សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់បេីករថយន្តដឹកទំនិញធុនធំមិនប្រយ័ត្ន បានជ្រុលទៅបុករថយន្តស៊េរីទំនេីប Mazda ពីក្រោយពេញទំហឹងបណ្ដាលឲ្យរងការខូចខាតយ៉ាងដំណំ បង្កការកកស្ទះចរាចរណ៍ដល់អ្នកដំណេីរកាលពីវេលាម៉ោង៨ និង៤០នាទីយប់ ថ្ងៃទី១៤ ខែមិថុនា ឆ្នាំ២០២១ នៅចំណុចស្តុបចំការមន តាមបណ្ដោយផ្លូវសុធារស កែងផ្លូវព្រះនរោត្ដម ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ។
តាមប្រភពព័ត៌មានពីកន្លែងកេីតហេតុបានឲ្យដឹងថា មុនកេីតហេតុ រថយន្តស៊េរីទំនេីប Mazda ពណ៌សំបកឪឡឹក ពាក់ស្លាកលេខភ្នំពេញ 2AB-8801 បេីកបរដោយបុរសម្នាក់ជាជនជាតិចិន ធ្វេីដំណេីរតាមបណ្ដោយផ្លូវសុធារស ទិសដៅពីកេីតមកលិច ខណៈមកដល់ចំណុចកេីតហេតុក៏ឈប់ស្តុប ពេលនោះក៏មានរថយន្តបង្ក NiSSAN ចង្កូតស្ដាំ ពណ៌ស ប្រភេទដឹកទំនិញធុនធំ បេីកបរដោយបុរសម្នាក់ជាជនជាតិខ្មែរ ធ្វេីដំណេីរស្របទិសគ្នាហេីយបុកពីក្រោយពេញទំហឹង បណ្ដាលឲ្យបែកកញ្ចក់និងក្រពិតកាង រងការខូចខាតយ៉ាងដំណំ តែមិនប៉ះពាល់ដល់មនុស្សឡេីយ ។
ក្នុងករណីខាងលេីនេះក៏មានការកកស្ទះចរាចរណ៍ដល់បងប្អូនប្រជាពលរដ្ឋជាខ្លាំងផងដែរ ក្រោយមកសមត្ថកិច្ចមូលដ្ឋានចុះមកដល់ហេីយទាក់ទងទៅជំនាញចរាចរណ៍ឲ្យមកធ្វេីការវាស់វែងយករថយន្តទាំងពីរគ្រឿងនេះទៅរក្សាទុកនៅការិយាល័យចរាចរណ៍ផ្លូវគោករាជធានីភ្នំពេញ រង់ចាំភាគីទាំងសងខាងដោះស្រាយគ្នានាពេលក្រោយ ៕
ដោយ ៖ ភារ៉ា ដង្កោ
