សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ លោក ឌី រ័ត្នខេមរុណ អភិបាលរងខណ្ឌមានជ័យ នៅព្រឹកថ្ងៃទី៨ មេសា ឆ្នាំ២០២១នេះ បានមានប្រសាសន៍ថា ក្រោយរកឃើញករណីឆ្លងជំងឺកូវីដ-១៩ លេីកម្មករនិយោប្រមាណជិត ៥០នាក់ នៅក្នុងរោងចក្រកាត់ដេរយីហោ” ឌីន ហាន” ត្រូវបានអាជ្ញារធរសាលារាជធានីភ្នំពេញ សម្រេចផ្អាកបណ្តោះអាសន្នរយៈពេល១៤ថ្ងៃ គិតចាប់ពីយប់ថ្ងៃទី៧ ខែមេសាម្សិលមិញនេះ ដើម្បីឲ្យកម្មករ កម្មាការិនីមកធ្វើតេស្តរកកូវីដ១៩, ខណៈដែលកម្មករនិយោជិតបម្រើការងារនៅរោងចក្រនេះ សរុបចំនួនជាង ២,៥០០នាក់។
លោក ឌី រ័ត្នខេមរុណ មានប្រសាសន៍បន្ថែមទៀតថា រោងចក្រកាត់ដេរយីហោ” ឌីន ហាន” ដែលមានទីតាំងស្ថិតនៅផ្លូវឌួងងៀប២ ភូមិថ្មី សង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ គិតមកទល់ពេលនេះ ក្រុមគ្រូពេទ្យកំពុងបន្តយកសំណាកបងប្អូនកម្មករ រួមទាំងបុគ្គលិក។
អភិបាលរងខណ្ឌរូបនេះ បានបន្តថា ការផ្អាកបណ្តោះអាសន្ន ១៤ថ្ងៃនេះ ដើម្បីឲ្យបងប្អូនកម្មករដែលយកសំណាកនេះ គឺគ្រប់ចំនួនហើយឲ្យគាត់ធ្វើចត្តាឡីស័កនៅឯបន្ទប់ផ្ទះជួល ឬផ្ទះរបស់គាត់នៅតាមអាស័យដ្ឋានបច្ចុប្បន្ន គឺតម្រូវឲ្យធ្វើចត្តាឡីស័ករយៈពេល ១៤ថ្ងៃ រងចាំលទ្ធផលដែលក្រុមគ្រូពេទ្យបានបង្ហាញថា តើកម្មកររូបណាដែលមានវិជ្ជមាន នោះគ្រូពេទ្យនឹងយកទៅព្យាបាល។
ដោយឡែកលោក ឃួង ស្រេង អភិបាល នៃគណៈអភិបាលរាជធានីភ្នំពេញ ទាក់ទងនឹងបញ្ហាខាងលើនេះដែរ ក៏បានអំពាវនាវដល់កម្មករនិយោជិតទាំងអស់ដែលបម្រើការនៅរោងចក្រយីហោ” ឌីន ហាន” ត្រូវមកយកសំណាកដើម្បីពិនិត្យជាបន្ទាន់ បើមិនដូច្នេះទេ មិនអនុញ្ញាតឲ្យចូលធ្វើការឡើយ។
ជាមួយគ្នានេះ លោកអភិបាលរាជធានីភ្នំពេញ ក៏បានអំពាវនាវដល់បងប្អូនសាច់ញាតិ ឬមិត្តភ័ក្ររបស់កម្មករនិយោជិតទាំងនោះ ត្រូវជួយណែនាំឲ្យធ្វើចត្តាឡីស័ក (នៅដាច់ដោយឡែក) រយៈពេល ១៤ថ្ងៃ តាមចំនួនកំណត់ ហើយបើធ្វើមិនបានត្រឹមត្រូវទេ នឹងទទួលទោសពិន័យតាមច្បាប់ ជាក់ជាមិនខាន៕ដោយ៖ស តារា
