បុរសម្នាក់មកពីបញ្ចូលទឹកស្រែប្រាំងត្រូវរថយន្តដឹកដំឡូងមីបុកស្លាប់

ខេត្តបន្ទាយមានជ័យ៖ បុរសម្នាក់ត្រូវរថយន្តដឹកដំឡូងមីបុកម៉ូតូបណ្តាលឲ្យស្លាប់ ខណៈជិះម៉ូតូមកពីបញ្ចូលទឹកស្រែប្រាំង នៅវេលាម៉ោង១១យប់ថ្ងៃទី១ ខែមីនា ឆ្នាំ២០២១ នៅលើកំណាត់ផ្លូវជាតិលេខ២៦៨ A ​ខាងត្បូងស្ពានគោករំចេក ចម្ងាយ២០០ម៉ែត្រ ស្ថិតក្នុង ភូមិគោករំចេក ឃុំស្រះជីក ស្រុកភ្នំស្រុក ។
ជនរងគ្រោះមាន ឈ្មោះឈឿន ប្រុស ភេទប្រុសអាយុ៣១ឆ្នាំ រស់នៅភូមិស្រះឈូកខាងកើត ឃុំស្រះជីក ស្រុកភ្នំស្រុក ។នគរបាលមូលដ្ឋាននគរបាលក្នុងមូលដ្ឋានប្រាប់ថាមុនពេលកើតហេតុជនរងគ្រោះបានបើកម៉ូតូម៉ាកហុងដាឌ្រីម ធុនសេ១២៥ ពណ៌ខ្មៅស៊េរីឆ្នាំ២០១១ ពាក់ស្លាកលេខ ប.មានជ័យ 1E.9205​ មកពីបញ្ចូលទឹកស្រែ ប្រាំងពីត្បូងទៅជើងបើកមកដល់ចំណុចកើតហេតុស្រាប់តែមានរថយន្តធុនធំ១គ្រឿងម៉ាកហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ- 3C.4649 ដឹកដំឡូងមី​ ធ្វើដំណើរច្រាសទិសគ្នា ពីជើងទៅត្បូងស្រាប់តែរ៉េចង្កូតទៅបុកម៉ូតូនិងកិនពីលើទៀតបណ្តាលឲ្យអ្នកបើកម៉ូតូស្លាប់នៅកន្លែងតែម្ដង។ ចំណែកអ្នកអ្នកបើករថយន្តក្រោយពីកើតហេតុ បានរត់គេចខ្លួន បន្សល់ទុកតែរថយន្តនៅកន្លែងកើតហេតុ ។
ដមត្ថកិច្ចបន្ថែមថាករណីគ្រោះថ្នាក់ចរាចរណ៍នេះ មកពីអ្នកបើកម៉ូតូមិនប្រកាន់ស្តាំហើយជិះម៉ូតូមានល្បឿនលឿន។  ក្រោយពីកើតហេតុហើយរថយន្តនិងម៉ូតូនគរបាលយកមករក្សាទុកនៅអធិការដ្ឋាន នគរបាលស្រុកភ្នំស្រុករងចាំធ្វើការដោះស្រាយនៅពេលក្រោយ។សពជនរងគ្រោះប្រគល់ជូនក្រុមគ្រួសារយកទៅចាត់ចែងធ្វើបុណ្យតាមប្រពៃណី៕

ដោយ៖វណ្ណា