សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បើតាមឧត្តមសេនីយ៍ឯក ឆាយ គឹមខឿន អគ្គស្នងការរង និងជាអ្នកនាំពាក្យអគ្គស្នងការដ្ឋាននគរបាលជាតិ បញ្ជាក់ប្រាប់បណ្តាញព័ត៌មាន នៅរសៀលថ្ងៃទី២៩ ខែមិថុនា ឆ្នាំ២០២១ គឺយ៉ាងហោចណាស់ មានយានយន្តសរុបចំនួន ៦១២គ្រឿងទៀត ត្រូវបាននគរបាលទូទាំងប្រទេសត្រួតពិនិត្យ និងផាកពិន័យ នៅថ្ងៃទី២៩ ខែមិថុនា ឆ្នាំ២០២១ ក្នុងនោះមានម៉ូតូ ៤៥៤គ្រឿង និងរថយន្ត ១៥៨គ្រឿង។
អ្នកនាំពាក្យដដែលបានលើកឡើងថា , គិតថ្ងៃទី០១ ខែមករា ដល់ថ្ងៃទី២៩ ខែមិថុនា ក្នុងឆ្នាំ២០២១ នគរបាលចរាចរណ៍ទូទាំងប្រទេសបានត្រួតពិនិត្យ និងផាកពិន័យយានយន្តសរុបចំនួន ១០៥,២៥៦គ្រឿង ក្នុងនោះមានម៉ូតូ ៧៧,១៦២គ្រឿង និងរថយន្តគ្រប់ប្រភេទ ២៨,០៩៤គ្រឿង។
សូមបញ្ជាក់ថា សម្រាប់ថ្ងៃទី២៩ ខែមិថុនា ឆ្នាំ២០២១ គ្រោះថ្នាក់ចរាចរណ៍នៅទូទាំងប្រទេសកម្ពុជាក៏បានកើតឡើងចំនួន ០៦លើក ក្នុងនោះស្លាប់ ០៦នាក់ របួស ០៧នាក់ (របួសធ្ងន់ ០៧នាក់)។ រយៈពេល ១ថ្ងៃមក៨០នេះ មានករណីគ្រោះថ្នាក់ចរាចរណ៍ចំនួន ១,២៥៤លើក បណ្ដាលឱ្យមនុស្សស្លាប់ ៧០៤នាក់ របួស ១,៧៨១នាក់ (របួសធ្ងន់ ១,០៣៧នាក់)។
បទល្មើសដែលត្រូវបានកត់សម្គាល់សម្រាប់ម៉ូតូ គឺភាគច្រើនអត់មួក ទូរស័ព្ទ ល្មើសសញ្ញា និងអត់ស្លាកលេខជាដើម។ ដោយឡែករថយន្តល្មើសល្បឿន ល្មើសសញ្ញា អត់ប័ណ្ណបើកបរ អត់ស្លាកលេខ ស្រវឹង ទូរស័ព្ទ អត់ខ្សែក្រវ៉ាត់ លើសចំណុះ អាជីវកម្ម ឆៀកជាដើម។
ឧត្តមសេនីយ៍ឯក ឆាយ គឹមខឿន បានបន្តថា ការអនុវត្តតាមអនុក្រឹត្យលេខ៣៩ ក្នុងការផាកពិន័យយានយន្តល្មើសបានដំណើរការទៅយ៉ាងល្អប្រសើរ។ លោកបានថ្លែងអំណរគុណ និងកោតសរសើរដល់ជនរួមជាតិជាអ្នកប្រើប្រាស់ផ្លូវទាំងអស់ ដែលបានចូលរួមគោរពច្បាប់ចរាចរណ៍យ៉ាងល្អប្រសើររយៈពេលកន្លងមកនេះ ជាពិសេសកោតសរសើរ និងអរគុណដល់នគរបាលចរាចរណ៍ដែលបានលះបង់ និងខិតខំប្រឹងប្រែងជំរុញការរឹតបន្តឹងចរាចរណ៍ប្រកបដោយស្មារតី ទទួលខុសត្រូវខ្ពស់បំផុត។
សូមបងប្អូនជនរួមជាតិ ! ចូលរួមគោរពច្បាប់ចរាចរណ៍ទាំងអស់គ្នា ដើម្បីជីវិតខ្លួនឯង និងអ្នកដទៃ ៕
ដោយ ៖ សិលា
