សារព័ត៌មាន នគរវត្ត តែងតែនាំមុខគេជានិច្ច
ខេត្តពោធិ៍សាត់ ៖ នៅថ្ងៃពុធ ៥កើត ខែទុតិយាសាឍ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី១៤ ខែកក្កដា ឆ្នាំ២០២១ កម្លាំងសមត្ថកិច្ចចម្រុះប្រមាណជិត៦០នាក់ មធ្យោបាយដោយកាណូតបែងច្រើនគ្រឿងចែកជាពីរក្រុម បានបន្តចុះបង្រ្កាបបទល្មើសនេសាទ ដោយរុះរើបំផ្លាញចោលនូវឧបករណ៍ចាប់ត្រី(របាំង)ដែលជាវត្ថុតាងអស់ជាច្រើន ។
សេចក្តីរាយការណ៍ពីកម្លាំងចុះផ្ទាល់បានឲ្យដឹងថា ក្រុមទី-១ បានចុះត្រួតពិនិត្យ និងបង្រ្កាបត្រង់ចំណុចចារុះ និងកោះគ្របបាយ ស្ថិតនៅភូមិចារុះ ឃុំរាំងទិល ស្រុកកណ្ដៀង និងភូមិក្អមសំណ ឃុំមេទឹក ស្រុកបាកាន លទ្ធផលៈ រុះរើបំផ្លាញចោលនូវឧបករណ៍ចាប់ត្រី(របាំងស្បៃមុង)ចំនួន១០ខ្សែ ស្មើនឹងប្រវែងចំនួន១.៥០០ម៉ែត្រ លូកងស្បៃមុងចំនួន១១មាត់ បង្គោលចំរឹងចំនួន៥៣០ដើម និងចាក់លែងត្រីចម្រុះចូលទឹកបឹងទន្លេសាបចំនួន២៥គីឡូក្រាមផងដែរ ។
ប្រភពដដែលបន្តទៀតថា ដោយឡែកៈ ក្រុមទី-២ បានចុះត្រួតពិនិត្យ និងបង្រ្កាបស្ថិតនៅឃុំអន្សាចំបក់ ស្រុកក្រគរ ជាលទ្ធផលរុះរើបំផ្លាញចោលនូវឧបករណ៍ចាប់ត្រីដែលជាវត្ថុតាង(របាំងស្បៃមុង និងរបាំងសាច់អួន)ចំនួន៣៥ខ្សែ ស្មើនឹងប្រវែងចំនួន៣.៣០០ម៉ែត្រ បង្គោលចំរឹងចំនួន១.២០០ដើម ថែមទាំងចាក់លែងត្រីចម្រុះចំនួន១២គីឡូក្រាមផងដែរ ។
គួររំលឹកផងដែរថា រយៈពេលប៉ុន្មានថ្ងៃនេះគេឃើញកម្លាំងសមត្ថកិច្ចសហការគ្នា និងបែងចែកកម្លាំងជាក្រុមៗ ដើម្បីបែងចែកតំបន់គ្នាធ្វើការបង្រ្កាប ហើយលទ្ធផលក៏អនុវត្តបានច្រើនគួរឲ្យកត់សម្គាល់ផងដែរ ប៉ុន្តែគេពុំដឹងថាអាចមានប្រសិទ្ធភាពបានរយៈពេលប៉ុន្មាននោះទេ ព្រោះពុំដែលឃើញអនុវត្តលើជនប្រព្រឹត្តជាក់ស្តែងនោះឡើយ ៕
ដោយ ៖ បុឹម ពិន
