សមត្ថកិច្ចបង្ហាញខ្លួនជនល្មើសក្លែងស្លៀកពាក់ឯកសណ្ឋាន ក្លែងឯកសារអគ្គស្នងការដ្ឋាននគរបាលជាតិ ឯកសាររបស់ក្រសួងមហាផ្ទៃ និងក្លែងខ្លួនជានាយករង នៃមន្ទីរប្រឆាំងបទល្មើសគ្រឿងញៀន

ចែករំលែក៖

ភ្នំពេញ៖ នៅរសៀលថ្ងៃទី២៦មិថុនាឆ្នាំ២០២១នេះសមត្ថកិច្ចក្រសួងមហាផ្ទៃបានបង្ហាញខ្លួនជនល្មើសក្លែងស្លៀកពាក់ឯកសណ្ឋាន ក្លែងឯកសារអគ្គស្នងការដ្ឋាននគរបាលជាតិ ឯកសាររបស់ក្រសួងមហាផ្ទៃ និងក្លែងខ្លួនជានាយករង នៃមន្ទីរប្រឆាំងបទល្មើសគ្រឿងញៀន។ សមត្ថកិច្ចបានឲ្យដឹងថាបន្ទាប់ពីបានទទួលព័ត៌មានពីលោកវរសេនីយ៍ អ៊ឹង សុភ័ក្ត្រ អធិការរង នៃអធិការដ្ឋាននគរបាលខណ្ឌទួលគោក សង្ស័យមានជនម្នាក់ក្លែងបន្លំខ្លួន ជានាយករងមន្ទីរប្រឆាំងបទល្មើសគ្រឿងញៀន។

នៅថ្ងៃទី២៤ ខែមិថុនា ឆ្នាំ២០២១ វេលាម៉ោង ១៨និង០៥នាទី កម្លាំងជំនាញ នៃមន្ទីរប្រឆាំងបទល្មើសគ្រឿងញៀន(ក១០)ដឹកនាំដោយលោកឧត្តមសេនីយ៍ទោ សារី បុត្រសត្យា នាយករងមន្ទីរ សហការជាមួយកម្លាំងជំនាញនៃស្នងការដ្ឋាននគរបាលរាជធានីភ្នំពេញ និងកម្លាំងជំនាញនៃនាយកដ្ឋានព្រហ្មទណ្ឌ ដឹកនាំសម្របសម្រួលដោយលោក ស៊ិត វណ្ណៈ ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ បានស្រាវជ្រាវ និងឈានទៅចាប់ខ្លួនជនល្មើស នៅចំណុចស្ថានីយ៍ប្រេងឥន្ធនៈ LHR និងចំណុចផ្ទះលេខ១២០បេ ភូមិចំការឪឡឹក១ សង្កាត់កាកាប១ ខណ្ឌពោធិ៍សែនជ័យ រាជធានីភ្នំពេញ ។

ដោយឃាត់ខ្លួនជនសង្ស័យម្នាក់ឈ្មោះ សៅខូ ច័ន្ទសូឡារ ភេទប្រុស អាយុ ២២ឆ្នាំ ជនជាតិ ខ្មែរ ។

ចាប់យកវត្ថុតាងរួមមាន ៖

1. អាវុធខ្លី ១ដើម ម៉ាកTACTICAL23 លេខ WET5168 និងបង់ចំនួន ២(កាំភ្លើងហ្គាស)

2. គ្រាប់អាវុធប្រភេទ 9mm ចំនួន ១២គ្រាប់

3. ខ្នោះដៃ ចំនួន ១គូ

4. វិទ្យុទាក់ទងម៉ាកម៉ូតូរ៉ូឡាចំនួន ១គ្រឿង

5. ស្រោមអាវុធខ្លី ចំនួន ៤ស្រោម

6. កាតនគរបាលជាតិក្លែងក្លាយចំនួន ២សន្លឹក

7. ស័ក្តិថ្នាក់វរសេនីយ៍ទោ ១គូ

8. កាតនគរបាលព្រហ្មទណ្ឌក្លែងក្លាយ ចំនួន ២សន្លឹក

9. មួកនគរបាលជាតិថ្នាក់វរសេនីយ៍ចំនួន ២ និងថ្នាក់អនុសេនីយ៍ ១

10. ឯកសណ្ឋាននគរបាលជាតិចំនួន ៦កំប្លេ