ក្រោយការប៉ះទង្គិចគ្នាទ្រង់ទ្រាយធំ មួយប្រ៉ាវអភិបាលខេត្តកំពតកោះហៅ ឧកញ៉ា សូ ងួន និងគ្រួសារកងទ័ពមកដោះស្រាយដោយសន្តិវិធី

ចែករំលែក៖

ខេត្តកំពត ៖ កាលពីថ្ងៃទី១៤ និង១៥ ខែមីនា កន្លងទៅថ្មីៗនេះ មានការប៉ះទង្គិចគ្នាលក្ខណៈទ្រង់ទ្រាយធំ មួយប្រ៉ាវ រវាងក្រុមឆ្មាំការពារដីឲ្យក្រុមហ៊ុនលោក ឧកញ៉ា សូ ងួន រាប់រយនាក់ ជាមួយនឹងក្រុមគ្រួសារកងទ័ពសមាហរណកម្មការពារកោះឆ្នេររាប់រយនាក់ដែរ ។ ទីតាំងដីទំនាស់ស្ថិតក្នុងភូមិដុំផ្ដៅ ឃុំត្រពាំងភ្លាំង ស្រុកឈូក ខេត្តកំពត ។

ក្រោយកិច្ចប្រជុំទល់មុខគ្នា រវាភាគីទាំងសងខាង ដោយមានការចូលរួមពីមន្ត្រីមន្ទីរជំនាញ និងអាជ្ញាធរពាក់ព័ន្ធ ដើម្បីពិនិត្យពិភាក្សា រកដំណោះស្រាយ លើករណីទំនាស់ដីធ្លី ក្រុមហ៊ុន វើលទ្រីស្តារ របស់លោកឧកញ៉ា សូ ងួន ជាមួយគ្រួសារកងទ័ពសមាហរណកម្មការពារកោះឆ្នេរ មានទីតាំងដី ស្ថិតក្នុងភូមិដុំផ្ដៅ ឃុំត្រពាំងភ្លាំង ស្រុកឈូក លោក ជាវ តាយ អភិបាលខេត្តកំពត បានសំណូមពរឲ្យអនុវត្តតាមវិធានការបីចំណុច ៖
ទី១- សូមក្រុមហ៊ុនអនុវត្តសកម្មភាព នៅក្នុងដីរបស់ក្រុមហ៊ុនដែលបានចុះបញ្ជីរួច ហើយមិនមានទំនាស់ ចំណែកដីនៅក្រៅការចុះបញ្ជី សូមក្រុមហ៊ុនរក្សាទុក នឹងផ្អាកសកម្មភាពដើម្បីរកដំណោះស្រាយបន្តនៅលើទីតាំងដីជាក់ស្ដែងបន្ថែមទៀត។
ទី២- សូមឲ្យក្រុមការងារបន្តការចុះសិក្សាទីតាំងដីឲ្យច្បាស់លាស់ តាម ស.ជ.ណ របស់រាជរដ្ឋាភិបាល ដែលបានសម្រេចជូនគ្រួសារកងទ័ព ដែលបានដាក់ពាក្យស្នើសុំកន្លងមក យកទៅជូនរាជរដ្ឋាភិបាល។ ហើយក្រុមការងារក៏ត្រូវរៀបចំឯកសារ តាមការលើកឡើងរបស់តំណាងក្រសួងកសិកម្ម ដាក់ស្នើជូនទៅក្រសួងកសិកម្ម ដើម្បីសម្រេចដោះស្រាយឲ្យបានឆាប់ចប់ជូនគ្រួសារកងទ័ព។
ទី៣- អភិបាលខេត្តសូមឲ្យក្រុមហ៊ុនឧកញ៉ា សូ ងួន និងគ្រួសារកងទ័ព រួមគ្នាដោះស្រាយ ដោយសន្តិវិធីតាមលក្ខណៈ ផ្លូវច្បាប់ ពិសេសមិនត្រូវបង្កទំនាស់រហូតផ្ទុះអំពើហិង្សាជាដាច់ខាត ដែលនាំឱ្យប្រឈមនឹងការទទួលខុសត្រូវ ចំពោះមុខច្បាប់។

តាមការអះអាងពីតំណាងគ្រួសារយោធិនថាដីធ្លីដែលរាជរដ្ឋាភិបាលធ្វើប្រទានកម្មជូនគ្រួសារកម្លាំងទ័ពសមាហរណកម្ម ការពារកោះឆ្នេរស្ថិតក្នុងឃុំត្រពាំងភ្លាំង សរុបប្រមាណជាង១០០០ហិចតា ។ ប៉ុន្តែសុំកាន់កាប់ជាក់ស្ដែង តែប្រមាណ៧៤០ហិកតាទេ ក្នុងនោះ បានចេញប័ណ្ណកម្មសិទ្ធិមួយចំនួន ខណៈដែលដីប្រមាណ៤៧៨ហិចតា នៅមានទំនាស់ជាមួយក្រុមហ៊ុនសូ ងួន រហូតមកដល់សព្វថ្ងៃ។
កន្លងទៅសន្តិសុខក្រុមហ៊ុន សូ ងួន បានចាប់ប្រជាពលរដ្ឋវាយខ្នោះ និងរុះរើផ្ទះ៕