សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះសីហនុ៖ បេីតាមលោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ បានថ្លែងឱ្យដឹងនៅថ្ងៃសុក្រទី១៦ ខែកក្កដា ឆ្នាំ២០២១នេះថា៖ កម្លាំងនគរបាលជំនាញព្រហ្មទណ្ឌក្រុងព្រះសីហនុ បានចាប់ឃាត់ខ្លួនជនសង្ស័យចំនួន០២ នាក់ ពីបទ លួចមានស្ថានទម្ងន់ទោស (កាច់សោរ.ក យកម៉ូតូមួយគ្រឿង) កាលពីថ្ងៃទី១៥ ខែកក្កដាម្សិលមិញនេះ នៅចំណុចមុខអាគារបុគ្គលិក កាស៊ីណូណាន់ហៃ ក្រុមទី៤ ភូមិ១ សង្កាត់លេខ៣ ក្រុងខេត្តព្រះសីហនុ។ជាក់ស្ដែងយោងតាមរបាយការណ៍របស់អធិការនគរបាលក្រុងព្រះសីហនុ លោកវរសេនីយ៍ឯក តី វិសាល បានឱ្យដឹងថា ជនសង្ស័យទាំង០២នាក់នេះទី១-ឈ្មោះ វ៉ាន់ នឿន ភេទ ប្រុស អាយុ ៣១ឆ្នាំ មុខរបរ មិនពិតប្រាកដ ស្នាក់នៅ ភូមិ៦ សង្កាត់លេខ៤ ក្រុង.ខេត្ត ព្រះសីហនុ។ និងទី២-ឈ្មោះ បូយ ចាន់ណា ភេទ ប្រុស អាយុ ២៩ឆ្នាំ មុខរបរ លក់សាច់ឆ្កែ ស្នាក់នៅ បន្ទប់ជួលក្រោយរោងចក្រញ៉ូវស៊ីន ក្រុម១៧ ភូមិ១ សង្កាត់លេខ១ ក្រុង.ខេត្ត ព្រះសីហនុ។
របាយការណ៍ដដែល បន្តថា បន្ទាប់ពីឃាត់ខ្លួនជនសង្ស័យខាងលើនេះ កម្លាំងជំនាញបានចាប់យកវត្ថុតាងរួមមាន៖ ម៉ូតូ ០១គ្រឿងម៉ាក និច ពណ៌ស ពាក់ស្លាកលេខ កំពត ១L-៧៨២៨, ដែកសំរាប់កាច់បំបែកសោរ ក ម៉ូតូ ចំនួន ០៣ និងសម្ភារមួយចំនួន។
គួរបញ្ជាក់ថា បច្ចុប្បន្នជនសង្ស័យទាំង០២នាក់រួមនឹងវត្ថុតាង កំពុងឃាត់ខ្លួននៅអធិការដ្ឋាននគរបាលក្រុងព្រះសីហនុ ដើម្បីកសាងសំណុំរឿងបញ្ជូនទៅសាលាដំបូងខេត្តព្រះសីហនុ ចាត់ការទៅតាមនីតិវិធីច្បាប់៕ដោយ៖សហការី
