សារព័ត៌មាន នគរវត្ត តែងតែនាំមុខគេជានិច្ច
ខេត្តត្បូងឃ្មុំ ៖ ក្នុងអំឡុងពេលសមត្ថកិច្ច កំពុងមមាញឹកការពារនិងពង្រឹងវិធានការ ក្រសួងសុខាភិបាលលេីបញ្ហារីករាលដាលជំងឺកូវីដ-១៩ តែបែរជាមានជនឆ្លៀតឱកាសលួចចរាចរថ្នាំញៀន ទីបំផុតត្រូវបានសមត្ថកិច្ចឃាត់ខ្លួនរួមជាមួយវត្ថុតាងមកកាន់អធិការដ្ឋាននគរបាលស្រុកពញាក្រែក ដើម្បីធ្វើការសាកសួរតាមនីតិវិធី ។
ប្រភពព័ត៌មានពីសមត្ថកិច្ចឱ្យដឹងថា ជនសង្ស័យត្រូវបានឃាត់ខ្លួននៅថ្ងៃអាទិត្យ ទី១៨ ខែមេសា ឆ្នាំ២០២១ វេលាម៉ោង១៦:៤០នាទីល្ងាច ដោយកម្លាំងប្រឆាំងគ្រឿងញៀន សហការជាមួយកម្លាំងព្រហ្មទណ្ឌ នៃអធិការដ្ឋាននគរបាលស្រុកពញាក្រែក ខណៈចុះល្បាតត្រួតពិនិត្យរដ្ឋបាលចំហនៅចំណុចព្រៃចម្ការកៅស៊ូ ក្នុងភូមិហួចកើត ឃុំក្រែក ស្រុកពញាក្រែក ខេត្តត្បូងឃ្មុំ ។
សមត្ថកិច្ចបន្តថា នៅពេលនោះក៏បានជួបប្រទះនឹងមុខសញ្ញាម្នាក់ឈ្មោះ ចាន់ ដាលីន ភេទប្រុស អាយុ១៧ឆ្នាំ ស្នាក់នៅបណ្តោះអាសន្ន នៅភូមិអំពិល ឃុំកក់ ស្រុកពញាក្រែក ខេត្តត្បូងឃ្មុំ កំពុងនៅក្នុងចម្ការកៅស៊ូមួយកន្លែង ស្ថិតក្នុងភូមិហួចកើត ឃុំក្រែក ស្រុកពញាក្រែក ខេត្តត្បូងឃ្មុំ ហើយសមត្ថកិច្ចយើងបានឱ្យឈ្មោះ ចាន់ ដាលីន យកកាបូបដៃពីក្នុងហោប៉ៅខោមកមើល ។
ក្រោយឃាត់ខ្លួនសមត្ថកិច្ចបានធ្វើការត្រួតពិនិត្យរកឃើញម្សៅក្រាមពណ៌សថ្លាសង្ស័យជាថ្នាំញៀនចំនួន៨កញ្ចប់ ដែលឈ្មោះ ចាន់ ដាលីន លាក់ទុកក្នុងកាបូបលុយ ហើយសមត្ថកិច្ចយើងបាននាំយកវត្ថុតាង និងជនសង្ស័យខាងលើមកកាន់អធិការដ្ឋាននគរបាលស្រុកពញាក្រែក ដើម្បីធ្វើការសាកសួរ ចងក្រងសំណុំរឿងតាមនីតិវិធី៕
ដោយ ៖ វណ្ណៈ
