សារព័ត៌មាន នគរវត្ត តែងតែនាំមុខគេជានិច្ច
លោក Jerome Powell ប្រធានមូលនិធិបម្រុងសហរដ្ឋអាមេរិក FED បានប្រកាសថា អាមេរិកមិនខ្លាចចិននិងរុស្ស៊ីបោះបង់ប្រាក់ដុល្លារអាមេរិកនោះឡើយ។ ការលើកឡើងរបស់អាមេរិកនេះ គឺ ក្រោយពេលរុស្ស៊ីនិងចិនមានគម្រោងបោះបង់ប្រាក់ដុល្លារដើម្បីបង្កើតសម្ពន្ធមិត្តហិរញ្ញវត្ថុដាច់ដោយឡែក មិនចាយប្រាក់ដុល្លារអាមេរិកក្នុងការដោះដូរពាណិជ្ជកម្ម។
លោក Jerome Powell បានលើកឡើងថា «ប្រាក់ដុល្លារគឺជា
ប្រាក់តម្គល់ទុកនៅលើពិភពលោក ហើយបើចង់ផ្លាស់ប្តូរប្រើប្រាស់ប្រាក់ផ្សេងមិនមែនជារឿងងាយស្រួលនោះឡើយ»។ លោកបន្តទៀតថា កម្លាំងប្រាក់ដុល្លារអាមេរិកត្រូវបានធានាដោយរបបប្រជាធិបតេយ្យ កំពុងដំណើរការនៅអាមេរិក និងនៅទីផ្សារជុំវិញពិភពលោក។
កាលពីដើមខែមិថុនា ក្រសួងហិរញ្ញវត្ថុរុស្ស៊ី បានប្រកាសថា នឹងផ្លាស់ប្តូរទម្រង់នៃមូលនិធិជាតិ NWF របស់រុស្ស៊ី ដោយក្នុងរយៈពេល១ខែ ចំនួនប្រាក់ដុល្លាររបស់អាមេរិកធ្លាក់ចុះដល់កម្រិតសូន្យ ប្រាក់ផោនរបស់អង់គ្លេសនៅសល់ត្រឹម ៥% ប្រាក់អឺរ៉ូ៤០% ប្រាក់យ័នចិន ៣០% …។
មានប្រសាសន៍នៅក្នុងវេទិកាសេដ្ឋកិច្ចទីក្រុង St. Petersburg (SPIEF) កាលពីថ្ងៃទី៥ខែមិថុនា ប្រធានាធិបតីពូទីនបញ្ជាក់ថា រុស្ស៊ីបានត្រៀមលក្ខណៈផ្លាស់ប្តូរមកទូទាត់ដោយប្រាក់ផ្ទាល់របស់ប្រទេសជាដៃគូ ជំនួសប្រាក់អាមេរិក។ ក្នុងនោះមានប្រាក់អឺរ៉ូ ប្រើប្រាស់ដើម្បីទូទាត់តម្លៃឧស្ម័នហ្គាស…។
លោកពូទីនបន្តទៀតថា លោកមិនពេញចិត្តនៅក្នុងការប្រើប្រាស់ប្រាក់ដុល្លារអាមេរិកនោះឡើយ ដោយសារតែអាមេរិកមិនឲ្យតម្លៃដល់ប្រាក់ដុល្លាររបស់ខ្លួន ហើយតែងតែចាត់ទុកជាឧបករណ៍ដើម្បីសម្រេចគោលនយោបាយរបស់អាមេរិក៕ដោយ៖ធីរីណា
ប្រទេសរុស្ស៊ីបានប្រកាសកាត់បន្ថយប្រាក់ដុល្លារពីមូលនិធិសុខុមាលភាពជាតិ (NWF) មកជាទឹកប្រាក់ចំនួន ១៨៦ ពាន់លានដុល្លារ។ រូបភាព៖Dreamstime
