សារព័ត៌មាន នគរវត្ត តែងតែនាំមុខគេជានិច្ច
ខេត្តកោះកុង៖ ក្នុងរយៈពេលប៉ុន្មានឆ្នាំចុងក្រោយនេះ ខេត្តកោះកុងបានក្លាយជាតំបន់មួយដែលមានការទាក់ទាញវិនិយោគិនជនជាតិចិនកាន់តែខ្លាំង ដោយឃើញមានគម្រោងធំៗជាច្រើនក្រោមការបណ្ដាក់ទុនវិនិយោគរបស់ជនជាតិចិន បានលេចរូបរាងជាបណ្ដើរៗបេីទោះបីជាបច្ចុប្បន្ននេះកម្ពុជា កំពុងស្ថិតនៅក្នុងដំណាក់កាលនៃវិបត្តិកូវីដ១៩ ក៏ដោយ ហើយកោះកុងនឹងកែប្រែក្លាយទៅជាបណ្ដុំសហគមន៍វិនិយោគិនចិនមួយ នាពេលខាងមុខនេះ។
ជាក់ស្ដែងបេីយោងតាមសេចក្តីប្រកាសព័ត៌មានរបស់រដ្ឋបាលខេត្តកោះកុង នាពេលថ្មីៗនេះ បានឲ្យដឹងថា កោះកុង បានទទួលគម្រោងវិនិយោគរមណីយដ្ឋានលំហែកាយខ្នាតធំមួយក្នុងខេត្តនេះ ដែលអាចផ្ដល់ការងារដល់និយោជិតរាប់ម៉ឺននាក់នៅក្នុងរយៈពេល២ឆ្នាំខាងមុខទៀតនេះ ។
បេីតាមម្ចាស់គម្រោងរមណីយដ្ឋានលំហែកាយខ្នាតធំ (Long Bay) បានបញ្ជាក់ថា គម្រោង Long Bay ជាគម្រោងរមណីយដ្ឋាន ទេសចរណ៍វប្បធម៌ខ្នាតធំមានក្រឡាផ្ទៃ និងមានផ្ទៃដីសាងសង់២លានម៉ែត្រការ៉េ។ នាពេលអនាគតគម្រោង Long Bayនេះ នឹងបង្កើតបានជាក្រុមសណ្ឋាគារ ដ៏ប្រណីតបំផុតមួយ ដែលរួមបញ្ចូលគ្នាដោយសណ្ឋាគារលំដាប់អន្តរជាតិជាច្រើន នឹងក្លាយទៅជាមជ្ឍមណ្ឌល សម្រាប់លំហែរកាយ វិស្សមកាល ការថែរក្សាសុខភាព និងការកម្សាន្តជាដើមដែលមានទំហំធំ និងមានប្រព័ន្ធគ្រប់គ្រងល្អ ឈានមុខគេបំផុតនៅក្នុងខេត្តកោះកុង ក៏ដូចជាប្រទេសកម្ពុជាបច្ចុប្បន្ន ព្រមទាំងដើរតួនាទីយ៉ាងសំខាន់ ក្នុងការអភិវឌ្ឍវិស័យឧស្សាហកម្មទេសចរណ៍ ក្នុងខេត្តកោះកុង និងប្រទេសកម្ពុជា ។
ប្រភពដដែល បន្តថា៖« រហូតមកដល់ពេលនេះគម្រោង Long Bay មាននិយោជិតក្នុងស្រុកជាង៨០០នាក់ ហើយនាពេលអនាគត ប្រមាណ២ឆ្នាំទៀតតម្រូវការនិយោជិត ក្នុងស្រុកនឹងមានចំនួនកើនដល់រាប់ម៉ឺននាក់ ។
ចំណែកអភិបាលនៃគណៈអភិបាលខេត្តកោះកុង លោកជំទាវ មិថុនា ភូថង បានមានប្រសាសន៍ថា នេះជាការផ្លាស់ប្តូរ និងសមិទ្ធិផល នៃការវិនិយោគធនធានទេសចរណ៍ និងការដោះស្រាយបញ្ហាកង្វះខាតការងារ ក្នុងស្រុកដែលគម្រោង Long Bay បានផ្តល់សម្រាប់ខេត្តកោះកុង ដែលចំណាយតែពីរឆ្នាំប៉ុណ្ណោះ ហើយបានកោតសរសើរ ចំពោះម្ចាស់កម្រោង សម្រាប់ការយល់ឃើញដ៏ឈ្លាសវៃ និងការសំរេចចិត្តដ៏ត្រឹមត្រូវ ក្នុងការវិនិយោគមកលើខេត្តកោះកុង ការវិនិយោគរបស់លោកឧកញ៉ា តឹង ភីពីង ដូចនឹងសុភាសិតចិនមួយឃ្លាថា «ប្រែដុំថ្មទៅជាមាស» ។
ដោយឡែកបើតាមប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោកច្រឹក សុខនីម បានមានប្រសាសន៍ដែរថាវិនិយោគិនចិន នឹងមកប្រទេសកម្ពុជាឡើងវិញក្នុងពេលឆាប់ៗដើម្បីស្វែងរកការវិនិយោកគបន្ថែមទៀត ក្រោយពេលវិបត្តិនៃជំងឺកូវីដ១៩បានថមថយ ។
លោកប្រធានសមាគមរូបនេះ បន្ថែមទៀតថា៖« គោលដៅវិនិយោគរបស់វិនិយោគរបស់វិនិយោគិនចិន នៅក្នុងប្រទេសកម្ពុជា គេឃើញមានខេត្តព្រះសីហនុ ខេត្តកោះកុង និងរាជធានីភ្នំពេញ ។ ហើយកោះកុងនឹងក្លាយជាបណ្ដុំសហគមន៍វិនិយោគិនចិនដ៏ទាក់ទាញមួយនៅពេលអនាគតខណៈខេត្តនេះ មានអាកាសយានដ្ឋានអន្តរជាតិ តារាសាគរក្រោមការវិនិយោគរបស់ចិន នឹងដាក់ដំណើរការពេលឆាប់ៗ និងអាចទាក់ទាញវិនិយោគិនចិនបន្ថែមទៀតមកបណ្ដាក់ទុនក្នុងតំបន់ឆ្នេរមួយនេះ»៕ដោយ៖សហការី
