សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់ត្រូវបានរថយន្តសាមុយដឹកបញ្ជូនទៅកាន់មន្ទីរពេទ្យភ្លាមៗ បន្ទាប់ពីជិះម៉ូតូហុងដាឌ្រីមយ៉ាងលឿនមិនប្រយ័ត្នជ្រុលទៅបុករថយន្តហ្វដពីចំហៀងខាងឆ្វេងយ៉ាងពេញទំហឹងកាលពីវេលាម៉ោង៩ និង៤០នាទីយប់ថ្ងៃអង្គារ ទី១៣ ខែកក្កដា ឆ្នាំ២០២១ នៅតាមបណ្ដោយផ្លូវលេខ៤៣២កែងនិឹងផ្លូវលេខ១០៥ ក្នុងសង្កាត់បឹងត្របែក ខណ្ឌចំការមន។
តាមប្រភពព័ត៌មានពីកន្លែងកើតហេតុបានឱ្យដឹងថា មុនពេលកើតគេឃើញបុរសម្នាក់ជិះម៉ូតូហុងដាឌ្រីម ស៊េរីឆ្នាំ២០២១ ពណ៌ខ្មៅ ពាក់ស្លាកលេខភ្នំពេញ1IR-7035 ធ្វើដំណើរយ៉ាងលឿនតាមបណ្ដោយផ្លូវលេខ១០៥ក្នុងទិសដៅពីជើងទៅត្បូង ខណៈមកដល់ចំណុចផ្លូវបំបែកជាបួនបានជ្រុលទៅបុករថយន្ត Ford ពណ៌ស ពាក់ស្លាកលេខភ្នំពេញ2BJ -7911 បើកបរដោយបុរសម្នាក់ តាមបណ្ដោយផ្លូវលេខ៤៣២ក្នុង ទិសដៅពីលិចទៅកើតចំពីចំហៀងខាងឆ្វេងពេញទំហឹងបណ្ដាលឲ្យភាគីខាងម៉ូតូដួលរងរបួសធ្ងន់ ចំណែករថយន្តFordក៏រងការខូចខាតដែរ តែភ្លាមៗនោះអ្នកបើកបរមិនបានឈប់នៅកន្លែងកើតហេតុនោះទេ គឺបើកទៅមុខប្រហែល៣០ម៉ែត្រទេីបឈប់ ។
ក្រោយកើតហេតុ ជនរងគ្រោះជាម្ចាស់ម៉ូតូត្រូវបានរថយន្តសាមុយដឹកយកទៅព្យាបាលរបួស ។ បន្ទាប់មកសមត្ថកិច្ចមូលដ្ឋានបានចុះមកដល់ចំណុចកើតហេតុហេីយបានទាក់ទងបន្តទៅសមត្ថកិច្ចជំនាញមកធ្វេីការវាស់វែងយករថយន្តនិងម៉ូតូទៅរក្សាទុកនៅអធិការដ្ឋាននគរបាលខណ្ឌចំការមន រង់ចាំដោះស្រាយគ្នានៅពេលក្រោយ៕
ដោយ ៖ ភារ៉ា ដង្កោ
