សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ នគរបាលព្រហ្មទណ្ឌខណ្ឌចំការមនសហការជាមួយនគរបាលប៉ុស្តិ៍ផ្សារដើមថ្កូវចុះបង្រ្កាបបទល្មើសជាក់ស្ដែងបានជនសង្ស័យម្នាក់រួមនឹងថ្នាំញៀនចំនួន២កញ្ចប់តូច កាលពីវេលាម៉ោង២និង០០នាទីរំលងអធ្រាត្រឈានចូលថ្ងៃទី១៤ ខែកក្កដា ឆ្នាំ២០២១ ស្ថិតនៅតាមផ្លូវលេខ៥០៨ សង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ។
ជនសង្ស័យម្នាក់ឈ្មោះ សុខ ចាន់ណារិទ្ធ ភេទប្រុស អាយុ៣០ឆ្នាំ មុខរបរមិនពិតប្រាកដ ស្នាក់នៅចំណុចផ្លូវលេខ៥០៨ជិតស្ពានឈើ ក្នុងសង្កាត់ផ្សារដើមថ្កូវ ខណ្ឌចំការមន។
លោក ផន អូន អធិការរងខណ្ឌចំការមនបានឱ្យដឹងថា ដោយមានប្រជាពលរដ្ឋល្អរាយការណ៍ថាមានមនុស្សប្រុសម្នាក់អង្គុយនៅលើម៉ូតូយ៉ាងយូរដែលសង្ស័យថាជាអ្នកលក់ថ្នាំញៀន ទើបកម្លាំងសមត្ថកិច្ចជំនាញរបស់អធិការដ្ឋានខណ្ដប្រញាប់ទៅសហការជាមួយមេភូមិ នគរបាលប៉ុស្តិ៍យោងទៅតាមបទបញ្ជារបស់លោក យិន សាន អធិការ ខណ្ឌចំការមន ចុះទៅបង្ក្រាបតែម្តង។លោកអធិការរងខណ្ឌបានឱ្យដឹងទៀតថាជនសង្ស័យពេលឃើញកម្លាំងសមត្ថកិច្ចទៅដល់ក៏បានបោះកញ្ចប់បារីចោលបម្រុងរត់ តែត្រូវកម្លាំងសមត្ថកិច្ចយើងឃាត់បាននិងត្រួតពិនិត្យរកឃើញមានថ្នាំម្សៅពណ៌ សក្រាមចំនួន២កូនថង់តូចនៅក្នុងកញ្ចប់បារី(MEVIUS)នោះ ក៏នាំយកមកអធិការដ្ឋាននគរបាលខណ្ឌផ្នែកជំនាញ ។
លោកផន អូន បានអំពាវនាវដល់ប្រជាពលរដ្ឋ ពិសេសយុវជនយុវតីទាំងអស់សូមជៀសឱ្យឆ្ងាយពីគ្រឿងញៀន ព្រោះវាជាអំពើខុសច្បាប់និងធ្វើឱ្យយើងបាត់បង់ស្មារតីលែងស្គាល់បងប្អូន ឪពុកម្តាយ ខាតបង់ការសិក្សានិងទ្រព្យសម្បត្តិ ។
បច្ចុប្បន្នជនសង្ស័យខាងលើត្រូវបានឃាត់ខ្លួនជាបណ្ដោះអាសន្នដើម្បីកសាងសំណុំរឿងបញ្ជូនទៅតុលាការចាត់ការតាមនីតិវិធីច្បាប់ ៕
ដោយ ៖ ជីណា
