សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់បានបើករថយន្តស្តារិចមួយគ្រឿងឡើងលើសួនពុះចែកទ្រូងផ្លូវ នឹងបុកបង្គោលភ្លើងមួយដេីមបណ្ដាលឲ្យបាក់ក្រឡេកង់ខាងមុខចំហៀងខាងឆ្វេងទៅមុខលែងរួច កាលពីវេលាម៉ោង២និង ៣០នាទីរសៀលថ្ងៃទី២ ខែកក្កដា ឆ្នាំ ២០២១ ស្ថិតនៅតាមបណ្តោយផ្លូវ២១៧ ក្នុងភូមិព្រែកជ្រៃ សង្កាត់ស្ពានថ្ម ខណ្ឌដង្កោ រាជធានីភ្នំពេញ ។
តាមប្រភពព័ត៌មានពីកន្លែងកេីតហេតុបានឲ្យដឹងថា មុនកើតហេតុគេឃើញបុរសម្នាក់បានបើករថយន្តម៉ាក ស្តារិច ពណ៌ស ពាក់ស្លាកលេខភ្នំពេញ 2AG -6718 ធ្វើដំណើរតាមបណ្ដោយផ្លូវ២១៧ ទិសដៅពីជើងទៅត្បូង ស្រាប់តែមកដល់ចំណុចកើតហេតុ សង្ស័យតៃតុងងងុយដេកបានរេចង្កូតឡើងលើសួនពុះចែកទ្រូងផ្លូវចម្ងាយ៥ម៉ែត្រ ទៅបុកនឹងបង្គោលភ្លើងមួយដេីមបណ្តាលឲ្យបាក់ក្រឡេកង់ផ្នែកខាងមុខចំហៀងខាងឆ្វេងទៅមុខលែងរួច ដោយមិនមានអ្នកណាម្នាក់រងរបួសនោះទេគ្រាន់តែខូចខាតរថយន្តនិងបង្គោលភ្លើងរួមនិងសួនច្បារពុះចែកទ្រូងផ្លូវប៉ុណ្ណោះ ។
ក្រោយមកសមត្ថកិច្ចមូលដ្ឋានបានចុះទៅដល់កន្លែងកើតហេតុ ហេីយសហការជាមួយសមត្ថកិច្ចជំនាញចរាចរណ៍ចុះមកធ្វើការវាស់វែងយករថយន្តបង្កមករក្សាទុកនៅអធិការដ្ឋាននគរបាលខណ្ឌដង្កោរង់ចាំដោះស្រាយគ្នានៅពេលក្រោយជាមួយនឹងមន្ត្រីអគ្គិសនី ៕
ដោយ ៖ ភារ៉ា ដង្កោ
