សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ឆ្នាំង ៖ ប្រជាពលរដ្ឋនៅខេត្តកំពង់ឆ្នាំង ហាក់នាំគ្នាភ្ញាក់ព្រើត កាលបើបានដឹងថា ករណីបុរសម្នាក់ដុតផ្ទះសម្លាប់ប្រពន្ធនិងកូន៦នាក់ទាំងកូនក្នុងផ្ទៃម្តាយនៅស្រុកបរិបូណ៍កាលពីប៉ុន្មានថ្ងៃមុននេះផ្តើមចេញពីជម្លោះប្តីប្រពន្ធក្នុងរឿងប្តីសុំលក់កងជើងទេវរូបតែប្រពន្ធមិនព្រមលក់។
បើតាមប្រភពពីមន្ត្រីនគរបាលមួយរូបសុំមិនបញ្ចេញឈ្មោះបានឲ្យដឹងថា វត្ថុបុរាណជាកងជើងទេវរូបនេះត្រូវបានកម្លាំងនគរបាលខេត្តរឹបអូសពីគំនរផេះផង់នៃផ្ទះដែលត្រូវភ្លើងឆេះ បង្កឡើងដោយបុរសជាប្តីដែលសម្លាប់ប្រពន្ធ និងកូនៗ រួចដុតផ្ទះកម្ទេចចោល នៅក្នុងភូមិដើមជ្រែ ឃុំខុនរ៉ង ស្រុកបរិបូណ៍ កាលពីយប់ថ្ងៃទី៩ ខែឧសភា ឆ្នាំ២០២១ កន្លងទៅនេះ ហើយយកទៅប្រគល់ឲ្យមន្ទីរវប្បធម៌ខេត្តគ្រប់គ្រងថែរក្សារួចហើយ។
តាមការស្រាវជ្រាវនូវបទល្មើសនេះឃើញថាឈ្មោះ នន់ សារ៉េត មកយកស្ត្រីឈ្មោះ អៀន សុខ ជាស្ត្រីមេម៉ាយមានកូន៣នាក់ធ្វើជាប្រពន្ធ។ ពួកគេបានខិតខំរកស៊ី និងបានចំណងដៃស្នេហ៍១ទៀតគឺកូនប្រុសអាយុ២ឆ្នាំដែលស្លាប់ក្នុងហេតុការណ៍នោះដែរ ។ មានថ្ងៃមួយ ពេលចាប់ផ្តើមជីកដីសាងសង់ផ្ទះ ក៏បានប្រទះឃើញ «កងជើងទេវរូប» ១នេះ រួចក៏យកទៅរក្សាទុក។ ក្រោយមកបុរសជាប្តីក៏ធ្វើគ្រូទស្សន៍ទាយ និងព្យាបាលជំងឺជាបន្តបន្ទាប់យ៉ាងកាក់កបរហូតមក ។
ប្រភពគួរឲ្យជឿបាននិយាយថាបន្ទាប់មករឿងរ៉ាវនេះក៏បានដឹងថា មានគេចង់ទិញ «កងជើងទេវរូប» ខាងលើនេះហើយ បុរសជាប្ដីក៏ចង់លក់ ដើម្បីយកលុយសងបំណុលមេក្រូហិរញ្ញវត្ថុ ដែលនៅជំពាក់ជាង២ម៉ឺនដុល្លារដែល គ្រាន់តែការប្រាក់ត្រូវបង់ ១ខែជាង២លានរៀល ប៉ុន្តែប្រពន្ធមិនព្រមលក់ ទើបមានទំនាស់នឹងគ្នារហូតប្តីខឹងដុតផ្ទះធ្វើមនុស្សឃាតស្លាប់មនុស្ស៦នាក់។
លោក ឃុំ ស៊ាំ ក្រុមប្រឹក្សាឃុំខុនរ៉ង ស្រុកបរិបូរណ៍ បានឱ្យដឹងថា នៅយប់ថ្ងៃកើតហេតុ គឺថ្ងៃទី៩ ខែឧសភានោះ ក្រោយពេលអគ្គិភ័យស្ងប់បន្តិច លោកក៏បានឲ្យប្រជាការពារដឹកឈ្មោះនន់ សារ៉េត ទៅ មណ្ឌលសុខភាព ព្រោះតែស្លុតនឹងហេតុការណ៍ខ្លាំងពេក ។ ស្រាប់តែព្រឹកឡើងថ្ងៃទី១០ ខែឧសភា គាត់ឃើញឈ្មោះនន់ សារ៉េត មកដល់ផ្ទះកន្លែងកើតហេតុវិញ ហើយមិនឃើញចាប់អារម្មណ៍នឹងសាកសពដែលស្លាប់រដូករណែលនោះទេ បែជាខំកាយផេះដើររកវត្ថុបុរាណ គឺ «កងជើងទេវរូប»ទៅវិញ ។
ក្រោយមកឈ្មោះ នន់ សារ៉េត បានយកវត្ថុបុរាណពីកណ្ដាលផ្ទះ ក្នុងគំនរដែក រួចក៏បានកាន់មកអង្គុយនៅខាងក្រៅ ។ គាត់ឃើញបែបនេះ ក៏ឱ្យយកទៅទុកខាងក្នុងវិញទៅ ព្រោះកម្លាំងនគរបាលបច្ចេកទេស គេមកធ្វើកោសល្យវិច័យឥឡូវហើយ ទើបឃើញឈ្មោះនន់ សារ៉េត យកវត្ថុបុរាណនោះ ទៅដាក់លើរានទេវតាដែលឆេះអស់ខ្លះ នៅមុខផ្ទះ ។
កងជើងទេវរូបនេះបើតាមការបញ្ជាក់ពីលោក ចាន់ អាន មេឃុំខុនរ៉ង ស្រុកបរិបូណ៍ វិញបានប្រាប់ថា គាត់ដឹង «កងជើងទេវរូប» នេះមិនមែនបានមកពីការជីកដីសាងសង់ផ្ទះនោះទេ គឺបានមកពីការចាក់អាចម៍ដីក្នុងស្រែ ដើម្បីធ្វើផ្ទះ ។បុរសនេះបានចាក់ដីមួយឆ្នាំបន្តិចៗ ដើម្បីរៀបចំធ្វើផ្ទះ ។ លុះចុងក្រោយ ពេលចាក់ដីហើយ រថយន្តចេញផុតទៅ បុរសជាប្ដីក៏បានយកចបមកកាយដី ពង្រាបឲ្យស្មើ ហើយក៏បានប្រទះឃើញ «កងជើងទេវរូប» មួយនេះ ហើយបុរសជាប្តីនោះ ក៏បានយកទៅរក្សាទុក ។ លុះក្រោយមកទៀត បុរសជាប្តីនោះក៏បានយកមកបង្ហាញគាត់ជាមេឃុំថា មានគេចង់ទិញ និងក្រោយមកទៀត ឮថាលក់មិនដាច់ទេ ព្រោះជាវត្ថុមិនសុទ្ធ។
សូមបញ្ជាក់ថា វត្ថុបុរាណជា កងជើងទេវរូបនេះ មានទម្ងន់ជាង១,៦គីឡូក្រាម ត្រូវបានលោក ញ៉ែម សុភាវី ប្រធានការិយាល័យបច្ចេកទេស និងវិទ្យាសាស្ត្រ នៃស្នងការដ្ឋាននគរបាលខេត្តកំពង់ឆ្នាំង បានប្រគល់ជូនមន្ទីរវប្បធម៌ និងវិចិត្រសិល្បៈខេត្តកំពង់ឆ្នាំង នាព្រឹកថ្ងៃទី១៣ ខែឧសភា ឆ្នាំ២០២១ ដើម្បីរក្សាទុករួចហើយ៕
ដោយ ៖ ប្រាថ្នា
