួយឧបត្ថម្ភថវិកាប្រចាំខែ ចំនួន ១០០ដុល្លារ ក្នុង ១ខែជារៀងរាល់ខែ។ សម្រាប់ខែកុម្ភៈនេះ ជាខែទី៣ ហើយ ដែលក្រុមការងារបាននាំយកថវិកាប្រចាំខែរបស់ខ្ញុំ និងក្រុមគ្រួសារ ទៅប្រគល់ជូនក្មួយកំព្រាទាំងពីរ ។
រដ្ឋលេខាធិការក្រសួងអប់រំរូបនេះ បន្ថែមថា ក្មួយកំព្រាទាំងពីរនាក់បងប្អូន កូនស្រីច្បង អាយុ ៥ឆ្នាំ និងកូនប្រុសប្អូន អាយុ ៣ខែ ត្រូវបានឪពុកម្តាយស្លាប់ចោល កាលពីថ្ងៃទី១៨ ខែវិច្ឆិកា ឆ្នាំ២០២០កន្លងទៅ ដោយឧបទ្ទវហេតុឆក់ខ្សែភ្លើង បណ្តាលឲ្យស្លាប់ទាំងពីរនាក់ប្តីប្រពន្ធ ។
បច្ចុប្បន្នក្មេងទាំងពីរ រស់នៅជាមួយជីតាសាច់ឆ្ងាយ ក្នុងភូមិឃុំខាងលើ៕ដោយ៖សហការី
