សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់បេីករថយន្តបែនដឹកដីមិនប្រយ័ត្នបានជ្រុលទៅបុកគូទរថយន្តម៉ាកហ្វដ រ៉េនជើរមួយគ្រឿង រួចរថយន្តម៉ាកហ្វដ រ៉េនជើរបានបន្តទៅបុករថយន្តក្រុមហ៊ុនសុិនទ្រីបន្ថែមទៀតបណ្តាលឱ្យខូចខាតយ៉ាងដំណំ ។
ហេតុការណ៍នេះបានកើតឡើងកាលពីវេលាម៉ោង៣និង១៥នាទីរសៀលថ្ងៃទី៤ ខែមិថុនា ឆ្នាំ២០២១ ស្ថិតនៅត្រង់ចំណុចភ្លើងស្តុបបារគូ តាមបណ្តោយផ្លូវ៥០ម៉ែត្រកែងនឹងផ្លូវលេខ២១៧ ភូមិបារគូ សង្កាត់ដង្កោ ខណ្ឌដង្កោ រាជធានីភ្នំពេញ ។
តាមប្រភពព័ត៌មានពីអ្នកបើកបររថយន្តរបស់ក្រុមហ៊ុនស៊ិនទ្រីបានប្រាប់ឱ្យដឹងថា មុនពេលកើតហេតុ រូបគេបានបើករថយន្តរបស់ក្រុមហ៊ុនស៊ិនទ្រីទៅប្រមូលសំរាមនៅគោលដៅរួមជាមួយនឹងក្រុមកម្មករ ខណៈដែលរូបគេកំពុងតែបើកតាមដងផ្លូវ ៥០ម៉ែត្រក្នុងទិសដៅពីលិចទៅកើតមកដល់ចំណុចភ្លើងស្តុបបារគូ ក៏បានឈប់រង់ចាំភ្លើងស្តុប ពេលនោះស្រាប់តែមានរថយន្តស៊េរីទំនេីបម៉ាក Ford Ranger ពណ៌ស ពាក់ស្លាកលេខភ្នំពេញ2BH-1718 បើកបរដោយស្ត្រីម្នាក់រួមដំណើរជាមួយនឹងម្ដាយបានធ្វើដំណើរមកក្រោយក៏បានឈប់ភ្លើងស្តុបដែរ ស្របពេលជាមួយគ្នានោះក៏មានបុរសម្នាក់បើករថយន្តបែនដឹកដីធុនធំមួយគ្រឿងមកពីក្រោយក្នុងល្បឿនលឿនមិនប្រយ័ត្នក៏បានជ្រុលទៅបុកគូទរថយន្តម៉ាក Ford Ranger រួចរថយន្តម៉ាក Ford Ranger ក៏ជ្រុលទៅបុកគូទរថយន្តរបស់ក្រុមហ៊ុនស៊ិនទ្រីបន្តទៀតបណ្តាលឲ្យរថយន្តម៉ាក Ford Ranger រងការខូចខាតផ្នែកខាងមុខនិងខាងក្រោយយ៉ាងដំណំ តែក្នុងករណីគ្រោះថ្នាក់ចរាចរណ៍ខាងលើនេះមិនបណ្តាលឲ្យមានអ្នកណាម្នាក់រងរបួសនោះទេ ។
ក្រោយកេីតហេតុ កម្លាំងសមត្ថកិច្ចនគរបាលខណ្ឌដង្កោបានចុះទៅដល់ ហេីយបានឲ្យភាគីទាំងសងខាងនិយាយចរចាគ្នា ដោយឡែកខាងភាគីរថយន្តក្រុមហ៊ុនរបស់សុិនទ្រីខូចខាតតិចតួច និងមិនចង់មានរឿងវែងឆ្ងាយក៏សុំយករថយន្តទៅជួសជុលខ្លួនឯង ដោយទុកឲ្យម្ចាស់រថយន្តម៉ាក Ford Ranger និងម្ចាស់រថយន្តបែនដឹកដីធ្វើការដោះស្រាយគ្នាបន្ត ។
ក្រោយមក ភាគីរថយន្តទាំងពីរគ្រឿងដោះស្រាយមិនត្រូវគ្នា ទេីបសមត្ថកិច្ចនគរបាលប៉ុស្តិ៍រដ្ឋបាលដង្កោ សហការជាមួយសមត្ថកិច្ចជំនាញចរាចរណ៍ខណ្ឌ ធ្វើការវាស់វែងយករថយន្តទាំងពីរគ្រឿងទីរក្សាទុកនៅអធិការដ្ឋានគរបាលខណ្ឌដង្កោ រង់ចាំដោះស្រាយគ្នានៅពេលក្រោយ៕
ដោយ ៖ ភារ៉ា ដង្កោ
