សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ឆ្នាំង៖ បើតាមការបញ្ជាក់ពីលោកវេជ្ជបណ្ឌិត ប្រាក់ វ៉ុន ប្រធានមន្ទីរសុខាភិបាលខេត្តកំពង់ឆ្នាំង ដែលដកស្រង់ទិន្នន័យលទ្ធផលសំណាក នៅថ្ងៃទី២២ ខែមេសា ឆ្នាំ២០២១នេះថា៖ ប្រពន្ធ កូន គ្រួសារ និងអ្នកភូមិទាំង៤៨នាក់ ពាក់ព័ន្ធនឹងសពឈ្មោះ នូ ចុល ដែលបានស្លាប់ដោយសារកូវីដ-១៩ រហូតមកដល់ពេលនេះទទួលបានលទ្ធផលតេស្តលើកទី១ គឺអវិជ្ជមានទាំងអស់។
គួររម្លឹកថា កាលពីថ្ងៃទី២០ ខែមេសា ឆ្នាំ២០២១កន្លងទៅថ្មីៗនេះ ក្រុមគ្រូពេទ្យ នៃមន្ទីរសុខាភិបាលខេត្តកំពង់ឆ្នាំង បានចុះទៅប្រមូលក្រុមគ្រួសារ និងប្រជាពលរដ្ឋ ដែលបានពាក់ព័ន្ធនៅថ្ងៃបុណ្យសពរបស់ឈ្មោះ នូ ចុល មានទីលំនៅក្នុងភូមិព្រះរាមរង្សី ឃុំជ្រៃបាក់ ស្រុករលាប្អៀរ ខេត្តកំពង់ឆ្នាំង ដែលបានស្លាប់កាលពីវេលាម៉ោង ២ និង០០នាទីរំលងអាធ្រាត្រ ឈានចូលថ្ងៃទី១៩ ខែមេសា ឆ្នាំ២០២១ នៅក្នុងមន្ទីរពេទ្យបង្អែកខេត្តកំពង់ឆ្នាំង ដើម្បីយកទៅធ្វើចត្តាឡីស័ក និងតេស្តសំណាក។ ការរៀបចំបុណ្យសព ដោយសារតែពួកគាត់មិនដឹងថា ឈ្មោះ នូ ចុល កើតកូវីដ១៩ឡើយ។
លុះព្រឹកឡើងនៅវេលាម៉ោង ៨ និង០០នាទីព្រឹក ក្រុមគ្រូពេទ្យក៏បានចុះ ទៅយកសំណាកសពជនរងគ្រោះ បញ្ជូនទៅធ្វើតេស្តនៅរាជធានីភ្នំពេញ ដោយឧបករណ៍តេស្តរហ័ស (Rapid Test) និងទទួលបានលទ្ធផលនៅវេលាម៉ោង ៤ និង០០នាទីល្ងាច ថ្ងៃទី១៩ ខែមេសា ឆ្នាំ២០២១ ដែលលទ្ធផលបានបញ្ជាក់ថា សពជនរងគ្រោះមានវិជ្ជមានកូវីដ-១៩។
ដើម្បីដោះស្រាយបញ្ហាចំពោះមុខ នៅភូមិព្រះរាមរង្សី បន្ទាប់ពីដឹងថា សពជនរងគ្រោះឈ្មោះ នូ ចុល មានជំងឺកូវីដ-១៩ អាជ្ញាធរបាត់សម្រេចបិទភូមិនេះ ជាបណ្តោះអាសន្ត ចាប់ពីព្រឹកថ្ងៃទី២០ ខែមេសាតទៅ។
ដោយឡែក នៅថ្ងៃទី២០ ខែមេសា ឆ្នាំ២០២១ រដ្ឋបាលខេត្តកំពង់ឆ្នាំង ក៏បានសម្រេចបិទទីតាំង ៣កន្លែងទៀត ជាបណ្តោះអាសន្នចាប់ពីថ្ងៃទី២០ ខែមេសា ឆ្នាំ២០២១ ដោយសារពាក់ព័ន្ធនឹងព្រឹត្តិការណ៍ខាងលើនេះ មានដូចជា៖ ទីតាំង១; មន្ទីរសម្រាកព្យាបាលផ្សារឆ្នាំង ស្ថិតនៅក្នុងភូមិផ្សារលើ សង្ការផ្សារឆ្នាំង ក្រុងកំពង់ឆ្នាំង ខេត្តកំពង់ឆ្នាំង។ ទីតាំង២; វត្តទួលសទ្ធាសត្ថារាម ហៅវត្តភ្នំយោង ស្ថិតក្នុងភូមិទី៧ សង្កាត់ខ្សាម ក្រុងកំពង់ឆ្នាំង ខេត្តកំពង់ឆ្នាំង។ និងទីតាំង៣; ផ្សារព្រៃខ្មែរ ស្ថិតនៅក្នុងភូមិស្ពករាជ្យ ឃុំអណ្តូងស្នាយ ស្រុករលាប្អៀរ ខេត្តកំពង់ឆ្នាំង៕ដោយ៖សហការី
