សារព័ត៌មាន នគរវត្ត តែងតែនាំមុខគេជានិច្ច
ខេត្តបាត់ដំបង+កំពង់ស្ពឺ ៖ នៅវេលាម៉ោង៩ និង៣០នាទីព្រឹកថ្ងៃទី០៩ ខែមិថុនា ឆ្នាំ២០២១ មានប្រជាពលរដ្ឋឈ្មោះ ឡុក ធៀង ភេទប្រុស អាយុ៤៨ឆ្នាំ (ត្រូវជាអនុប្រធានភូមិអណ្តើកដប់មួយ) បានរាយការណ៍ប្រាប់សមត្ថកិច្ចប៉ុស្ដិ៍រស្មីសង្ហារ ថា ប្រជាពលរដ្ឋក្នុងភូមិរបស់លោកបានប្រទះឃើញថាគ្រាប់យុទ្ធភ័ណ្ឌមិនទាន់ផ្ទុះ ចំនួន០៣គ្រាប់ ដែលជាប្រភេទគ្រាប់កាំភ្លើងត្បាល់ នៅចំណុចដីចំការ របស់ឈ្មោះ យ៉ាន់ វុទ្ធី ភេទប្រុស អាយុ ៣២ឆ្នាំ រស់នៅភូមិអណ្ដើកដប់មួយ ឃុំរស្មីសង្ហារ ស្រុករតនមណ្ឌល ខេត្តបាត់ដំបង ។
នៅថ្ងៃដដែលនេះដែរ នាវេលាម៉ោង១២ថ្ងៃត្រង់ មានប្រជាពលរដ្ឋម្នាក់ឈ្មោះ ឌុយ សំណាង ភេទប្រុស អាយុ៤២ឆ្នាំ (ត្រូវជាអនុប្រធានភូមិជីប៉ាង) ក៏បានរាយការណ៍ប្រាប់សមត្ថកិច្ចប៉ុស្ដិ៍ផ្លូវមាស នៃអធិការដ្ឋានគរបាលស្រុករតនមណ្ឌល ថាគេបានប្រទះឃើញគ្រាប់យុទ្ធភ័ណ្ឌមិនទាន់ផ្ទុះ ប្រភេទគ្រាប់ត្បាល់ ៦០mm ចំនួន០១គ្រាប់ដែរ នៅចំណុចបឹងថ្មក្រោយភូមិជីប៉ាងដីចម្ការ របស់ឈ្មោះ អឿន គឹមហៀង ភេទស្រី អាយុ ៣៨ឆ្នាំ រស់នៅភូមិភ្ជាវ ឃុំត្រែង ស្រុករតនមណ្ឌល ខេត្តបាត់ដំបង ។
ក្រោយទទួលព័ត៌មាននេះសមត្ថកិច្ចជំនាញទៅបោះសញ្ញាសម្គាល់ចំណាំមិនឲ្យប្រជាពលរដ្ឋចូលជិតព្រោះខ្លាចគ្រោះថ្នាក់និងបានរាយការណ៍ជូនអង្គភាពកម្ចាត់មីនស៊ីម៉ាក់ភ្លាមៗផងដែរ។
ដោយឡែកនៅខេត្តកំពង់ស្ពឺឯណោះវិញកាលពីថ្ងៃទី០៩ ខែមិថុនា ឆ្នាំ២០២១នេះដែរ កម្លាំងអធិការដ្ឋាននគរបាលក្រុងច្បារមន សហការជាមួយអង្គការ ស៊ីម៉ាក់(CMAC) បានយកគ្រាប់យុទ្ធភ័ណ្ឌមិនទាន់ផ្ទុះ សរុបចំនួន០៦គ្រាប់នៅភូមិសាស្ដ្រក្រុងច្បារមន ខេត្តកំពង់ស្ពឺ។ យុទ្ធភ័ណ្ឌមិនទាន់ផ្ទុះរួមមានៈ គ្រាប់DK ៨០ម.ម០១គ្រាប់, គ្រាប់ DK៨១ម.ម ០១គ្រាប់, គ្រាប់DK ៨២ម.ម ចំនួន១គ្រាប់, ក្បាលគ្រាប់ ផ្លោងចំនួនគ្រាប់, គ្រាប់១០៥ម.ម ០១នឹង១០៧ម.ម ០១គ្រាប់ ត្រូវបានយកទៅរក្សាត្រៀមកម្ទេចចោល ។
មន្តីនគរបាលជំនាញអះអាងថា គ្រាប់យុទ្ធភ័ណ្ឌមិនទាន់ផ្ទុះទាំងនេះបានបន្សល់ទុកពីសម័យសង្រ្គាមមកម្ល៉េះ។
ជាមួយនេះអាជ្ញាធរមូលដ្ឋានបានថ្លែងអំណរគុណដល់ពលរដ្ឋដែលបានរាយការណ៍ជូនសមត្ថកិច្ចទាន់ពេលវេលា និងបានអំពាវនាវដល់ប្រជាពលរដ្ឋដែលរស់នៅក្នុងមូលដ្ឋានទាំងអស់ សូមមានការប្រុងប្រយ័ត្នខ្ពស់នូវយុទ្ធភ័ណ្ឌមិនទាន់ផ្ទុះ ឬអាវុធខូចគុណភាពផ្សេងៗត្រូវរាយការណ៍ជាបន្ទាន់ជូនសមត្ថកិច្ច ជៀសវាងការកើតមានគ្រោះថ្នាក់ដោយសារយុទ្ធភ័ណ្ឌ និងអាវុធទាំងនោះជាយថាហេតុ ។
បច្ចុប្បន្ន មន្រ្តីជំនាញនៃអង្គភាពស៉ីម៉ាក CMAC បានពិនិត្យ និងហ៊ុំព័ទ្ធចំណុចនោះទុកដេីម្បីធ្វេីការស្រាវជ្រាវបន្តទៀត ព្រមទាំងត្រៀមកម្ទេចចោលនៅនឹងកន្លែងតែម្តង៕
ដោយ ៖ ប្រាថ្នា
