សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ នគរបាលខណ្ឌទួលគោកនាំគ្នាភ័យខ្លាចនិងប្រុងប្រយ័ត្នដោយបាញ់អាល់កុលគ្រប់ៗគ្នា ក្រោយចាប់ខ្លួន ជនសង្ស័យឆក់ទូរស័ព្ទម្នាក់បញ្ជូនទៅកាន់អធិការដ្ឋាន ហើយត្រូវជនសង្ស័យប្រាប់ថាមិនស្រួលខ្លួនរយៈពេល៤ថ្ងៃមកហើយ រួចក៏បានវាស់កម្តៅមើលឃើញឡើងដល់៣៧.៥០អង្សា ។
ហេតុការណ៍ឃាត់ជនសង្ស័យពូកែខាងឆក់ប្លន់ម្នាក់នេះបង្កឱ្យមានការភ្ញាក់ផ្អើលឡើងនៅវេលាម៉ោងប្រមាណ១១ព្រឹកថ្ងៃទី២៣ ខែមេសា ឆ្នាំ២០២១ នៅចំណុចផ្លូវលេខ១៩២Z សង្កាត់ទឹកល្អក់ទី៣ ខណ្ឌទួលគោក រាជធានីភ្នំពេញ។
សមត្ថកិច្ចបានឱ្យដឹងថា ជនសង្ស័យរូបនោះមានឈ្មោះទូច ធី អាយុ៣២ឆ្នាំ ស្នាក់នៅម្តុំគល់ស្ពានស្ទឹងមានជ័យ ក្នុងភូមិទី៥ សង្កាត់ស្ទឹងមានជ័យ២ ខណ្ឌមានជ័យ រាជធានីភ្នំពេញ ។ ចំណែកនារីជាម្ចាស់ទូរស័ព្ទឈ្មោះវ៉ន សុខណា ភេទស្រី អាយុ៣៦ឆ្នាំ មុខរបរលក់បាយ មានលំនៅតាមផ្លូវលេខ២០២ ក្បែរកន្លែងកើតហេតុ។
ប្រភពព័ត៌មានបានឱ្យដឹងថា មុនពេលកើតហេតុនារីរងគ្រោះបានអង្គុយកាន់ទូរស័ព្ទនិយាយនៅចំណុចតាមផ្លូវឌឿងហែមលេខ ១៩២Z ក្រោយផ្ទះ ស្រាប់តែជនសង្ស័យមានគ្នា២នាក់ជិះម៉ូតូមួយគ្រឿងម៉ាកហុងដាឌ្រីម ពាក់ស្លាកលេខ ភ្នំពេញ 1BQ-6612 មកក្បែរ រួចជនម្នាក់ដែលជាអ្នកឌុបបានទះកំផ្លៀងនារីរងគ្រោះមួយដៃ ហើយម្នាក់ដែលជិះខាងក្រោយ(ជនសង្ស័យចាប់ខ្លួនបាន)ក៏ស្ទុះទៅឆក់យកទូរស័ព្ទបាន រួចព្យាយាមជិះម៉ូតូគេចខ្លួន រីឯជនរងគ្រោះនៅពេលជនសង្ស័យធ្វើសកម្មភាពឆក់យកទូរស័ព្ទទៅបាត់នោះក៏ស្រែកថាចោរៗហើយប្រឹងស្ទុះទៅចាប់ប្រតាយប្រតប់ជនសង្ស័យ ភ្លាមៗប្រជាពលរដ្ឋនៅក្បែរនោះក៏បានចេញមកជួយស្ទាក់ចាប់បានជនសង្ស័យម្នាក់ ។ ចំណែកម្នាក់ទៀតបានផ្តួលម៉ូតូរត់គេចខ្លួនបាត់ស្រមោល ហើយជនសង្ស័យម្នាក់នោះត្រូវបានកម្លាំងនគរបាលប៉ុស្តិ៍ និងកម្លាំងនគរបាលខណ្ឌ ចុះទៅនាំខ្លួនបញ្ជូនទៅកាន់អធិការដ្ឋានខណ្ឌទួលគោក ។
ប្រភពព័ត៌មានបានឱ្យដឹងទៀតថា នៅពេលនាំខ្លួនទៅដល់អធិការដ្ឋាននគរបាលខណ្ឌក៏បានចេញមកទទួល និងថតរូប ស្រាប់តែជនសង្ស័យប្រាប់ថា មិនស្រួលខ្លួន (ផ្តាសាយធំ) រយៈពេល៤ថ្ងៃកន្លងមកហើយ ពេលនោះនគរបាលក៏បាននាំចូលទៅខាងក្នុងវាស់កម្តៅឃើញឡើងដល់៣៧.៥០អង្សា ហើយម៉ាស៊ីនវាស់កម្តៅរោទ៍ជាសញ្ញា រួចក៏បាននាំចេញមកក្រៅវិញ ។
ទន្ទឹមនឹងនោះ សមត្ថកិច្ចម្នាក់ៗមានការភ័យខ្លាច និងប្រុងប្រយ័ត្ន ហើយនាំគ្នាបាញ់អាល់កុលគ្រប់គ្នា ។ លុះក្រោយមក ក៏បានវាស់កម្តៅចំនួន២ដងទៀត ទើបកម្តៅចុះមកនៅត្រឹម៣៦អង្សាវិញ ។
ទោះបីជាយ៉ាងណា គេពុំដឹងថា ជនសង្ស័យមានវិជ្ជមានកូវីដ-១៩ឬយ៉ាងណានោះទេ ។ បើសិនជនសង្ស័យមានវិជ្ជមានកូវីដអាចប្រឈមការឆ្លងទៅប្រជាពលរដ្ឋនិងសមត្ថកិច្ចដែលចាប់នោះ។
បច្ចុប្បន្នជនសង្ស័យកំពុងឃាត់ខ្លួនបណ្តោះអាសន្ននៅអធិការដ្ឋាននគរបាលខណ្ឌទួលគោក៕ដោយ៖ជ្រោយពេជ្រ
