សារព័ត៌មាន នគរវត្ត តែងតែនាំមុខគេជានិច្ច
នៅថ្ងៃទី ៥ខែមីនា នៅតំបន់ជាច្រើនក្នុងប្រទេសមីយ៉ាន់ម៉ាបានដាច់ភ្លើងជាទ្រង់ទ្រាយធំ ក្នុងពេលដែលមានបាតុកម្មកើតឡើងនៅគ្រប់ទិសទី ។ មូលហេតុជាបឋមគឺដោយសារតែមានបញ្ហាបច្ចេកទេស។
មន្ត្រីនៅទីក្រុងYangon បានឲ្យដឹងថា «ការដាច់ភ្លើងគឺដោយសារតែបញ្ហាប្រព័ន្ធ យើងមិនបានផ្តាច់ភ្លើងឡើយ ហើយនឹងមានមកវិញនៅយប់នេះ ក្រោយក្រុមអ្នកជំនាញ ជួសជុលរួច»។
ពលរដ្ឋនៅទីក្រុង Naypyktaw រហូតដល់ទីក្រុង Yangon និង Mawlamyine បានឲ្យដឹងថា អគ្គិសនីបានដាច់តាំងពីល្ងាចថ្ងៃទី៥ខែមីនា។ ការដាច់ភ្លើងកើតឡើងក្រោយពីមានបាតុកម្មប្រឆាំងការដឹកនាំដោយយោធា ។
កម្លាំងទាហានមីយ៉ាន់ម៉ា បានចាប់ខ្លួនលោកស្រីអោងសាន ស៊ូជី និងប្រធានាធិបតីព្រមទាំងមន្ត្រីជាន់ខ្ពស់ជាច្រើនរូបដោយចោទប្រកាន់ថា មានសកម្មភាពបន្លំនៅក្នុងការបោះឆ្នោតកាលពីខែវិច្ឆិកា ឆ្នាំ២០២០។
តាមរបាយការណ៍របស់អង្គការសហប្រជាជាតិ មកទល់ពេលនេះមានមនុស្ស៥៤នាក់ស្លាប់ និងជាង១៧០០នាក់ ត្រូវកម្លាំងទាហានចាប់ខ្លួន ចាប់តាំងពីការធ្វើរដ្ឋប្រហារមកទល់ពេលនេះ។ ទោះបីមានការប្រើហិង្សាបង្ក្រាប តែពលរដ្ឋមីយ៉ាន់ម៉ានៅតែបន្តធ្វើបាតុកម្មប្រឆាំងយោធានៅគ្រប់ទិសទីក្នុងប្រទេសនេះ៕
ដោយ ៖ធីរីណា
ការដាច់ភ្លើងទ្រង់ទ្រាយធំនៅមីយ៉ាន់ម៉ានៅថ្ងៃទី ៥ ខែមីនា។ (រូបភាព៖ Twitter)
