សារព័ត៌មាន នគរវត្ត តែងតែនាំមុខគេជានិច្ច
ខេត្តពោធិ៍សាត់ ៖ លោក ម៉ៅ ធនិន អភិបាលនៃគណៈអភិបាលខេត្តពោធិ៍សាត់ ដោយអញ្ជើញចូលរួមលោកអភិបាលរង មន្រ្តីសាលាខេត្ត ប្រធាន អនុប្រធានមន្ទីរពាក់ព័ន្ធ មន្រ្តីសាលាក្រុង.ស្រុក ឃុំ.សង្កាត់ កងកម្លាំង និងបងប្អូនម្ចាស់អាជីវកម្ម សណ្ឋាគារ ផ្ទះសំណាក់ ភោជនីយដ្ឋាន។ ល។ បើកកិច្ចប្រជុំបន្ទាន់មួយ ដើម្បីទប់ស្កាត់ការរីករាលដាលជំងឺកូវីដ-១៩ បើទោះជាជំងឺដ៏កាចសាហាវនេះពុំទាន់មានបញ្ហានៅខេត្តពោធិ៍សាត់ ។
កិច្ចប្រជុំបន្ទាន់ពាក់ព័ន្ធការរីករាលដាលជំងឺកូវីដ-១៩ខាងលើ ធ្វើឡើងនារសៀលថ្ងៃទី២៥ ខែមីនា ឆ្នាំ២០២១ នេះ ស្ថិតនៅវេទិកាដោះស្រាយទុក្ខលំបាកបងប្អូនប្រជាពលរដ្ឋ ក្នុងបរិវេណសាលាខេត្តពោធិ៍សាត់ ។
លោក ម៉ៅ ធនិន អភិបាលខេត្តពោធិ៍សាត់ និងជាប្រធានគណៈកម្មការប្រយុទ្ធប្រឆាំងជំងឺកូវីដ-១៩ លើកឡើងថា ការបើកកិច្ចប្រជុំបន្ទាន់នេះ ដេីម្បីចូលរួមទប់ស្កាត់ការរីករាលដាលនៃជំងឺកូវីដ-១៩ ចូលក្នុងសហគមន៍បើទោះជានៅខេត្តរបស់យើងពុំទាន់មានជំងឺដ៏កាចសាហាវនេះក៏ដោយ ដើម្បីជៀសគេចអំពីជំងឺនេះសូមបងប្អូនអនុវត្តប្រសាសន៍រាជរដ្ឋាភិបាលកម្ពុជា និងក្រសួងសុខាភិបាល ៣ការពារនិង ៣កុំ យើងដឹងហើយថាការឆ្លងជាសហគមន៍ព្រឹត្តិការណ៍ ២០កុម្ភៈ ។
ក្នុងឱកាសនោះដែរខណៈបច្ចុប្បន្នភាពបែបនេះ លោកអភិបាល បានជ្រាបអំពីទុក្ខលំបាករបស់បងប្អូន និងបានផ្ដល់ឱកាសឲ្យបងប្អូនលើកឡើងអំពីបញ្ហាផ្សេងៗដែលកំពុងកើតមាន ដើម្បីរិះរកគន្លឹះជួយដោះស្រាយគ្នា ពាក់ព័ន្ធការទប់ស្កាត់ការរីករាលដាលនៃជំងឺកូវីដ-១៩ ៕ ដោយ៖ បុឹម ពិន
