សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ បុរសម្នាក់បានស្លាប់ភ្លាមនៅនឹងកន្លែង ខណៈបើកបរម៉ូតូខ្វះការប្រុងប្រយ័ត្នទៅបុកគោយន្តកន្ត្រៃដឹកក្ដារបន្ទះមួយគ្រឿងពីក្រោយយ៉ាងពេញទំហឹងបង្កការភ្ញាក់ផ្អើលដល់អ្នកភូមិទាំងយប់។
ហេតុការណ៍នេះបានកើតឡើងកាលពីវេលាម៉ោង៧និង១៥នាទីយប់ថ្ងៃទី៨ខែមីនាឆ្នាំ២០២១ ស្ថិតនៅលើផ្លូវជាតិលេខ១៣ត្រង់ចន្លោះគីឡូម៉ែត្រលេខ៤៨និង៤៩ ក្នុងភូមិវត្ត ឃុំត្រស់ ស្រុករមាសហែក។
សមត្ថកិច្ចនគរបាលស្រុកបានឲ្យដឹងថាបុរសដែលស្លាប់មានឈ្មោះ មុី ហ៊ា អាយុ៣៦ឆ្នាំ មុខរបរកសិករ រស់នៅភូមិបឹង ឃុំត្រស់ ស្រុករមាសហែក ជិះម៉ូតូម៉ាកDH88 ពណ៌ក្រហម អត់ស្លាកលេខបានខូចខាតយ៉ាងដំណំ។
ចំណែកអ្នកបើកគោយន្តកន្ត្រៃដឹកក្ដារបន្ទះមិនត្រូវបានស្គាល់ឈ្មោះនោះទេព្រោះក្រោយកើតហេតុបានរត់គេចខ្លួន
បាត់ភ្លាមៗ។
បើតាមអ្នកភូមិបានឱ្យដឹងថា មុនពេលកើតហេតុគេឃើញបុរសរងគ្រោះជិះម៉ូតូមួយគ្រឿងម៉ាកDH៨៨ ពណ៌ក្រហម អត់ស្លាកលេខនៅលើផ្លូវជាតិលេខ១៣ត្រង់ចន្លោះគីឡូម៉ែត្រលេខ៤៨និង៤៩ ក្នុងទិសដៅពីជើងទៅត្បូងដោយប្រើប្រាស់ល្បឿនលឿនខ្វះការប្រុងប្រយ័ត្នទៅបុកគោយន្តកន្ត្រៃមួយគ្រឿង ម៉ាកTOTOដឹកក្ដារបន្ទះចំនួន៥៥សន្លឹក ពីក្រោយយ៉ាងពេញទំហឹងលាន់សូរដូចរន្ទះបណ្ដាលឱ្យស្លាប់ភ្លាមៗនៅនឹងកន្លែងកើតហេតុបង្កការភ្ញាក់ផ្អើលដល់អ្នកភូមិទាំងយប់។
ក្រោយកើតហេតុសមត្ថកិច្ចបានមកដល់ហើយធ្វើការវាស់វែង និងបានប្រគល់សពជូនក្រុមគ្រួសារយកទៅធ្វើបុណ្យតាមប្រពៃណីទាំងក្ដុកក្ដួលបំផុត។
សមត្ថកិច្ចបានបញ្ជាក់ពីមូលហេតុនៃគ្រោះថ្នាក់ចរាចរណ៍នេះថា បណ្តាលមកពីអ្នកបើកបរម៉ូតូប្រើប្រាស់ល្បឿនលឿនខ្វះការប្រុងប្រយ័ត្ន៕
ដោយ៖យឹម សុថាន
