សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ តារាចម្រៀងប្រចាំផលិតកម្មហង្សមាស អ្នកនាង សុគន្ធ នីសា បានចាកចេញពីកម្ពុជាកាលពីអំឡុងពិធីបុណ្យចូលឆ្នាំថ្មីប្រពៃណីជាតិខ្មែរ ពោលគឺក្រោយពីនាងជាសះស្បើយពីជំងឺកូវីដ-១៩នោះ។ ប៉ុន្តែអ្វីដែលធ្វើឲ្យគេនឹកឆ្ងល់ព្រោះតែការធ្វើដំណើររួមគ្នាជាមួយស្វាមីនេះ ត្រូវបានគេលើកឡើងថា នាងនឹងអាចបោះបង់ចោលការងារសិល្បៈ ហើយចេញទៅរស់នៅសហរដ្ឋអាមេរិក ប៉ុន្តែត្រូវបានតារាស្រីរូបនេះចេញមកច្រានចោលដំណឹងនេះ។
ការចាកចេញរបស់តារាចម្រៀង សុគន្ធ នីសា ត្រូវបានអ្នកជិតដិតទម្លាយថា នាងអាចនឹងធ្វើដំណើរទៅកាន់ទឹកដីនៃប្រទេសមហាអំណាចមួយនេះដើម្បីបំពេញឯកសារផ្លូវច្បាប់ណាមួយរួមជាមួយស្វាមី ហើយនាងក៏អាចនឹងទៅរស់នៅទីនោះនៅថ្ងៃណាមួយ។ ចំពោះដំណឹងនៃការចាកចេញទៅរស់នៅសហរដ្ឋអាមេរិកដែលធ្វើឲ្យអ្នកគាំទ្រនាងឆ្ងល់នោះក៏ត្រូវបានបញ្ជាក់ដោយតារាស្រីរូបនេះផងដែរ។ កន្លងមកតារារូបនេះបានត្រឹមបញ្ជាក់ហេតុផលដោយខ្លីថា នាងចាកចេញទៅកាន់សហរដ្ឋអាមរិកនាពេលនេះ គឺដោយសារការងារចាំបាច់ផ្ទាល់ខ្លួននៅក្នុងរង្វង់គ្រួសារនាងប៉ុណ្ណោះ។ ហេតុផលមួយនេះ មិនបានធ្វើឱ្យ សុគន្ធ នីសា បន្តការរស់នៅអាមេរិកជារៀងរហូតនោះឡើយ ពោលគឺនាងនឹងវិលត្រឡប់មកកាន់ប្រទេសកម្ពុជាវិញ ជាមួយនឹងការបន្តអាជីពសិល្បៈរបស់នាងដដែល។នាងបានបន្ថែមខ្លឹមសារមួយចំនួនកាលពីពេលថ្មីៗនេះដើម្បីបញ្ចប់មន្ទិលសង្ស័យលើបញ្ហានេះដោយនាងបញ្ជាក់ថា ”ខ្ញុំមានការនឹករលឹកស្រុកខ្មែរណាស់ មិនយូរទេខ្ញុំនឹងវិលត្រឡប់ទៅវិញ នឹកម៉ាក់ និងបងប្អូនក្មួយៗខ្ញុំ នឹកហ្វេនៗ នឹកការងារ នឹកផ្ទះ នឹកកូនៗ នឹកផ្លូវគ្រប់កន្លែងដែលធ្លាប់
បើកឡានខ្លួនឯងទៅគ្រប់ទីកន្លែងដែលខ្លួនឯងចង់ទៅ”។ តារារូបនេះ បញ្ជាក់មូលហេតុពីខាងសហរដ្ឋអាមេរិកដែរថា ខ្ញុំបានមកដល់ Boston ថ្ងៃទី 16/04/2021 មានការចាំបាច់ត្រូវតែមក ពេលរួចរាល់ការងារប្រចាំគ្រួសារហើយ ខ្ញុំនឹងត្រឡប់ទៅប្រទេសយើងវិញ។នាងថា ជិត១០ឆ្នាំហើយដែលមិនបានមក អ្វីៗប្រគល់ឱ្យដំណើរ ខ្ញុំអស់ភារកិច្ច។ ទោះជាយ៉ាងណាអ្នកគាំទ្រនៅតែបង្ហាញអារម្មណ៍រីករាយដែលនាងមានសុខភាពល្អឡើងវិញ និងបានរួមដំណើរជាមួយស្វាមីយ៉ាងផ្អែមល្ហែមផងដែរ៕
ដោយ៖ វឌ្ឍនា
