សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ចាម៖ នៅព្រឹកថ្ងៃទី២២ ខែមេសា ឆ្នាំ២០២១ រដ្ឋបាលខេត្តកំពង់ចាម មានកិត្តិយសសូមជម្រាបជូនដល់សាធារណជន បងប្អូនប្រជាពលរដ្ឋដែល រស់នៅភូមិថ្មី( ខ ) ឃុំរកាគយ ស្រុកកងមាស និងបងប្អូនរស់នៅក្នុងខេត្តកំពង់ចាម អំពីករណីរកឃើញវិជ្ជមាន កូវីដ-១៩ បុរសជនជាតិខ្មែរ ឈ្មោះ ថេង កុសល អាយុ ២៧ ឆ្នាំ នៅភូមិថ្មី(ខ) ឃុំរកាគយ ស្រុកកងមាស។
នៅថ្ងៃទី២២ ខែមេសា ឆ្នាំ២០២១នេះ រដ្ឋបាលខេត្តកំពង់ចាម បានទទួលលទ្ធផលបញ្ជាក់ពីវិទ្យាស្ថាន សុខភាពសាធារណៈពីករណីវិជ្ជមានកូវីដ-១៩ លើអ្នកជំងឺកូវីដ-១៩រូបនេះ រដ្ឋបាលខេត្តកំពង់ចាម បានចាត់ ឱ្យមន្ទីរសុខាភិបាលនៃរដ្ឋបាលខេត្ត បានបញ្ចូនអ្នកជំងឺ ពីមណ្ឌលចត្តាឡីស័ករបស់រដ្ឋបាលខេត្ត មកសម្រាក ព្យាបាលនៅមន្ទីរពេទ្យខេត្តកំពង់ចាម និងបន្តស្រាវជ្រាវរកអ្នកដែលប៉ះពាល់ដោយផ្ទាល់ និងដោយប្រយោល នឹងករណីនេះបន្ថែមទៀត។
ជាលទ្ធផលបឋមក្រុមការងារបានស្រាវជ្រាវរកឃើញ៖
១- អំពីប្រវត្តិដំណើរបុរសឈ្មោះ ថេង កុសល
ធ្វើការរោងចក្រសាន ស៊ឺង នៅកំបូល រាជធានីភ្នំពេញ (ស្នាក់នៅតែម្នាក់ឯង)។ ថ្ងៃទី១៤ ខែមេសា ឆ្នាំ២០២១ បានមកដល់ផ្ទះស្រុកកំណើត ដោយម៉ូតូ ជាមួយមិត្តភ័ក្ត
ដែលវិជ្ជមានកូវីដ-១៩ ឈ្មោះ អ៊ុក សាឌី។ ថ្ងៃទី១៤ ខែមេសា ឆ្នាំ ២០២១ ជួបជុំមិត្តភ័ក្រ ៧-៨នាក់ ទទួលទានគ្រឿងស្រវឹងនៅវាលស្រែ នៅថ្ងៃទី១៦ ខែមេសា ឆ្នាំ២០២១. ទៅអង្គុយលេងនៅវត្តពាមជីកង រយៈពេលប្រហែលកន្លះម៉ោង។ ចាប់ពីថ្ងៃទី១៦ ខែ មេសា ឆ្នាំ ២០២១ មកមិនបានទៅណាទៀតទេ.
ថ្ងៃទី១៨ ខែមេសា ឆ្នាំ ២០២១ ដាក់ឱ្យធ្វើចត្តាឡីស័ក នៅមណ្ឌលចត្តាឡីស័យរបស់រដ្ឋបាល ខេត្ត ដោយសារតែប៉ះពាល់ជាមួយអ្នកជំងឺកូវីដ-១៩ ឈ្មោះ អ៊ុក សាឌី។
២- អ្នកពាក់ព័ន្ធនឹងបុរសឈ្មោះ ថេង កុសល
ក- ប៉ះពាល់ដោយផ្ទាល់ ៖ ចំនួន ១៤នាក់ ត្រូវបានបញ្ជូនទៅមណ្ឌលចត្តាឡីស័ករដ្ឋបាលខេត្តនិងបន្តស្រាវជ្រាវបន្ថែមទៀត។
ខ- អ្នកប៉ះពាល់ដោយប្រយោល៖ ក្រុមការងារកំពុងបន្តការស្រាវជ្រាវរកអ្នកដែលប៉ះពាល់ ដោយប្រយោលនឹងករណីនេះបន្ថែមទៀត។
រដ្ឋបាលខេត្តកំពង់ចាម កំពុងបន្តស្វែងរកទីតាំង និងអ្នកប៉ះពាល់ជាមួយអ្នកជំងឺឈ្មោះ ថង កុសល បន្ថែមទៀត និងសូមអំពាវនាវដល់អ្នកពាក់ព័ន្ធនឹងបុរសរូបនេះ សូមទៅពិនិត្យសុខភាព និងយកសំណាក នៅមន្ទីរពេទ្យបង្អែកដែលស្ថិតនៅជិតផ្ទះ ឬត្រូវរាយការណ៍ជូនអាជ្ញាធរមូលដ្ឋានជាបន្ទាន់។
អាស្រ័យដូចបានជម្រាបជូនខាងលើ សូមបងប្អូនប្រជាពលរដ្ឋដែលរស់នៅភូមិថ្មី(ខ) ឃុំរកាគយ ស្រុកកងមាស មិត្តភ័ក្ត្រដែលទទួលទានគ្រឿងស្រវឹងនៅវាលស្រែជាមួយអ្នកជំងឺរូបនេះ និងបងប្អូនកម្មករ កម្មការិនី មិត្តភ័ក្ត្ររបស់ឈ្មោះ ថេង កុសល ដែលធ្លាប់ប្រាស្រ័យទំនាក់ទំនងត្រូវអនុវត្តឱ្យបានខ្ជាប់ខ្លួននូវ វិធានការការពារ ដោយឡែក អនុវត្តឱ្យបានខ្ជាប់ខ្លួននូវវិធានការការពារ ដោយឡែកបងប្អូនដែលមានហានិភ័យ ខ្ពស់ពាក់ព័ន្ធនឹងអ្នកជំងឺរូបនេះ ត្រូវតែអនុវត្តយ៉ាងម៉ឺងម៉ាត់តាមការណែនាំរបស់មន្ត្រីសុខាភិបាល ប្រកបដោយស្មារតីទទួលខុសត្រូវខ្ពស់ ដើម្បីការពារក្រុមគ្រួសារ និងសហគមន៍ឱ្យជៀសផុតពីជំងឺមហាប្រល័យនេះ៕
ដោយ ៖ សិលា
