សារព័ត៌មាន នគរវត្ត តែងតែនាំមុខគេជានិច្ច
ការប្រកួតវគ្គ៨ក្រុមចុងក្រោយត្រូវបានបញ្ចប់កាលពីរាត្រីម្សិលមិញ ដោយបានរកឃើញ២ក្រុមទៀតឡើងទៅកាន់វគ្គពាក់កណ្តាលផ្តាច់ព្រ័ត្រ ឬវគ្គ៤ក្រុមចុងក្រោយនៃព្រឹត្តិការណ៍យូរ៉ូ២០២០។ ក្នុងនោះគេរកឃើញ២ក្រុមដំបូងដែលបានប្រកួតកាលពីថ្ងៃទី២កន្លងទៅ ហើយនៅយប់ម្សិលមិញរកឃើញ២ក្រុមទៀតដែលត្រូវឡើងទៅវគ្គ៤ក្រុមដែរ។
យោងតាមលទ្ធផលរបស់សារព័ត៌មាន soccerway និង BBC Sport នៅព្រឹកថ្ងៃទី៤ កក្កដានេះបានបង្ហាញថា ក្រុមខ្លាំងដាណឺម៉ាកបានយកឈ្នះក្រុមសាធារណរដ្ឋឆេក ក្នុងលទ្ធផល២ទល់១ ក្នុងការប្រកួតវគ្គ៨ក្រុម ខណៈដែលអង់គ្លេសបានបំបាក់អ៊ុយក្រែនមិនឲ្យតដៃក្នុងលទ្ធផល៤ទល់០។
២គ្រាប់របស់ក្រុមដាណឺម៉ាករកបានដោយកីឡាករ Delaney នៅនាទីទី៥ និងគ្រាប់ទី២រកបានដោយកីឡាករ Dolberg នៅនាទីទី៤២ ក្នុងតង់ទី១។ ចំណែកក្រុមសាធារណរដ្ឋឆេកបានព្យាយាមរកគ្រាប់បាល់បាន១គ្រាប់សងវិញដែរនៅនាទីទី៤៩ ក្នុងតង់ទី២ ដោយកីឡាករ Schick ធ្វើឲ្យចប់ការប្រកួតដាណឺម៉ាកមានឱកាសឡើងទៅវគ្គ៤ក្រុមចុងក្រោយបន្ទាប់ពីយកឈ្នះឆេក២ទល់១ ។
ចំណែកក្រុមតោកំណាចអង់គ្លេសបានបំបាក់ក្រុមអ៊ុយក្រែន៤ទល់០ ដែលការប្រកួតនេះគឺអង់គ្លេសគ្រប់គ្រងបាល់បានច្រើនជាងអ៊ុយក្រែន រហូតដល់៥១ភាគរយ ហើយការស៊ុតបាល់ចំគោលដៅគឺមានរហូតដល់៦លើក ខណៈដែលអ៊ុយក្រែនមានឱកាសតែ២លើកប៉ុណ្ណោះ។ ការប្រកួតបានតែ៤នាទីប៉ុណ្ណោះខ្សែប្រយុទ្ធ និងជាប្រធានក្រុមអង់គ្លេស Harry Kane រកបាន១គ្រាប់នាំមុខ ធ្វើឲ្យចប់ការប្រកួតក្នុងតង់ទី១ អង់គ្លេសនាំមុខអ៊ុយក្រែន១ទល់០។
ចូលដល់ការប្រកួតតង់ទី២ ក្រុមអង់គ្លេសបានព្យាយាមសម្រុកដើម្បីស្វែងរកគ្រាប់បាល់ ហើយនៅនាទីទី៤៦ ខ្សែការពារអង់គ្លេស Harry Maguire តែតចូល១គ្រាប់ទៀតធ្វើឲ្យអង់គ្លេសនាំមុខ២ទល់០ និងនៅនាទីទី៥០ ខ្សែប្រយុទ្ធ Harry Kane ដដែលតែតចូល១គ្រាប់បន្ថែមទៀត។ មិនយូរប៉ុន្មានខ្សែបម្រើ Henderson ដែលទើបនឹងដូរចូលក៏មានឱកាសរកគ្រាប់បាល់១គ្រាប់ទៀត ដោយការតែតបញ្ចូលទីអ៊ុយក្រែននៅនាទីទី៦៣ ធ្វើឲ្យចប់ការប្រកួតអង់គ្លេសបានយកឈ្នះអ៊ុយក្រែន៤ទល់០។
លទ្ធផលនេះបានបង្ហាញថា ៤ក្រុមដែលត្រូវឡើងទៅកាន់វគ្គពាក់កណ្តាលផ្តាច់គឺអុីតាលីដែលបានយកឈ្នះបែលហ្ស៊ិកត្រូវប៉ះអេស្ប៉ាញដែលបានយកឈ្នះស្វ៊ីសនៅថ្ងៃទី៦ ខែកក្កដា វេលាម៉ោង២រំលងអធ្រាត្រម៉ោងនៅកម្ពុជា។ ចំណែកអង់គ្លេសដែលបានយកឈ្នះអ៊ុយក្រែនត្រូវប៉ះដាណឺម៉ាកដែលបានយកឈ្នះឆេក នៅថ្ងៃទី៧ កក្កដា វេលាម៉ោង២រំលងអធ្រាត្រដែរ ដើម្បីស្វែងរកក្រុមខ្លាំងឡើងទៅកាន់វគ្គផ្តាច់ព្រ័ត្រដែលនឹងប្រារព្ធធ្វើឡើងនៅថ្ងៃទី១១ កក្កដានៅក្នុងទឹកដីអង់គ្លេសជាម្ចាស់ផ្ទះ ៕
ដោយ៖ ភារៈ
