ទីបំផុតកញ្ញា មាន ពេជ្ររីតា ត្រូវបានតុលាការសម្រេចលើកលែងចោទប្រកាន់ ! មានន័យថា,ការពិត និងយុត្តិធម៌ត្រូវបានរកឃើញបណ្តើរៗហើយ

ភ្នំពេញ ៖ បើយោងតាមដីកាសម្រេចរបស់ សាលាដំបូងរាជធានីភ្នំពេញ ដែលអង្គភាព”នគរដ្រេហ្គននិងកាសែតនគរវត្ត” ទទួលបាននៅរសៀលថ្ងៃទី០៨ ខែមិថុនា ឆ្នាំ២០២១នេះ គឺ តុលាការបានសម្រេចលើកលែងការចោទប្រកាន់ទៅលើ កញ្ញា មាន ពេជ្ររីតា ហៅយូប៊ី ពិធីការិនីទូរទស្សន៍ MY TV និងជាអតីតបវរកញ្ញា Miss Grand Cambodia ដែលប្តឹងដោយ ឧកញ៉ា ហេង សៀ។ មានន័យថា ទីបំផុតការពិត និងយុត្តិធម៌ ត្រូវបានរកឃើញបណ្តើរៗហើយ !

សូមជម្រាបជូនថា, ការលើកលែងការចោទប្រកាន់នេះ ធ្វើឡើងនៅថ្ងៃទី០៧ ខែមិថុនា ឆ្នាំ២០២១ ដោយក្នុងនោះ តុលាការបានសម្រេចដូចតទៅ៖

១៖ លើកលែងការចោទប្រកាន់លើឈ្មោះ មាន ពេជ្ររីតា ហៅ យូប៊ី អាយុ២០ឆ្នាំ សញ្ជាតិខ្មែរ ដែលមានអត្តសញ្ញាណដូចខាងលើពីបទ «លួចមានស្ថានភាពទម្ងន់ទោសដោយសារប្រព្រឹត្តអំពើហិង្សា» ប្រព្រឹត្តនៅចំណុចផ្លូវ១៣៨ កែងផ្លូវ២៥៩ ស្ថិតនៅក្រុម២៨ ភូមិ១០ សង្កាត់ទឹកល្អក់២ ខណ្ឌទួលគោក រាជធានីភ្នំពេញ ជាបទល្មើសព្រហ្មទណ្ឌ និងផ្តន្ទាទោសតាមបញ្ញត្តិមាត្រា ៣៥៣ និងមាត្រា ៣៥៧ នៃក្រមព្រហ្មទណ្ឌ។
២៖ សម្រេចលើវត្ថុចាប់យកដូចខាងក្រោម៖
២.១៖ ប្រគល់នូវទូរស័ព្ទ១គ្រឿង ម៉ាក iPhone 12 pro Max ពណ៌ទឹកមាស បែកអេក្រង់ (មិនប្រក្រតី) ឱ្យទៅម្ចាស់ដើមវិញឈ្មោះ ហេង សៀ ដូចមានក្នុងកំណត់ហេតុទទួលវត្ថុចាប់យកលេខ៩០០រវត ចុះថ្ងៃទី១៩ ខែឧសភា ឆ្នាំ២០២១ របស់សាលាដំបូង និងអយ្យការអមសាលាដំបូងរាជធានីភ្នំពេញ។

២.២៖ ប្រគល់នូវទូរស័ព្ទ១គ្រឿងម៉ាក iPhone Pro Max ពណ៌ខ្មៅ បែកអេក្រង់ ឱ្យទៅម្ចាស់ដើមវិញឈ្មោះ មាន ពេជ្ររីតា ។

២.៣៖ រឹបអូសនូវកូនកាំបិតចុងស្រួច ដងខ្មៅ ចំនួន១ដើម ដូចមានក្នុងកំណត់ហេតុ ចុះថ្ងៃទី២០ ខែឧសភា ឆ្នាំ២០២១ របស់សាលាដំបូងរាជធានីភ្នំពេញ និងអយ្យការអមសាលាដំបូងរាជធានីភ្នំពេញ។
កញ្ញា មាន ពេជ្ររីតា ត្រូវបានតុលាការចោទប្រកាន់ពីបទ លួចមានស្ថានភាពទម្ងន់ទោស បន្ទាប់ពីមានការដាក់ពាក្យបណ្តឹងដោយ លោកឧកញ៉ា ហេង សៀ កាលពីថ្ងៃទី១០ ខែឧសភា ឆ្នាំ២០២១។ ជាមួយនឹង ការចោទប្រកាន់នេះ នាពេលកន្លងទៅ តុលាការបានសម្រេចឃុំខ្លួននាងជាបណ្តោះអាសន្ន ប៉ុន្តែដោយមានការចូលខ្លួនការពារក្តី និងដាក់ពាក្យស្នើរបស់ ក្រុមមេធាវីស្ម័គចិត្តសម្តេចតេជោ ដឹកនាំដោយ លោក គី តិច កាលពីថ្ងៃទី១៣ ខែឧសភា ឆ្នាំ២០២១ តុលាការបានសម្រេចដោះលែង កញ្ញា មាន ពេជ្ររីតា ឱ្យនៅក្រៅឃុំជាបណ្តោះអាសន្ន ដោយភ្ជាប់ជាមួយនឹងលក្ខខណ្ឌមួយចំនួន។

ការសម្រេចលើកលែងការចោទប្រកាន់លើ កញ្ញា មាន ពេជ្ររីតា នាពេលនេះជាការផ្តល់ភាពយុត្តិធម៌ចំពោះរូបនាង ក្រោមការស្រាវជ្រាវរបស់តុលាការ ជាពិសេសចៅក្រមស៊ើបសួរ។

ការផ្តល់យុត្តិធម៌ដល់ កញ្ញា មាន ពេជ្ររីតា ក៏បានធ្វើឱ្យមហាជន និងអ្នកប្រើប្រាស់បណ្តាញសង្គមមួយចំនួនបញ្ចប់ទស្សនៈអវិជ្ជមាន ចំពោះប្រព័ន្ធយុត្តិធម៌នៅកម្ពុជា ដោយកន្លងទៅមានការរិះគន់ថា តុលាការមានស្តង់ដារកាត់ក្តីពីរខុសគ្នា ឬធ្វើការចចារគ្នាបញ្ចប់ស្ងាត់ៗ ជាថ្នូរនឹងប្រាក់ ជាដើម។

យុត្តិធម៌ចំពោះកញ្ញា មាន ពេជ្ររីតា នាពេលនេះក៏ទទួលបាន ដោយសារតែការអន្តរាគមន៍ចូលការពាររបស់ក្រុមមេធាវីស្ម័គចិត្តរបស់សម្តេចតេជោហ៊ុន សែន ជាពិសេសគឺការចង់ដឹង ចង់ស្វែងរកការពិត និងចង់ឲ្យជនរងគ្រោះ បានទទួលយុត្តិធម៌ពិតប្រាកដ ពីសំណាក់សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា ទើបសម្តេចបានចាត់តាំងក្រុមមេធាវីរបស់សម្តេចចូលការពារនិងស្រាវជ្រាវ រហូតស្វែងរកការពិត ឃើញនៅពេលនេះ។

ការសម្រេចរបស់សាលាដំបូងរាជធានីភ្នំពេញ លើកលែងការចោទប្រកាន់លើកញ្ញា មាន ពេជ្ររីតា ក៏ជាការបញ្ជាក់យ៉ាងច្បាស់ថា ការយកកាំបិតចាក់ទៅលើ ឧកញ៉ា ហេង សៀ នៅថ្ងៃកើតហេតុក្នុងរថយន្ត មិនមែនដើម្បីប្លន់យកទូរស័ព្ទដៃ ឬដើម្បីដណ្តើមយករូបភាពអាសអាភាសក្នុងទូរស័ព្ទនោះទេ ប៉ុន្តែវាជាការប្រើសិទ្ធិការពារខ្លួន នៅពេលដែលលោកហេង សៀ បានបំពានផ្លូវភេទ ប៉ុនប៉ងរំលោភ ទៅលើរូបនាង ហើយការការពារខ្លួនពីការរំលោភបំពានដោយកំរោលខុសច្បាប់នេះ ច្បាប់ក៏មិនបានកំណត់ឱ្យមានការទទួលខុសត្រូវ ឬមានទោសឡើយ។
ដីកាលើកលែងចោទប្រកាន់ ចុះហត្ថលេខាដោយលោក កូយ សៅ ចៅក្រមស៊ើបសួរសាលាដំបូងរាជធានីភ្នំពេញ, ព្រះរាជអាជ្ញារងលោក សុង ឆវ័ន្ត និងក្រឡាបញ្ជី លោកស្រី ទុយ អង្គាព្រឹក ។
ដោយឡែកចំពោះបណ្ដឹងរបស់ កញ្ញា មាន ពេជ្ររីតា ប្តឹង ឧកញ៉ា ហេង សៀ មិនទាន់មានប្រភពផ្លូវការច្បាស់នៅឡើយថា, តើតំណាងអយ្យការដំណើរការនីតិវិធីដល់ណានៅឡើយទេ។
រឿងខាងលើនេះត្រូវបានមជ្ឈដ្ឋានទូទៅរបស់ប្រជាពលរដ្ឋ តាមដានយ៉ាងយកចិត្តទុកដាក់។
ពិសេសសម្ដេចតេជោ ហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជា បានជំរុញឲ្យក្រុមការងារមេធាវីស្ម័គ្រចិត្តសម្ដេចតេជោធ្វើរឿងនេះការពារក្តីឲ្យដល់ទីបញ្ចប់។
ម្យ៉ាងវិញទៀត ហាក់បីដូចជាមានការស្ងប់ស្ងាត់មួយរយៈ ប៉ុន្តែនៅពេលដែលទឹកកំពុងកករល្អក់ ពិតជាមិនអាចមើលឃើញត្រីនោះឡើយ ។ ដូច្នេះចំពោះយុត្តិធម៌សម្រាប់គូភាគីខាងលើនេះ អាស្រ័យលើតុលាការបន្តអនុវត្តតាមនីតិវិធីប្រកបដោយវិជ្ជាជីវៈ ដើម្បីឲ្យមជ្ឈដ្ឋានទូទៅដឹងពិតប្រាកដពីវិវាទនេះ៕

ដោយ៖ សិលា