សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ ក្រុមហ៊ុន Tesla នៅថ្ងៃចន្ទទី២៧ ខែមេសា ឆ្នាំ២០២១ បានប្រកាសពីត្រីមាសដែលទទួលបានប្រាក់ចំណេញជាប់គ្នា ទី៧លើការលក់ដាច់ខ្លាំង នៃរថយន្តអគ្គីសនី ខណៈដែលក្រុមហ៊ុនមួយនេះទទួលបានការគាំទ្រខ្លាំង។
ជាក់ស្ដែងក្រុមហ៊ុន Tesla បានប្រកាសទទួលបានប្រាក់ចំណេញ ចំនួន៤៣៨លានដុល្លារអាមេរិក ក្នុងរយៈពេល៣ខែដំបូង នៃឆ្នាំ២០២១នេះ ពោលគឺគិតត្រឹមថ្ងៃទី៣១ ខែមីនា, ស្របពេលដែលការលក់ មានការកើនឡើងទ្វេដង បើធៀបនឹងរយៈពេលដូចគ្នា កាលពីឆ្នាំមុន រហូតដល់ជិត១៨៥,០០០គ្រឿង។ នេះបើយោងតាមសារព័ត៌មាន CNA ចេញផ្សាយនាយប់ថ្ងៃទី២៧ ខែមេសា ឆ្នាំ២០២១។
បន្ថែមពីនេះ ក្រុមហ៊ុនមួយនេះ បានលើកឡើងទៀតថា បូកសរុបប្រាក់ចំណូលសុទ្ធ, មិនរាប់បញ្ចូលប្រាក់កម្រៃផ្អែកលើភាគហ៊ុន, បានកើនឡើងលើស១ពាន់លានដុល្លារ ជាលើកដំបូង នៅក្នុងប្រវត្តិសាស្ត្ររបស់ក្រុមហ៊ុនរបស់ខ្លួន។
គួរបញ្ជាក់ថា Tesla, ដែលបច្ចុប្បន្ន បានក្លាយជាក្រុមហ៊ុន មានតម្លៃទីផ្សារធំជាងគេបំផុតលំដាប់ទី៦ នៃក្រុមហ៊ុនទាំងអស់ នៅផ្សារភាគហ៊ុន S&P 500 មានតម្លៃ៧០៨,៥៦ពាន់លានដុល្លារនោះ, មិនតែប៉ុណ្ណោះ ត្រូវបានគេមើលឃើញថា តម្លៃភាគហ៊ុនបានធ្លាក់ចុះ ប្រមាណ២,៥ភាគរយ នៅមុនពេលការជួញដូរ នៅថ្ងៃដដែលនេះ៕ដោយ៖ស តារា
រូបភាព៖ Twitter
