សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់បានមកដាក់ពាក្យបណ្តឹងដើម្បីឱ្យសមត្ថកិច្ចជួយធ្វើអន្តរាគមន៍ក្រោយពេលចោរលួចយកម៉ូតូរបស់គាត់ទៅបាត់ដោយសុវត្ថិភាព ខណៈគាត់បើកមកចតទុកចោលរួចយកលុយទៅបង់ឲ្យម្ចាស់ផ្ទះថ្លៃបន្ទប់ជួល។
សមត្ថកិច្ចបានឱ្យដឹងថា ជនរងគ្រោះមានឈ្មោះ សូត សុខហោ ភេទប្រុស អាយុ៤០ឆ្នាំ មុខរបរជាជាងកាត់ដេរ ស្នាក់នៅភូមិស្នែងរលើង សង្កាត់ទឹកថ្លា ខណ្ឌសែនសុខ។
បើតាមសម្តីជនរងគ្រោះបានឱ្យដឹងថា នៅវេលាម៉ោង១២និង៣០នាទីរសៀលថ្ងៃទី៨ ខែមេសា ឆ្នាំ២០២១ រូបគាត់បានជិះម៉ូតូចេញពីបន្ទប់របស់គាត់យកលុយទៅបង់ឲ្យម្ចាស់ផ្ទះជួលនៅម្តុំខាងក្រោយផ្សារដីហុយ ក្នុងភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ ហើយក្រោយពេលដែលរូបគាត់ចាក់សោម៉ូតូចតទុករួចយកលុយទៅឲ្យម្ចាស់ផ្ទះជួលរួចមក ស្រាប់តែមានជនសង្ស័យ២នាក់
ជិះម៉ូតូម៉ាកហុងដាសេ១២៥មួយគ្រឿងពណ៌ខ្មៅ ពាក់ស្លាកលេខភ្នំពេញ 1IP-6277 មកធ្វើសកម្មភាពកាច់.កម៉ូតូរបស់គាត់ម៉ាកស៊ុយហ្ស៊ុយគីឡែត ពណ៌ស ពាក់ស្លាកលេខភ្នំពេញ1FI-2787យកទៅបាត់ ពេលនោះរូបគាត់បានដេញចាប់ជនសង្ស័យទាំង២នាក់ដែរ តែជនសង្ស័យបានព្យាយាមជិះម៉ូតូរបស់គាត់គេចខ្លួនបាត់ស្រមោលដោយសុវត្ថិភាព។
បន្ទាប់ពីកើតហេតុម្ចាស់ម៉ូតូបានឲ្យកូនម្ចាស់ផ្ទះជួលដឹកមកដាក់ពាក្យបណ្តឹងនៅប៉ុស្តិ៍នគរបាលរដ្ឋបាលសង្កាត់ភ្នំពេញថ្មី ដើម្បីឲ្យសមត្ថកិច្ចជួយស្រាវជ្រាវស្វែងរកម៉ូតូ និងជនសង្ស័យយកមកផ្តន្ទាទោសទៅតាមច្បាប់៕
ដោយ៖ជ្រោយពេជ្រ
