លោកស្រី យក់ សម្បត្តិ ៖ ព្រឹកថ្ងៃទី ២៦ ខែមិថុនា ឆ្នាំ ២០២១ខាងមុខ កម្ពុជា នឹងទទួលវ៉ាក់សាំងបង្ការជំងឺកូវីដ-១៩ ប្រភេទសុីណូវ៉ាក់ ចំនួន ១លានដូសទៀត ដែលដឹកមកដល់នៅកម្ពុជា !

ភ្នំពេញ៖ តាមការគ្រោងទុកវ៉ាក់សាំងកូវីដ-១៩ ប្រភេទសុីណូវ៉ាក់ របស់សាធារណរដ្ឋប្រជាមានិតចិនចំនួន ១លានដូស នឹងដឹកមកកម្ពុជានៅព្រឹកថ្ងៃទី ២៦ ខែមិថុនា ឆ្នាំ ២០២១ខាងមុខ។

នេះបើយោងតាមការបញ្ជាក់អោយដឹងពី លោកស្រី យក់ សម្បត្តិ រដ្ឋលេខាធិការក្រសួងសុខាភិបាល បានបញ្ជាក់ប្រាប់បានដឹងថា នៅថ្ងៃនេះ។សូមជម្រាបជូនថា គិតត្រឹមថ្ងៃទី២២ ខែមិថុនា ឆ្នាំ២០២១ ក្រសួងសុខាភិបាល និងក្រសួងការពារជាតិ បានចាក់វ៉ាក់សាំងការពារកូវីដ-១៩ ជូនមន្រ្តីរាជការ ប្រជាពលរដ្ឋ និងកងកម្លាំងប្រដាប់អាវុធ នៅទូទាំងប្រទេសសរុបចំនួន ៣,៥១៧,៩៤៣នាក់ហើយសម្រាប់លទ្ធផលចាក់វ៉ាក់សាំង ធៀបនឹងគោលដៅ១០លាននាក់ បានចំនួន៣៥.១៨%។

សូមជម្រាបថា​ នៅក្នុង​សេចក្ដីជូនដំណឹងរបស់ក្រសួងសុខាភិបាល​ នៅថ្ងៃទី២២ ខែមិថុនា​​ ឆ្នាំ​២០២១​ រកឃើញអ្នកឆ្លងថ្មី ៥៨៧នាក់ទៀត ជាសះស្បើយ ៥៤៨នាក់ និងស្លាប់ ១៦នាក់៖
– ករណីឆ្លងសហគមន៍ ៥៣៣នាក់
– អ្នកដំណើរពីបរទេស ៥៤នាក់

គិតត្រឹមព្រឹក ថ្ងៃទី២៣ ខែមិថុនា ឆ្នាំ២០២១
– អ្នកឆ្លងសរុប= 44,711 នាក់
– អ្នកជាសះស្បើយ= 39,314 នាក់
– អ្នកស្លាប់= 475 នាក់ ៕

ដោយ៖ សិលា