សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ រដ្ឋបាលរាជធានីភ្នំពេញបានបន្តឲ្យកម្លាំងចុះធ្វើការកាត់មែកឈើធំៗនៅតាមដងផ្លូវនៅក្នុងរាជធានីភ្នំពេញ ជៀសវាងការបាក់រលំ ការបិទបាំងភ្លើងស្តុប សញ្ញាចរាចរណ៍ ។ល។និងដើម្បី ការពារសុវត្ថិភាពជូនប្រជាពលរដ្ឋពីគ្រោះធម្មជាតិ ព្រោះជារដូវភ្លៀងលាយឡំខ្យល់កន្រ្តាក់ បក់បោក និងដើម្បីសោភ័ណភាពនៅក្នុងទីក្រុងភ្នំពេញផងដែរ ។
ប្រតិបត្តិការនេះធ្វើឡើងនៅព្រឹកថ្ងៃទី០២ ខែមិថុនា ឆ្នាំ២០២១ ក្រុមសួនច្បារនិង ដើមឈើ នៃរដ្ឋបាលរាជធានីភ្នំពេញ បានបន្តសកម្មភាពចុះកាត់មែកឈើ នៅមូលដ្ឋានខណ្ឌ៧មករា នៅតាមបណ្ដោយផ្លូវលេខ១៦៩ (មុខសាលាវិទ្យាល័យបាក់ទូក) អមសងខាងផ្លូវ ចាប់ពីចំណុចស្តុបក្ដាន់ពីរ រហូតដល់ចំណុច ស្ដុបនាងគង្ហីង។
គួរបញ្ជាក់ផងដែរ មែកឈើធំៗតែងតែបាំងបិទភ្លើងសញ្ញាចរាចរណ៍ សញ្ញាភ្លើងស្តុប ធ្វើឱ្យប្រជាពលរដ្ឋធ្វើដំណើរឆ្លងកាត់ពិបាកនឹងមេីលភ្លើងសញ្ញាបញ្ជាចរាចរណ៍ ព្រោះត្រូវមែកឈេីធ្លាក់បាំងស្ទេីរតែមេីលមិនឃេីញតែម្ដង បន្ថែមទៀតនោះ រាល់ពេលដែលមានភ្លៀងធ្លាក់ខ្លាំងជាមួយនឹងខ្យល់កន្រ្តាក់តែងតែមានការបាក់រលំមែកឈើមួយចំនួនទៅលើយានយន្តរបស់ប្រជាពលរដ្ឋនឹងធ្លាក់ទៅលើដងផ្លូវដែលជាការបង្អាក់ដំណើរចរាចរណ៍និងធ្វើឱ្យកកស្ទះខ្លាំងនៅក្នុងរាជធានីភ្នំពេញ។
បងប្អូនប្រជាពលរដ្ឋបានជ្រាបហើយថានៅរដូវកាលនេះគឺជាវាគឺជារដូវភ្លៀងធ្លាក់ខ្លាំងលាយឡំនិងខ្យល់កន្រ្តាក់ សូមបងប្អូនប្រជាពលរដ្ឋបង្កើនការការពារសុវត្ថិភាពផ្ទាល់ខ្លួនរាល់ពេលដែលមេឃភ្លៀងខ្លាំងម្តងៗសូមមេត្តាកុំឈប់ឬចតនៅក្រោមដើមឈើធំៗដែលអាចងាយនឹងរងគ្រោះពីការរលំនិងបាក់មែកឈើ៕
ដោយ ៖ រ៉ារ៉ា
