សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ បើតាមទីភ្នាក់ងារសារព័ត៌មាន The Nation នៅព្រឹកថ្ងៃចន្ទ ទី១៧ ខែឧសភា ឆ្នាំ២០២១នេះ បានដកស្រង់ចេញផ្សាយពីមជ្ឈមណ្ឌលគ្រប់គ្រងស្ថានការណ៍ COVID-19 នៅប្រទេសថៃ បានបញ្ជាក់ថា៖ ជាកំណត់ត្រាថ្មីមួយសម្រាប់ប្រទេសថៃ ខណៈដែល អាជ្ញាធរថៃ ក្នុងរយៈពេលត្រឹមតែ១ថ្ងៃប៉ុណ្ណោះ រកឃើញករណីឆ្លង COVID-19 រហូតដល់ ៩,៦៣៥នាក់, ដោយគ្រាន់តែមនុស្ស ៦,៨៥៣នាក់ក្នុងចំណោមអ្នកឆ្លងថ្មីៗទាំងនេះ គឺត្រូវបានរាយការណ៍ចេញពីពន្ធនាគារមួយចំនួន។ ជាមួយគ្នានេះ អ្នកជំងឺ ២៥នាក់ទៀតបាត់បង់ជីវិត នៅក្នុងរយៈពេលមួយថ្ងៃដូចគ្នា។
មជ្ឈមណ្ឌលគ្រប់គ្រងស្ថានការណ៍ COVID-19 បានបន្តថា ក្រោយការបូកសរុបទិន្នន័យថ្មីៗខាងលើនេះ នាំឲ្យចំនួនករណីឆ្លង COVID-19 សរុបទូទាំងប្រទេសថៃកើនដល់ ១១១,០៨២ករណី ក្នុងនោះមានអ្នកស្លាប់ ៦១៤នាក់ និងជាសះស្បើយវិញជាង ៦៧,០០០នាក់។
បច្ចុប្បន្នប្រទេសថៃ កំពុងតែស្ថិតនៅក្នុង ដំណាក់កាលទប់ទល់រលកទី ៣ នៃការឆ្លងរាតត្បាត COVID-19។ គិតត្រឹមថ្ងៃអាទិត្យម្សិលមិញ វ៉ាក់សាំងបង្ការ COVID-19 សរុប ២.២លានដូសហើយត្រូវបានចាក់ជូនប្រជាជន។
គួរបញ្ជាក់ថា វ៉ាក់សាំងដែលប្រទេសថៃ កំពុងប្រើប្រាស់បច្ចុប្បន្ននេះ គឺ AstraZeneca និង Sinovac ខណៈវ៉ាក់សាំងដែលត្រូវបានអនុម័តឲ្យប្រើផ្សេងទៀត គឺមិនទាន់ត្រូវបានបញ្ជូនមកដល់នៅឡើយទេ៕ ដោយ៖ស តារា
