សារព័ត៌មាន នគរវត្ត តែងតែនាំមុខគេជានិច្ច
ក្រុមហង្សក្រហម Liverpool មានបំណងបើកកិច្ចពិភាក្សាកិច្ចសន្យាជាមួយអ្នកចាំទី Alisson Becker នៅពេលដែលគាត់ត្រឡប់មកក្លិបវិញបន្ទាប់ពីរដូវក្តៅនេះ។
កីឡាករសញ្ជាតិប្រេស៊ីលរូបនេះបច្ចុប្បន្នកំពុងត្រៀមប្រកួតពានរង្វាន់Copa America និងជាកីឡាករម្នាក់ក្នុងចំណោមកីឡាករជាច្រើនដែលក្លិបចង់ចាប់ផ្តើមការចរចាជាមួយរូបគាត់។
Alisson មានវ័យ២៨ឆ្នាំបានចូលរួមជាមួយហង្សក្រហមពីក្រុម Roma ក្នុងកិច្ចសន្យា៦ឆ្នាំកាលពីឆ្នាំ ២០១៨ ក្នុងតម្លៃ៦៦,៨លានផោន។ ការផ្ទេរនាពេលនោះបានធ្វើឱ្យគាត់ក្លាយជាអ្នកចាំទីដែលថ្លៃជាងគេបំផុតនៅលើពិភពលោក ហើយគាត់បានជួយឲ្យហង្សក្រហមឈ្នះពានរង្វាន់ Champions League និង Premier League ។
Alisson បានរកគ្រាប់បាល់ឈ្នះជាចុងក្រោយនៅពេលប្រកួតជាមួយក្រុម West Brom កាលពីខែឧសភា និងបានឈ្នះពានរង្វាន់របស់ក្លិបហង្សក្រហមក្នុងរដូវកាលនេះដែលបានក្លាយជាអ្នកចាំទីទី៦ ដែលអាចរកគ្រាប់បាល់បញ្ចូលទីក្នុងក្របខ័ណ្ឌ Premier League និងជាអ្នករកគ្រាប់បាល់ដំបូង។
ក្រុមហង្សក្រហម Liverpool ក្នុងរដូវកាល២០២០–២០២១ មានភាពលំបាកបន្ទាប់ពីពួកគេមិនអាចរក្សាតំណែងជើងឯកលីគកំពូលអង់គ្លេសបាន ប៉ុន្តែធានាបានកៅអីសម្រាប់ក្របខ័ណ្ឌ Champions League ជាមួយនឹងជ័យជម្នះ ២-០ លើក្រុម Crystal Palace នៅថ្ងៃចុងក្រោយនៃរដូវកាលនេះ ៕
ដោយ ៖ ភារៈ
