សារព័ត៌មាន នគរវត្ត តែងតែនាំមុខគេជានិច្ច
ខេត្តរតនគិរី៖ នាព្រឹកថ្ងៃទី៣០ ខែឧសភា ឆ្នាំ២០២១ លោក ជៀង អំ រដ្ឋលេខាធិការក្រសួងការពារជាតិ និងជាប្រធានក្រុមការងារថ្នាក់ជាតិចុះជួយខេត្តរតនគិរី ចុះពិនិត្យស្ថានភាពមណ្ឌលចត្តាឡីស័ក និងប្រគល់អំណោយជាគ្រឿងឧបភោគ បរិភោគជូនក្រុមគ្រូពេទ្យ និងកម្លាំងប្រចាំ ការ នៅមណ្ឌលចត្តាឡីស័កនៅវិទ្យាល័យត្រពាំងក្រហម ក្នុងស្រុកកូនមុំ ខេត្តរតនគិរី ។
ការចុះពិនិត្យមណ្ឌលចត្តាឡីស័កនេះ ក៏មានការអញ្ជើញចូលពីសំណាក់ លោក ថង សាវុន អភិបាលខេត្តរតនគិរី, អភិបាលរងខេត្ត កងកម្លាំងប្រដាប់អាវុធទាំង៣ប្រភេទ ប្រធាន អនុប្រធានមន្ទីរដែរពាក់ព័ន្ធ លោកអភិបាលស្រុក អភិបាលរង ស្រុក និងមន្រ្តីចត្តាឡីស័កជាច្រើនទៀតផងដែរ។
លោក ជៀង អំ រដ្ឋលេខាធិការក្រសួងការពារជាតិ និងជាប្រធានក្រុមការ ងារថ្នាក់ជាតិចុះជួយខេត្តរតនគិរីបានណែនាំ ដល់រដ្ឋបាលស្រុកកូនមុំ ត្រូវពិនិត្យទីតាំងបំពេញបន្ថែម នៅផ្នែកដែលខ្វះខាត ដោយ ធ្វើយ៉ាងណាត្រូវបង្ករលក្ខណៈងាយស្រួល ដល់បងប្អូនប្រជាពលរដ្ឋ អាចស្នាក់នៅ ក្នុងអំឡុងពេលធ្វើចត្តាឡីស័កផងដែរ។
លោករដ្ឋលេខាធិការ បានលើកទឹកចិត្តដល់មន្ត្រីប្រចាំ ការនៅតាមមណ្ឌលចត្តាឡីស័កទាំងអស់ ឱ្យបន្តការខិតខំប្រឹងប្រែងបន្តទៀតក្នុងការចូលរួមជាមួយរាជរដ្ឋាភិបាលប្រយុទ្ធប្រឆាំងនឹងជំងឺកូវីដ-១៩នេះ ព្យាយាមណែនាំពលរដ្ឋដែលមកធ្វើចត្តាឡីស័ក ឱ្យរក្សាអនាម័យខ្លួនប្រាណ រក្សាគម្លាត ជាពិសេសបើសិនជាមានបងប្អូនដែលជាសាច់ញាតិមកសួរសុខទុក្ខ ត្រូវរៀបចំឱ្យពួកគាត់សួរសុខទុក្ខ នៅឱ្យឆ្ងាយពីអ្នកធ្វើចត្តាឡីស័ក ព្រោះថាបើសិនជាមិនមានការរៀបចំដាក់ឱ្យឆ្ងាយទេ គាត់នឹងទៅជិតអ្នកចត្តាឡីស័កជាមិនខាន។
លោក ជៀង អំ បានបន្តណែនាំឱ្យមន្រ្ដីប្រចាំការ រៀបចំកន្លែងចត្តាឡីស័ក មានជាកន្លែងអង្គុយលេង ស្រូបយកខ្យល់អាកាស រៀបចំបន្ទប់ឱ្យមានខ្យល់ចេញចូលបានគ្រប់គ្រាន់ ដើម្បីឱ្យគាត់មានអារម្មណ៍ មិនមានភាពធុញថប់ ក្នុងកំឡុងពេលនៃការធ្វើចត្តាឡីស័កនេះ។
លោករដ្ឋលេខាធិការក៏បានអំពាវនាវដល់ប្រជាពលរដ្ឋទាំងអស់ ត្រូវចូលរួមអនុវត្តឲ្យបានខ្ជាប់ខ្ជួននូវវិធានការ ៣កុំ ៣ការពារ និង ២ចូលរួម របស់រាជរដ្ឋាភិបាលកម្ពុជា ដើម្បីការពារខ្លួនពីការចម្លងជំងឺកូវីដ-១៩។
លោក ជៀង អំ ក៏បាននាំយកសម្ភារៈជូនក្រុមការងារកន្លែងចត្តាឡីស័កនៅវិទ្យាល័យត្រពាំងក្រហម ដែលអំណោយទាំងនោះរួមមាន៖ អង្ករ ៥០០គីឡូក្រាម, ទឹកខ្ពុរមាត់ ២០០ដប, ម៉ាស០១កេស,ទឹកត្រី ១០យួរ, ទឹកសុីអុីវ ១០យួរ និងថវិកាមួយចំនួនទៀតផងដែរ។
សូមបញ្ជាក់ផងដែរថាចំនួនប្រជាពលរដ្ឋ ដែលបានចូលមក ចត្តាឡីស័កសរុបចំនួន ១៥៧ នាក់ស្រី ៥០ នាក់ក្នុងនោះអ្នកមានវិជ្ជមានសរុបចំនួន ១៣ នាក់ស្រី ០២ នាក់។
អ្នកដែលបានចេញពីមណ្ឌលត្រឡប់ ទៅផ្ទះវិញចំនួន ១២៤ នាក់ស្រី៤២នាក់ និងអ្នកកំពុងធ្វើចត្តាឡីស័កនៅក្នុងមណ្ឌលសរុបចំនួន ៣៣ នាក់ស្រី ០៨ នាក់ គិតត្រឹមថ្ងៃទី ២៩ ខែឧសភា ឆ្នាំ ២០២១ នេះ ៕
ដោយ ៖ សូរិយា
