សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បេីយោងតាមការបង្ហោះនៅលេីបណ្ដាញសង្គមហ្វេសប៊ុករបស់រដ្ឋបាលខណ្ឌដូនពេញ បានឲ្យដឹងថា ក្រុមការងាររបស់គ្រូពេទ្យបង្អែកមិត្តភាពកម្ពុជា-ចិនសែនសុខ នៅវេលាម៉ោង៤និង១៥នាទីរសៀលថ្ងៃទី២៨ ខែមីនា ឆ្នាំ២០២១នេះ បានចុះមកយកសំណាកនៅឃ្លាំងលក់រថយន្តលេខ១២ (ទល់មុខទីស្តីការគណៈរដ្ឋមន្ត្រី) ស្ថិតនៅក្នុងសង្កាត់ស្រះចក ខណ្ឌដូនពេញ ដែលប្រពន្ធថៅកែឃ្លាំង និងកូនប្រុសមានវិជ្ជមានកូវីដ-១៩ (កូនប្រុសអាយុ ៣៩ឆ្នាំ)។
ដោយឡែកប្តីរបស់គាត់ ក៏បានចេញចូលឃ្លាំងនេះរាល់ថ្ងៃ កំឡុងពេលដែលគាត់បានយកសំណាកមិនទាន់ចេញលទ្ធផលកំពុងធ្វើចត្តាឡីស័កនៅគេហដ្ឋាននៅឡើយ។
សូមបញ្ជាក់ថានៅក្នុងឃ្លាំងរថយន្តនេះ មានអ្នកកំពុងបំពេញការងារចំនួន០៣នាក់ (ក្នុងនោះអ្នកមានភាគហ៊ុនជាថៅកែ០១នាក់)។
សូមជម្រាបដែរថា បើយោងតាមសេចក្តីជូនដំណឹងរបស់អនុគណៈកម្មការស្រាវជ្រាវជំងឺកូវីដ-១៩ ក៏បានបញ្ជាក់ថា ប្រសិនបើមានរោគសញ្ញាដូចជា៖ គ្រុនក្ដៅ, ក្អក, កណ្ដាស់, ឈឺបំពង់ក ឬដកដង្ហើមខ្លីៗ ឬ សង្ស័យ សូមមេត្តាប្រញាប់ ទៅធ្វេីតេស្តរកមេរោគ #កូវីដ-១៩ (#COVID-19) ដែលមានទីតាំងមានដូចខាងក្រោម៖
-វិទ្យាល័យបាក់ទូក
-វិទ្យាល័យបឹងត្របែក
-មណ្ឌលសុខភាពចាក់អង្រែក្រោម
-មន្ទីរពេទ្យខ្មែរ-សូវៀត
-សាលាបឋមសិក្សា សុភមង្គល (ក្រោយផ្សារស៊ិន ជូរី បណ្តោះអាសន្ន)
ដោយឡែកមន្ទីរពេទ្យបង្អែកនៅតាមបណ្តាខេត្តនានា សម្រាប់អ្នកដែលគ្មានរោគសញ្ញា សូមដាក់ខ្លួនដាច់ដោយឡែក និងតាមដានសុខភាពរបស់ខ្លួនរយៈពេល ១៤ ថ្ងៃ ចាប់ពីថ្ងៃដែលអ្នកបានប៉ះពាល់ ឬទៅទីកន្លែងនោះ៕ដោយ៖សហការី
