សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ អគ្គិភ័យបានឆាបឆេះផ្ទះប្រជាពលរដ្ឋអស់៣ខ្នងទាំងស្រុង ដោយគេពុំទាន់ដឹងពីមូលហេតុនៅឡើយ ។ហេតុការណ៍នេះបានកើតឡើងកាលពីវេលាម៉ោង៩និង៥០នាទីយប់ថ្ងៃទី១១ ខែមិថុនា ឆ្នាំ២០២១ នៅជិតបុរីសន្តិភាព២ ក្នុងភូមិដំណាក់ត្រយឹង សង្កាត់ចោមចៅទី២ ខណ្ឌពោធិ៍សែនជ័យ ។
ប្រភពព័ត៌មាននៅកន្លែងកើតហេតុបានឱ្យដឹងថា ផ្ទះដែលត្រូវភ្លើងឆាបឆេះមុនគេ គឺជាប្រភេទផ្ទះឈើលើថ្មក្រោម ដែលគ្មានមនុស្សនៅ។ បន្ទាប់មកបានឆេះរាលដាលដល់ផ្ទះដែលស្ថិតនៅជាប់គ្នានោះជាបន្តបន្ទាប់។ អគ្គិភ័យនេះបានឆាបឆេះផ្ទះខណៈដែលមេឃកំពុងធ្លាក់ភ្លៀងយ៉ាងខ្លាំង ហើយដែលការឆាបឆេះនេះ គេនៅពុំទាន់បានដឹងថាបណ្ដាលមកពីមូលហេតុអ្វីច្បាស់លាស់នៅឡើយទេ។ ប៉ុន្តែជំហានដំបូងគេបានសង្ស័យថា ជាករណីឆ្លងចរន្តអគ្គិសនី។
ប្រជាពលរដ្ឋរស់នៅកន្លែងភ្លើងឆេះផ្ទះនោះបានឱ្យដឹងថា នៅពេលមានការឆាបឆេះភ្លាម ប្រជាពលរដ្ឋបាននាំគ្នាដងទឹកដែលមាននៅនឹងកន្លែងកើតហេតុនោះជះពន្លត់ ព្រមទាំងមានជំនួយពីក្រុមរថយន្តពន្លត់អគ្គិភ័យផងទើបភ្លើងរលត់ទៅវិញហើយផ្ទះចំនួន៣ខ្នងត្រូវបានអគ្គិភ័យឆាបឆេះអស់ទាំងស្រុង៕
ដោយ៖ ជ្រោយពេជ្រ
