សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ឆ្នាំង៖ រដ្ឋបាលខេត្តកំពង់ឆ្នាំងបានបញ្ជាក់អោយដឹងថា, នាថ្ងៃទី១៤ ខែកក្កដា ឆ្នាំ២០២១នេះ លោក អម សុភា អភិបាលរងខេត្តកំពង់ឆ្នាំង រួមដំណើរដោយមន្ទីរជំនាញពាក់ព័ន្ធ និងអាជ្ញាធរ ចុះពង្រឹងអំពីវិធានការទប់ស្កាត់ការឆ្លងរីករាលដាលនៃជំងឺកូវីដ-១៩ ដល់ម្ចាស់រោងចក្រកាត់ដេរសំលៀកបំពាក់ ភី អេស ជី ខេមបូឌា ហ្គាមេន & រោងចក្រ តិក ហ្វុក ស្ថិតនៅក្នុងភូមិអន្លុងត្នោត ឃុំលង្វែក ស្រុកកំពង់ត្រឡាច ខេត្តកំពង់ឆ្នាំង។
លោកវេជ្ជបណ្ឌិត ប្រាក់ វ៉ុន ប្រធានមន្ទីរសុខាភិបាលខេត្តកំពង់ឆ្នាំង បានមានប្រសាសន៍ថាៈ រាល់ការអនុវត្តទៅតាមបច្ចេកទេស និងវិធានការនានារបស់ក្រសួងសុខាភិបាល បានត្រឹមត្រូវ ដូចជាៈ ការលាងសំអាតដៃឱ្យបានញឹកញាប់ ការរក្សាគំលាតសុវត្ថិភាព ពាក់ម៉ាស់ គឺពិតជាអាចទប់ស្កាត់បានការចម្លងនៃជំងឺកូវីដ-១៩នេះ ប្រកប ដោយប្រសិទ្ធភាព ដូចនេះម្ចាស់រោងចក្រ សហគ្រាសត្រូវតែអនុវត្តឱ្យបានតឹងរឹងបំផុត។ សូមម្ចាស់រោងចក្រ ត្រូវមានការតាមដានចំពោះកម្មករ កម្មការិនី ដោយតម្រូវឱ្យមានការពិនិត្យធ្វើតេស្តរហ័ស( Rapid Test ) ដោយផ្ទាល់ពីម្ចាស់រោងចក្រសហគ្រាស ដោយមានការចូលរួមបណ្តុះបណ្តាលពីមន្ត្រីនៃមន្ទីរសុខាភិបាលខេត្ត។
លោក អម សុភា បានមានប្រសាសន៍ ក្រោយពីបានផ្សព្វផ្សាយសេចក្តីណែនាំរបស់រដ្ឋបាលខេត្ត និងវិធានការការពារ និងទប់ស្កាត់ការរីករាលដាលនៃជំងឺកូវីដ-១៩ របស់ក្រសួងសុខាភិបាល និងអនុសាសន៍របស់ប្រមុខរាជរដ្ធាភិបាលកម្ពុជា គឺ៣ការពារ និង៣កុំ កន្លងមកបានធ្វើឱ្យម្ចាស់រោងចក្រសហគ្រាស ក៏ដូចជាកម្មករ និយោជិកនៅក្នុងរោងចក្រ តិក ហ្វុក និងរោងចក្រ ធី អេស ជី ខេមបូឌា ហ្គាមេន បានអនុវត្តយ៉ាងម៉ត់ចត់ពុំមានការឆ្លងជំងឺកូវីដ-១៩ទៀតឡើយ។
លោក អម សុភា ក៏បានណែនាំទៅដល់ម្ចាស់រោងចក្រ ត្រូវបន្តផ្សព្វផ្សាយនូវវិធានការឱ្យបានជាប់ជាប្រចាំ ដល់កម្មករ កម្មការិនី កុំឱ្យភ្លេចខ្លួនពីវិធានការការពារខ្លួនរួចផុតពីជំងឺកូវីដ-១៩ ហើយប្រសិនបើមានករណីឆ្លងសូមម្ចាស់រោងចក្រត្រូវរាយការណ៍ជាបន្ទាន់ដល់អាជ្ញាធរដើម្បីជួយដោះស្រាយឱ្យទាន់ពេលវេលា ៕
ដោយ ៖ សិលា
