សារព័ត៌មាន នគរវត្ត តែងតែនាំមុខគេជានិច្ច
ខេត្តសៀមរាប៖ បេីតាមការបញ្ជាក់ពីលោកឧត្តមសេនីយ៍ទោ ទិត្យ ណារ៉ុង ស្នងការនគរបាលខេត្តសៀមរាប បានថ្លែងឱ្យដឹងថា គ្រាប់បែកដៃប្រមាណជាង ៣០០គ្រាប់ ត្រូវបានក្រុមការងារជីកបំពង់លូ ខ្សែកាប្លិ៍របស់ទូរគមនាគមន៍ ប្រទះឃើញនៅកណ្តាលក្រុងសៀមរាប។
ជាក់ស្ដែងនៅល្ងាចថ្ងៃសៅរ៍ទី១០ ខែកក្កដា ឆ្នាំ២០២១ លោកឧត្តមសេនីយ៍ទោ ទិត្យ ណារ៉ុង បានគូសបញ្ជាក់ថា៖ ក្រុមការងារជីកបំពង់លូខ្សែកាប្លិ៍ បានប្រទះឃើញគ្រាប់យុទ្ធភ័ណ្ឌមិនទាន់ផ្ទុះជាប្រភេទគ្រាប់បែកដៃ នៅជាប់របងវិទ្យាល័យ ១០ មករា ១៩៧៩ ក្នុងភូមិមណ្ឌល២ សង្កាត់ស្វាយដង្គំ ក្រុងសៀមរាបកាលពីរសៀលថ្ងៃទី១០ កក្កដានេះដែរ។
លោកស្នងការខេត្ត បានថ្លែងបន្ដថា ទីតាំងនោះ ជាសាលារៀន នៅសម័យ លន់ ណុល លុះដល់សម័យខ្មែរក្រហម ទីតាំងសាលារៀនេះ ត្រូវបានពួកនោះយកធ្វើជាឃ្លាំងគ្រាប់។ លុះដល់ក្រោយថ្ងៃរំដោះ ៧ មករា ១៩៧៩ ទីតាំងខាងលើ ត្រូវបានយកមកធ្វើ ជាសាលារៀនវិញ។
ដោយឡែកជុំវិញករណីនេះដែរ បេីយោងតាមសេចក្តីរាយការណ៍ របស់ប្រធានមន្ទីរប្រៃសណីយ៍ និងទូរគមនាគមន៍ ខេត្តសៀមរាប លោក សុខ សីហា ក៏បានបញ្ជាក់ដែរថា គិតត្រឹមម៉ោង ៤រសៀល ថ្ងៃដដែលនេះ មន្ត្រីនគរបាល មកពីអង្គរភាពគ្រប់គ្រង អាវុធជាតិផ្ទុះ និងមន្ត្រីមជ្ឈ មណ្ឌលសកម្មភាព កំចាត់មីន ( ស៊ីម៉ាក់ = CMAC) បានរកឃើញគ្រាប់បែកដៃ ចំនួន ៣២៥ គ្រាប់។
គួរបញ្ជាក់ថា បើទោះជាយ៉ាងណា សេចក្តីរាយការណ៍ របស់លោកប្រធានមន្ទីរប្រៃសណីយ៍រូបនោះ ក៏បានសង្កត់ធ្ងន់ថា៖ ចំនួននេះ នៅមិនទាន់អស់នៅឡើយទេ ដែលតាមការប៉ាន់ប្រមាណ អាចមាននៅសេសសល់ ប្រមាណ ២០ភាគរយទៀត។ ចំណែកទីតាំងខាងលើនេះ មន្ត្រីជំនាញបានសម្រេច ហ៊ុមព័ទ្ធទុកសិន ដើម្បីរុករកគ្រាប់ ដែលនៅសេសសល់ជាបន្តទៀត និងដើម្បីការពារសុខសុវត្ថិភាពទាំងអស់គ្នា៕ដោយ៖សហការី
