សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បង្ហាញវត្តមានលើអាជីពសិល្បៈជិតមួយឆ្នាំប៉ុណ្ណោះ ភួង សាវតា ដែលដើមឡើយគឺជាប្រធានបាហុនិការ ឬអ្នកបម្រើលើយន្តហោះស្រស់សង្ហា រូបនេះអាចគ្រងបានតំណែងជាតួឯកក្នុងភាពយន្តភាគថ្មីមួយភ្លែត ដោយសម្តែងរួមគ្នាជាមួយតារាស្រីស្រស់សោភាវ័យក្មេង អាង សុជាតា ហៅ ឈូឈូនោះ។
លោក ភួង សាវតា ទទួលបានការងារសិល្បៈជាហូរហែ ប៉ុន្តែមិនមែនដោយភាពចៃដន្យឡើយខណៈដែល រូបសម្បត្តិ សីលធម៌ និងទេពកោសល្យ ដែលជាទុនដ៏សំខាន់សម្រាប់ប្រឡូកក្នុងអាជីពជាអ្នកសិល្បៈនោះគឺតារាប្រុសវ័យ២៧ឆ្នាំរូបនេះមានគ្រប់គ្រាន់ និងជាហេតុដែលលោកអាចទទួលបានឱកាសទីផ្សារការងារសិល្បៈយ៉ាងឆាប់រហ័សក្នុងរយៈពេលខ្លី។ កត្តាដែលទទួលបានឱកាសការងារទាំងការច្រៀង និងសម្តែងជាហូរហែនេះក៏មិនមែនជារឿងចៃដន្យដែរគឺស្របពេលដែលលោកទទួលបានការជួយណែនាំបង្ហាញពីបងប្រុសជីដូនមួយរបស់លោកគឺ លោក រតនៈ ពិសិដ្ឋនោះតែម្តង។ លោកថា លោកគឺជាប្រធានក្រុមបណ្តុះបណ្តាលបាហុនិការ នៃក្រុមហ៊ុន JC Airline ដែលក្រោយពីទំនេរច្រើនពីការងារនៅលើបក្សីស្លាបដែកនោះ លោកបានសម្រេចចិត្តចូលប្រឡូកការងារសិល្បៈដែលខ្លួនស្រលាញ់ ដោយមានការជួយជ្រោមជ្រែង បង្ហាត់បង្ហាញណែនាំពីបងប្រុសផងដែរ។ លោកថា ដំបូងអាចជារឿងលំបាកបន្តិច ហើយក្រោយមកលោកអាចបំពេញការងារសិល្បៈបានច្រើនទាំងការច្រៀង និងសម្តែង រហូតទទួលបានឱកាសពីផលិតករ និងអ្នកដឹកនាំផលិតជាបន្តបន្ទាប់។ លោកថា ថ្មីៗនេះលោកទទួលបានតំណែងតួឯកក្នុងភាពយន្តភាគមួយរបស់ទូរទស្សន៍ហង្សមាសគឺរឿង “សម្បកក្រៅ” ដែលសម្តែងរួមគ្នាជាមួយតារាស្រីវ័យក្មេង កញ្ញា ឈូឈូ នោះ។
លោកថា លោក និងឈូឈូ សម្តែងរួមគ្នាបានល្អបើទោះបីនេះគឺជាជំនួបលើកដំបូងក៏ដោយ។ លោកថា ជាលើកដំបូងប៉ុន្តែលោកបានហ្វឹកហាត់ និងប្រឹងប្រែងច្រើនរហូតលោកទទួលបានបទពិសោធន៍ថ្មី និងយល់ថា ការងារសិល្បៈមិនមែនជារឿងងាយស្រួលឡើយគឺត្រូវឆ្លងកាត់ការអត់ធ្មត់ប្រឹងប្រែងដើម្បីឲ្យស្នាដៃដែលចូលរួមសម្តែងទទួលបានការពេញចិត្តពីទស្សនិកជន ប៉ុន្តែប្រសិនបើធ្វើឲ្យតែរួចពីដៃគឺមិនអាចទាញបានការចាប់អារម្មណ៍ពីទស្សនិកជនឡើយ។ លោកថាក្រៅពីសម្តែងភាពយន្តលោកក៏ទើបនឹងទទួលបានឱកាសថតឈុតផ្សព្វផ្សាយពាណិជ្ជកម្ម ការច្រៀងនៅលើកម្មវិធីកម្សាន្តចុងសប្តាហ៍របស់ទូរទស្សន៍នានា និងការសម្តែងក្នុងបទចម្រៀងជាដើម។ លោកថាបើទោះបីជាសភាពនៃការសង្គមវិលត្រឡប់មករកស្ថានភាបដើមបញ្ចប់ការឆ្លងជំងឺកូវីដ១៩នោះ លោកនឹងវិលទៅបំពេញការងារចាស់ជាធម្មតាហើយលោកក៏នឹងបន្តទទួលយកការងារសិល្បៈជាធម្មតាតាមពេលវេលាដែលអាចធ្វើទៅរួច។ សិល្បករបញ្ចប់ការសិក្សាថ្នាក់បរិញ្ញាបត្រអក្សរសាស្ត្រអង់គ្លេសនាសាកលវិទ្យាល័យបញ្ញាសាស្ត្ររូបនេះបានបលើកឡើងដែរថា បន្ថែមលើកការងារដែលមានច្រើនស្រាប់នេះដែរ លោកក៏គ្រោងនឹងបង្កើតស្នាដៃថ្មីរួមគ្នាជាមួយសិល្បកររាមច្បងនូវទស្សនីយភាបសិល្បៈទាំងការច្រៀងក្បាច់រាំ និងសម្តែងថ្មីប្លែកសម្រាប់បម្រើការកម្សាន្តរបស់ទស្សនិកជនផងដែរ៕
ដោយ ៖ វឌ្ឍនា
